कोरिन्थला वोतुप तेपा कितुपतिवाला
पावलकी टिवु यिकी ङ्यिवा
दी थेपकी कोर्ला
दी थेप ति पावलकी खोरो राङ गो चुवु कोरिन्थीकी चर्चला टिवु यिकी ङ्यिवा यिन। दी यिकी टिकुप पेला पावल ताङ खोरो चर्चकी मीतिवी पर्ला तम्जी ल्यामु मिन्दुक। च्यिलासिसिन चर्चकी मीतिवा ललाइकी पावलला छासे मारे ताङ्नोक। यिन्सिनाङ पावलकी तिवी मुला डिकुप छासे नो क्यानोक। ती नो क्यावु ति तेरी च्युङ्सिन पावलला छासे गा गिवी।
दी यिकीकी थल्माला पावलकी खुरुङ ताङ खोरो चर्चकी पर्ला वोतुप तम्जीकी कोर्ला टिनी वे। चर्चकी मीतिवी खुरुङला ङोशी मारे तङ्गुप ताङ खोरो तेन्दोकला लावु ताम्ङेकी कोर्ला ङार क्यानी सिक्या वे। तीकी जोसालेन्सिन चर्चकी मीतिवा सेम ग्युर्नी खोरो मुला थिन वासिमा पावल गा लानोक। ती ज्युक्ला पावलकी यहूदियाला वोतुप पेराङ्बु ख्रीष्टियानतिवी थोक्ला सेम्बा सेमगी दाल्जा किटे कितुप सिनी चर्चकी मीतिवाला गोङ्बा शुनोक। तिङ्मी लोप्च्येनतिवाला ल्हासिन पावलकी खुरुङ वुतुङ ख्रीष्टकी लोमा छ्ये यिन सिनी दप्शे ग्यम वे। च्यिलासिसिन कोरिन्थीकी यम्बा मी ललाइकी पावल ति वुतुङ के येशूकी लोमा छ्ये मिन, यिने ती ति लोमा मेटेङ्बु यिन सिनी क्येन ग्यकिनोक।
मुला राङ वोतुप लोप्च्येनतिवा
पावलकी ङोशी १:१-११
पावल ताङ कोरिन्थकी चर्च १:१२–७:१६
यहूदियाला वोतुप ख्रीष्टियानतिवी थोक्ला बुल्वा ८:१–९:१५
पावलकी खुरुङ वुतुङ के लोमा छ्ये यिन सिनी सिक्यावु १०:१–१३:१०
यिकी टि सिन्दा क्यावु १३:११-१३
1
1 टसी देलेक! दी यिकी ति कोन्छ्योककी नोवा नेमा ख्रीष्ट येशूकी लोमा छ्ये च्युङ्गुप ङ पावल ताङ दाक्पी नुप तिमोथी नेसुर कोरिन्थीला वोतुप कोन्छ्योककी चर्चकी मीतिवा ताङ अखैया लुङ्बाला वोतुप तेरी कोन्छ्योकला तेपा कितुप मीतिवाला टिवु यिनो। 2 दाक्पी पपा कोन्छ्योक ताङ चोवो येशू ख्रीष्टकी ख्यिराङला कटिन ताङ लोदिमु नङ्शिता।
ङाडेङ नङ्गुप कोन्छ्योक
3 दाक्पी चोवो येशू ख्रीष्टकी पपा कोन्छ्योकला सोवा वुङ्शी। खो ति च्यम्बा ताङ टोङ्गु तेरी नङ्गुप कोन्छ्योक यिन। 4 खोकी ङ्यिराङला तेरी परकी दुक्पा ख्येलुप पेला टोङ्गु नङ्गिवी। तुक क्यानी ङ्यिरा साङ खोकी नङ्गुप टोङ्गु नेमा मी ललाइला दुक्पा ख्येल्सिन तिवाला टोङ्गु तेर थुप्किवी। 5 चुक क्यानी ख्रीष्टकी थोक्ला ङ्यिरा छेटाङ बङी खुर्किवे, तुक राङ क्यानी ख्रीष्ट नेमा कोन्छ्योककी ङ्यिराङला छासे क्यानी टोङ्गु नङ्गिवी। 6 ङ्यिराङला दुक्पा ङ्येतुप ति ख्यिराङला टोङ्गु ताङ थर्वा ङ्येतुपला यिन। ङ्यिराङला टोङ्गु ङ्येतुप ति ख्यिराङला साङ टोङ्गु ङ्येतुपला यिन। तमा ती टोङ्गु नेसुर राङ ङ्यिरा दोके ख्यिरा साङ दुक्पा खुरुप ताङ हम क्यानी दे थुप्किवी। 7 तुक क्यानी ङ्यिरा ख्यिराङला रेवा क्यावु ति नाम्साङ मोयोम्बी। ङ्यिराङला छ्या वे, ङ्यिरा खुरुप दोके दुक्पा ख्यिरा साङ खुर्वे। ङ्यिराङला ङ्येतुप दोके टोङ्गु ति ख्यिराङला साङ ङ्येकिवी।
