1 तमा ख्‍यिराङ चर्चकी मीतिवी पर्ला गोमा कितुपतिवाला ङ गोङ्‍बा शोयी। ङ साङ चर्चकी गोमा कितुप मी यिन, तमा ख्रीष्‍टकी छेटाङ खुरुप थोक्‍ला साङ पङ्‍बु तेरुप मी यिन। ज्‍युक्‍ला ख्रीष्‍टकी मोवा छ्‍या देन्‍दुप पेला ख्‍यिरा मुला राङ ङला साङ ती मोवा ति थोप्‍किवी। 2 ख्‍यिराङला चेक तेन ज्‍यकुप कोन्‍छ्‍योककी पेतुप मीतिवाला लुक गोठालाकी लुकतिवाला ल्‍हावु दोके क्‍यानी ल्‍यामु ल्‍हटे किसा। कर्खापला ख्‍येल्‍नी कितुप मिन, यिने कोन्‍छ्‍योककी नोवा यिन सिनी सेम्‍बा सेमगी किसा। टङ्‍गा डेवी देर्पाला ख्‍येल्‍नी मिन, यिने गा क्‍यानी किसा। 3 ख्‍यिराङला चेक तेन ज्‍यकुप मीतिवाला ओङ्‍ज्‍येन क्‍यानी मिन, यिने ख्‍यिरा मिजी ति तिवी थोक्‍ला पङ्‍बु च्‍युङ गोकितो। 4 तमा लुक गोठाला छ्‍ये दोके यिन्‍दुप ख्रीष्‍ट फेपुप पेला ख्‍यिराङला नाम्‍साङ मेसेतुप मोवा वोतुप ग्‍येल्‍वुकी उशाक थोप्‍कितो।

5 तमा नाज्‍युङतिवा, गावागुवातिवी ओङला देता। च्‍यिक ताङ च्‍यिककी ओङला देनी छ्‍येजु मिकिवु वुङ गोकितो। च्‍यिलासिसिन “छ्‍येजु कितुप मीतिवाला कोन्‍छ्‍योककी गा मलाङ्‍गिवी, यिने छ्‍येजु मिकिवु मीतिवाला खोकी कटिन नङ्‍गिवी।”* ५:५ हितोपदेश ३:३४ सिनी कोन्‍छ्‍योककी सुङला साङ टि वे। 6 ती तप्‍की चोछ्‍येवु कोन्‍छ्‍योककी ओङला देनी खुरुङ छ्‍येजु मिकिवु वुङ गोकिवी। तमा खोकी नोक्‍यावु तुजेला ख्‍यिराङला छ्‍ये जो नङ्‍गिवी। 7 ख्‍यिराङला चुका पपतिवा वोसिनाङ खोला चेक ते, तमा खोकी ख्‍यिराङला ल्‍हटे क्‍या नङ्‍गिवी।

8 च्‍याङ्‍से देता, ङ्‍यी मालोक्‍नी देता! च्‍यिलासिसिन ख्‍यिरा ड शैतान ति सुला थेप्‍किवे, तीला साप सिनी वोरुप सेङ्‍गी दोके वोरिन वोतो। 9 तुक क्‍यानी ख्‍यिराङ तेपा रम्‍बु क्‍यानी तीकी तेन्‍दोकला लोसा, च्‍यिलासिसिन जम्‍बुलिङ तेरीला वोतुप ख्‍यिरा अच्‍युनुपतिवी साङ तुकै राङ छेटाङ खुरिन वोतो। 10 कोन्‍छ्‍योक ति ख्‍यिराङला तेरी कटिन नङ्‍गुप कोन्‍छ्‍योक यिन। खोकी येशू ख्रीष्‍ट ताङ मुला नाम्‍साङ ना मोडोवु मोवाला ख्‍यिराङला कताङ नङ वे। तमा चेयी पर सेक ति ख्‍यिरा छेटाङ खुर्सिनाङ खोकी ख्‍यिरा क्‍यावु दुक्‍पा नेसुर ख्‍यिराङला छ्‍ये जो नङ्‍गिवी। तमा ख्‍यिराङला फार छुर मोयोम्‍बुप ताङ ङार छ्‍येवु जोनी ख्‍यिरा तेपा ति डम्‍ज्‍यी रम्‍बु तिङ्‍गुप दोके जो नङ्‍गिवी। 11 खोला राङ ओङ ताङ ङार ति नरीकी नरी वुङ्‍शी। आमिन।

12 दी यिकी ति खोङ्‍तेर्मु वोतुप ङे नुप सिलासला टिक च्‍यितुप यिनो। दी यिकी ति ख्‍यिराङला टोङ्‍गु तेरुपला ताङ कोन्‍छ्‍योककी कटिन टेङ्‍बु ति दी राङ यिन सिनी पङ्‍बु तेरुपला टिवु यिनो। तुक क्‍यानी ख्‍यिराङ दी कटिनला ल्‍यामो क्‍यानी देता। 13 बेबिलोनकी चर्चला वोतुप कोन्‍छ्‍योककी पेन नङ्‍गुप तेपा कितुपतिवा ताङ ङे पुज्‍युङ दोके राङ यिन्‍दुप मर्कूसकी साङ ख्‍यिराङला टसी देलेक सिनी ताङ वोतो। 14 ख्‍यिराङ च्‍यिककी च्‍यिकला ङ्‍यिङ्‍ज्‍ये क्‍यानी टसी देलेक सिसा।

ख्रीष्‍ट येशूला तेपा कितुपतिवा तेरीला लोदिमु वुङ्‍शी।