6
1 ङ्यिरा कोन्छ्योककी थोक्ला मुला राङ लाका क्यावु तप्की ख्यिराङला ठाकुरे सिरिन, खोकी ख्यिराङला नङ्गुप कटिन ति तेर्मेला डो माज्यी। 2 खोकी सुङला
“ख्युरुङला ङे कटिन गोवु पेला ख्योरो ङला रेन्दुप ति ङे थोसुङ।
तमा थरुप तुजेला ङे ख्युरुङला दाल्जा किटे क्यायी।”*६:२ यशैया ४९:८
सिनी सुङ्सुङ।
ल्होसा, ती कोन्छ्योककी कटिन ङ्येतुप तुजे ताङ दिक्पा ने थरुप ङ्यिमा ति तन्दा राङ यिनो।
पावलकी छेटाङकी कोर्ला
3 ङ्यिरा क्यावु लाकाला सी साङ क्येन माग्यक्शी सिनी ङ्यिराङ सुला साङ येशूला तेपा कितुप थोक्ला नर्तुक ग्यकुप लाका मिकिवी। 4 बोरु चुका लाका कितुप पेला साङ ङ्यिराङ ति कोन्छ्योकला शब्ज्यी कितुप मीतिवा यिन्दुप छ्या देन्दुपला छेटाङला ख्येल्सिनाङ, दुक्पाला ख्येल्सिनाङ, कले ख्येल्सिनाङ, 5 मीतिवी दुसिनाङ, चोन्खाङला उप्सिनाङ, मीतिवा ङ्यिरा तेन्दोकला लानी हराङ हुरुङ क्यासिनाङ, छासे लाका हुर्ताक कि गोसिनाङ, ङ्यिलोकुप माङ्येसिनाङ, ल्होतुङ्बा दे गोसिनाङ, 6 ङ्यिराङ टेङ्बु ताङ कोन्छ्योककी नङ्गुप रिक्पा ताङ हम क्या देतुप ताङ च्यम्बा ताङ कोन्छ्योककी थु चाङ्मा नेमा वावु ओङ ताङ ङ्यिङ्ज्ये टेङ्बु ताङ 7 सुङ टेङ्बु तेरुप ताङ कोन्छ्योककी नङ्गुप ङारला ती लाका तेरी किवी। सु ताङ मुला थमु ग्यक गोसिनाङ ङ्यिरा टेङ्बु वोतुप लक्च्ये*६:७ ती टेङ्बु वोतुप लक्च्येकी तेन्दोक ति ङ्यिरा टेङ्बु वोतुप मिजी यिन। थ्वोनी 8 मीतिवी ङ्यिराङला ताङ्देन क्यासिनाङ माक्यासिनाङ, ताम्ङे ल्यामु क्यासिनाङ मेलोक्पा क्यासिनाङ ङ्यिराङ ती लाका तेरी किवी। ङ्यिराङ ति मीला केन्दुप मी दोके च्युङ्गिवी, यिन्सिनाङ ङ्यिराङ टेङ्बु वे। 9 ङ्यिराङ ति ङो मेशेवु दोके वोसिनाङ मी तेरीकी ङो शेवु च्युङ वे। शितु छ्येनी वोसिनाङ सेन्बु लुनी वे। छ्येर्पा खुर्सिनाङ माशी वे। 10 सेम्दुक लासिनाङ नरी गा लानी वे। पेराङ्बु वोसिनाङ मी बङीला छ्युक्पु जो थुपुप वे। काङ मेतुप दोके वोसिनाङ तेरी वोतुप दोके वे।
11 कोरिन्थला वोतुप अच्युनुपतिवा, ङ्यिरा ख्यिराङला दी ताम्ङे ति वुतुङ के टेङ्बु सिक्यावु यिन। ङ्यिराङ ख्यिराङला सेमगी दिङ नेज्युनी ङ्यिङ्ज्ये किवी। 12 ङ्यिरा ख्यिराङला ङ्यिङ्ज्ये कितुप क्युर्नी माज्याक वे, बोरु ख्यिरा के ङ्यिराङला ङ्यिङ्ज्ये अला मिकिनोक। 13 त ङ ख्यिराङला ङरा पेजातिवाला सिक्यावु दोके क्यानी सिरिन, ङ्यिरा ख्यिराङला ङ्यिङ्ज्ये क्यावु दोके ख्यिरा साङ ङ्यिराङला ङ्यिङ्ज्ये की।
तेपा मिकिवुतिवी दला माशुक
14 येशूला तेपा मिकिवु मीतिवी दला शुनी तिवी मुला राङ लाका माकी। कोन्छ्योककी थोङ्दाङला टेङ्बु वोतुपतिवा ताङ दिक्पाकी ओङला युकुप मीतिवा चुक क्यानी तम्जी ल्यामु वुङ थुप्किवी रो? याङ्ना नक्तोमीकी मुला ठछ्येली ति चुक क्यानी डिक्जोम किवी रो? 15 काङ ख्रीष्ट ताङ शैतान†६:१५ बेलिआल साङ थिन थुप्किवी रो? याङ्ना तेपा कितुपतिवा ताङ तेपा मिकिवुतिवा च्यिक्पा राङ यिन रो? 16 कोन्छ्योककी थु चाङ्मा ज्युवु ल्हङाङ ताङ कुतिवी ति काङ तम्जी वे रो? च्यिलासिसिन दाक्पु ति ङोसु वोतुप कोन्छ्योककी थु चाङ्मा ज्युवु ल्हङाङ यिन। ती तप्की कोन्छ्योककी सुङला साङ दुक सिनी टि वे,
“ङ तिवी मिजीला देतिन, तमा तिवी पर्ला फार छुर कितिन।
तमा ङ तिवी कोन्छ्योक यिन,
तिवा ति ङे मीतिवा यिन।”*६:१६ लेवी २६:१२
17 येलुङ चोवो कोन्छ्योककी सुङ्गिवी,
“ती तप्की ती दुक्टा कितुप मीतिवा नेसुर थेन्नी शोक।
तमा तिवा नेसुर कुतुक दे।
मेचेङ्गा वोतुप च्यालकतिवा काङ साङ थो मातोङ।
तुक क्यासिन ङ ख्यिराङला सेमला लङ्यिन।”*६:१७ यशैया ५२:११
18 “तमा ङ ख्यिरा पपा यिनो,
ख्यिराङ ति ङे पुज्युङपुमतिवा यिनो।
सिनी चोछ्ये वोतुप चोवो कोन्छ्योककी सुङ्गिवी।”*६:१८ २ शमूएल ७:१४