8 अच्युनुपतिवा, ङ्यिरा एशिया लुङ्बाला दुक्पा खुरुप ति ख्यिराङला ल्यामु क्यानी हाक्कोशी सिरुप नोवा वे। ते ङ्यिराङला छासे दुक्पा ङ्येतुप तप्की सेन्बु लुकिते सिरुप रेवा साङ मेतुप्जा। 9 वुतुङ के ङ्यिरा याङ त शेप पेला लेप्सुङ सिनी नो क्यायी। यिने ती ति ङ्यिरा खुरुङला राङ रेवा क्यावु मिन, शेपतिवाला सेन्बु लोङ्गुप कोन्छ्योकला तिराङ रेवा कि थुप्शी सिनी तुकै च्युङ्गुप यिन। 10 खोकी ङ्यिराङला तुका शेप ने र्होक नाङ्सुङ। तमा तन्दा साङ र्होक नङ्गिवी। तुक क्यानी येलुङ ज्युक्ला ङ्यिराङला र्होक नङ्गुप खोला ङ्यिरा तेरी रेवा क्या वे। 11 तीकी थोक्ला ख्यिरा ङ्यिराङला मोपोर क्यानी दाल्जा किटे किसा। तुक क्यासिन ख्यिराङ बङीकी क्यावु मोपोर नेसुर कोन्छ्योककी ङ्यिराङला मोलाम नङ्गुप तप्की मी बङीकी कोन्छ्योकला थुचिछे बुल्गिवी।
पावलकी कोरिन्थला डोप नोवा पोवु
12 ङ्यिराङ दी ताम्ङेला तेके किवी, तमा ङ सेम टेङ्बुकी पङ्बु तेरिन। दी जम्बुलिङला देनी क्यावु ङ्यिरा किताङ नालु ताङ खक्छ्येवुला ख्यिरा मुकी तम्जीला ताम्ङे जिनोक माजोनी कोन्छ्योक नेमा वावु टेङ्बुला क्यावु यिन। ङ्यिरा तुक क्यावु ति जम्बुलिङकी रिक्पा नेमा वावु मिन, कोन्छ्योककी कटिन नेमा वावु यिन। 13 ङ्यिराङ ख्यिराङला लोप थुपुप ताम्ङे ताङ हाक्को थुपुप ताम्ङे तिराङ टिकिन। तन्दा ङ्यिरा ख्यिराङला लापुप ति ख्यिरा चेयी तिराङ हाक्को वे, 14 यिने तिङ्ला ति ख्यिरा तेरी हाक्को थुप्किवी सिनी ङ रेवा कितिन। तुक क्यानी दाक्पी चोवो येशू फेवु तुजेला ङ्यिरा ख्यिरा थोक्ला तेके क्यावु दोके ख्यिरा ङ्यिरा थोक्ला तेके किवितो।
15 ती ताम्ङे ति ङला तेन्तेन वोतुप तप्की गोमाला ङे ख्यिराङला ठेतुपला वुङ्गुप नो क्यायी। तुक क्यासिन ङ ख्यिरा ते थेङ्मा ङ्यी वासिमा ख्यिराङला लोदिमु च्युङ्गिवी। 16 ङ माकेडोनिया डोप पेला ख्यिराङला ठेनी डोप, तमा माकेडोनिया नेसुर लोकुप पेला साङ ख्यिराङला ठेतुप नो क्यायी। तमा तेसुर ङ यहूदियाला डोप पेला ख्यिरा ङला दाल्जा किटे किवी सिनी नो क्यायी। 17 काङ ङे नासाम मातङ्वा क्यानी ख्यिरा ते वुङ्गुप पोवु यिन सिनी ख्यिरा नासाम तङ्गुप? काङ ङ जम्बुलिङकी मीतिवी दोके मीला गा लोङ्गुपला पर्साला “ङ गिवी।”, पर्साला “ङ मेवी।” सिनी रङगी थोक्ला तिराङ नासाम तङ्नी सिक्यावु यिन रो? 18 कोन्छ्योक ति खोङ्तेर्मु वे। तुक क्यानी ङ साङ पर्साला “गिवी”, पर्साला “मेवी” सिनी थाक मेछ्येवी। 19 च्यिलासिसिन सिलास ताङ तिमोथी ताङ ङे ख्यिराङला ख्याप्टाक क्यावु कोन्छ्योककी सेवु येशू ख्रीष्ट साङ पर्साला “यिन”, पर्साला “मिन” सिनी ताम्ङे ङ्यी कितुप मिन। यिने खो ति नरी “यिन” सिरुप तिराङ वे। 20 कोन्छ्योककी थाक्छ्येन नङ्गुप सुङतिवा तेरी ख्रीष्टकी ओङला च्युङ्गिवी। तुक क्यानी कोन्छ्योककी मोवाकी थोक्ला ख्रीष्ट नेमा दाक्पी “आमिन” सिनी सिवी।* १:२० आमिनकी तेन्दोक ति “वुतुङ के यिन” सिनी सिक्यावु यिन। 21 कोन्छ्योककी राङ ङ्यिराङ ताङ ख्यिराङला ख्रीष्टकी मुला तम्जी रम्बु जो नङ वे। तमा खोकी राङ दाक्पुला पेनी 22 दाक्पुला खोरे ति यिन सिनी त ग्यम वे। तमा दाक्पुला थाक्छ्येतुपकी थोक्ला दाक्पी सेमला खोकी थु चाङ्मा नङ्नी वे।
23 ङे सेम हाक्कोवु कोन्छ्योक पङ्बु वे। ङे ख्यिराङला वोरु तेन्नी ख्यिराङला कले मेख्येल्शी सिनी राङ ङ कोरिन्थला माङुवु यिन। 24 ङ्यिरा ख्यिराङला चुक क्यानी तेपा कि गोकिवी सिनी ओङ्ज्येन कितुपला कार क्यावु मिन, यिने ख्यिराङला गा लोङ्गुपला राङ ङ्यिराङ ख्यिरा मुला लाका कितिनो। च्यिलासिसिन ख्यिराङ याङ येशूला तेपा रम्बु वे।