1 तुक क्‍यानी ङे ख्‍यिराङला वोरु तेन्‍नी ख्‍यिरा सेम मेलोक्‍पा मोडोशी सिनी राङ ङ ख्‍यिरा ते येलुङ मेङ्‍गुप तेन्‍तेन क्‍यायी। 2 च्‍यिलासिसिन ङे ख्‍यिराङला सेम्‍दुक लाङ्‍सिन ती ङे सेम्‍दुक लङ्‍गुप मी तीकी मिसिन यम्‍बा सी ङला गा लोङ थुप्‍किवी रो? 3 गोमाला ङे ख्‍यिराङला ती यिकी टिवु ति ङ ख्‍यिरा ते वुङ्‍गुप पेला ङला गा लोङ्‍गुप मीतिवी राङ ङला सेम्‍दुक मोलोङ्‍शी सिनी यिन। च्‍यिलासिसिन ङला सेम गा लङ्‍गुप ति ख्‍यिराङ तेरीला सेम गा लङ्‍गुप यिन सिरुप ति ङला तेन्‍तेन वे। 4 ङे छासे दुक्‍पा क्‍यानी सेमला दुङल खुरिन ताङ मिकला मिक्‍च्‍युर तोङ्‍यिन सिरा ख्‍यिरा थोक्‍ला ती यिकी ति टियिन। ती ति ख्‍यिराङला सेम्‍दुक लोङ्‍गुपला टिवु मिन, यिने ख्‍यिराङला ङे छासे ङ्‍यिङ्‍ज्‍ये क्‍यावु ति हाक्‍कोशी सिनी टिवु यिन।

5 त येलुङ मी ललाइकी यम्‍बाला सेम्‍दुक लङ्‍सिन ती सेम्‍दुक लङ्‍गुप ति ङे थोक्‍ला बङी सेम्‍दुक लङ्‍गुप मिन, यिने ख्‍यिरा पर्ला मी ललाइतिवाला साङ सेम्‍दुक लङ्‍गुप यिन। दी ताम्‍ङे ति ख्‍यिराङला कोक्‍पु मोजोवुला ङे चेयी तिराङ सिक्‍यावु यिन। 6 ख्‍यिरा पर्ला मी माङ्‍शोक नेसुर तुका मीला याङ चुका परकी छ्‍येर्पा कल्‍सिनाङ ग्‍यावा यिन। 7 त याङ ख्‍यिरा तीला माफ बिन्‍नी टोङ्‍गु तेर गोकिवी। मिसियाङ ती मी ति छासे सेम्‍दुक लानी तेपा कितुप साङ क्‍युर्नी ज्‍योक थुप्‍किवी। 8 तुक क्‍यानी ख्‍यिरा तीला छासे क्‍यानी ङ्‍यिङ्‍ज्‍ये कितुप ति छ्‍या तेन सिनी ङ ख्‍यिराङला ठाकुरे सिरिन। 9 ङे सिक्‍यावु ति ङ्‍येन्‍गिवे मेङ्‍येन्‍वे ल्‍हापला ताङ ख्‍यिराङ खला ङ्‍येमु वोतुप मेतुप हाक्‍कोवुला राङ ङे ती यिकी ति ख्‍यिराङला टिवु यिनो। 10 ख्‍यिरा सुला माफ तेर्किवे, ङ साङ तीला माफ तेरिनो। दोजो ङे ललाइला काङ रे च्‍यिक रे ताम्‍ङेला माफ बिन्‍सिन ती ति ख्रीष्‍टकी थोङ्‍दाङला ख्‍यिरा थोक्‍ला ङे माफ बिन्‍दुप यिन। 11 तुक क्‍यावु तेन्‍दोक ति शैतानकी दाक्‍पुला च्‍यु छोल मुथुप्‍शी सिनी यिन। च्‍यिलासिसिन तीकी खोनक्‍पु वोतुप च्‍युतिवा दाक्‍पुला तेरी छ्‍या वे।

12 ङ ख्रीष्‍टकी कोर्ला लेन ल्‍यामु ख्‍याप्‍टाक कितुपला त्रोआसला वुङ्‍गुप पेला चोवोकी ङला खोकी थोक्‍ला शब्‍ज्‍यी कितुप लाम पेन नाङ्‍सुङ। 13 यिने ङे मुला लाका कितुप नुप तीतसला ते माठेसिमा ङला लोदिमु माच्‍युङ। तुक क्‍यानी ते वोतुप मीतिवी मु नेसुर क्‍येनी माकेडोनियाला गलिन।

14 यिने कोन्‍छ्‍योकला थुचिछे, च्‍यिलासिसिन खोकी ङ्‍यिराङला शैतानकी खला ओङ्‍ज्‍येन कितुपला नरी ख्रीष्‍ट नेसुर गोमा किवी। तमा खोकी ख्रीष्‍टकी कोर्ला वोतुप रिक्‍पा ति छो ज्‍यीला फेल ज्‍यितुपला ङ्‍यिराङला दाल्‍जा किवी। ती रिक्‍पा ति टी जङ्‍बु खाप यिन। 15 च्‍यिलासिसिन ङ्‍यिराङ याङ तेपा क्‍यानी दिक्‍पा ने थरुपतिवा ताङ तेपा माक्‍यानी ना डोपतिवा तेरीकी पर्ला कोन्‍छ्‍योकला पुलुप ख्रीष्‍टकी टी जङ्‍बु दोके यिन। 16 ती टी जङ्‍बु ति ना डोपतिवी थोक्‍ला नरीकी नरी शेप तेन्‍दोक यिन, दिक्‍पा ने थरुपतिवी थोक्‍ला मिजी थोपुप तेन्‍दोक यिन। तमा तुका लाका ग्‍येर्पु कितुप ति सु वे रो? 17 मी यम्‍बी दोके ङ्‍यिरा ति कोन्‍छ्‍योककी सुङला ख्‍येमु वोतुप च्‍यालक छोङ कितुप मी दोके मिन। बोरु ङ्‍यिराङ याङ कोन्‍छ्‍योककी तङ्‍गुप तप्‍की खोकी थोङ्‍दाङला ख्रीष्‍टकी थोक्‍ला ताम्‍ङे टेङ्‍बु तिराङ सिवी।