7
1 तुक क्यानी ङे ङ्यिङ्ज्येवु अच्युनुपतिवा, कोन्छ्योककी दाक्पुला ती ताम्ङेतिवा थाक्छ्येन नङ्गुप तप्की दाक्पी जु ताङ सेम मेचेङ्गा जोप तेरी परकी ताम्ङे मेटेङ्बु नेसुर कुतुक देतुप। तमा कोन्छ्योकला ताङ्देन क्यानी वुतुङ के चाङ्मा वोतुप मिजी क्योङ्गुप।
पावलकी सेम गा क्यावु
2 ख्यिरा ङ्यिराङला ङ्यिङ्ज्ये क्यानी सेमला लो। ङ्यिरा सुला साङ मेलोवा माक्या वे, तमा सुला साङ दुक्पा माबिन वे। ङ्यिरा सी लो नेसुर साङ ख्येप्साङ माला वे। 3 ङे ख्यिराङला क्येन तेरुपला दी ताम्ङे सिक्यावु मिन। गोमाला साङ ङे सिक्यायी, ङ्यिरा सेमला ख्यिराङ राङ वे। ङ्यिराङ शिसिनाङ सेन्बु वोसिनाङ ख्यिरा मुला नरी तम्जी लुकिवी। 4 ङ ख्यिराङला छासे लो तेन्गिवी। ङ ख्यिरा थोक्ला छासे तेके कितिन। ख्यिराङ नेसुर ङला मङ टोङ्गु ङ्येन वे। ङला चो छेटाङ ख्येल्सिनाङ सेमला छासे गा लानी वे।
5 ङ्यिराङ माकेडोनियाला लेपुप पेला ङ्यिराङला उ तोङ्गुप साङ माङ्ये, यिने छो ज्यिकर नेसुर छेटाङ ख्येल्नी लेसुङ। तमा पङगी मीतिवी ङ्यिराङला नरी थमु ग्यकुप ताङ सेमला ति ङ्यिराङला ज्यिवा लासुङ। 6 यिन्सिनाङ तीतस ङ्यिरा ते वासिमा यिछ्येतुप मीतिवाला टोङ्गु नङ्गुप कोन्छ्योककी ङ्यिराङला टोङ्गु नाङ्सुङ। 7 तीतस वासिमा तिराङ मिन, तीकी ख्यिरा नेसुर ङ्येतुप टोङ्गुकी कोर्ला लेन खुन वासिमा ङला टोङ्गु ङ्येसुङ। ख्यिरा ङला छासे ठेतुप नो क्यावु ताङ ख्यिरा गोमाला ङला मेलोवा क्यावु यिन सिनी ङे थोक्ला पप क्यावु ताङ छासे क्यानी ङे छ्योला लावु ति तीकी तेरी ङला सिक्यासुङ। तुक क्यानी ङला मङ सेमला गा लासुङ।
8 ङे ख्यिराङला यिकी टिन तङ्नी ख्यिराङला सेम्दुक लासिनाङ तीकी कोर्ला ङे लाका मेलोवा क्यायिन सिनी नासाम मोतोङ, च्यिलासिसिन ती यिकीकी चेयी पर सेक तिराङ ख्यिराङला सेम ना च्यिनी वे सिरुप ति ङला छ्या वे। 9 त याङ ङ गा लावे, ती ति ख्यिराङला पप लानोक सिनी मिन, यिने ती पपकी राङ ख्यिराङला सेम ग्युरुप जोवु तप्की यिन। ख्यिरा कोन्छ्योककी नोवा काङ यिन सिनी नासाम तङ्नी रङगी क्यावु लाकाला पप क्यावु तप्की ङ्यिरा नेसुर ख्यिराङला काङ साङ मेलोवा माच्युङ्सुङ। 10 च्यिलासिसिन कोन्छ्योकला नासाम तङ्नी पप क्यानी सेम ग्युर्सिन दिक्पा ने थर्वा ङ्येकिवी। तुक क्यासिन ङे लाका मेलोवा क्यायिन सिनी नासाम तोङ मोगोवी। यिने जम्बुलिङकी थोक्ला नासाम तङ्नी पप कितुप ति शेप ते क्योल्गिवी। 11 तुक क्यानी ल्हो ताङ, कोन्छ्योककी थोक्ला पप क्यासिमा ख्यिराङला काङ च्युङ्सुङ, ती ति नासाम तोङ। ख्यिराङ काङ लाका क्यासिनाङ छासे ङ्यम्ले क्यानी किवी, खुरुङ क्येन मेतुप च्युङ्गुपला ख्यिराङ टेमु किवी, तमा मेटेङ्बुकी थोक्ला चो ङ्यिर्मु किवी, काङ कितुप चुक कितुप सिनी ज्यिवा किवी, ङला ठेतुपला छासे नो किवी, चुका ङाडेङ नोक, तमा ख्यिरा पर्ला दिक्पा कितुप मीला पर्च्या फोक्शी सिनी चो नोकिवी। ती तेरी ताम्ङे नेसुर ख्यिराङ ति दिक्पा मेतुप यिन सिरुप छ्या तेन्सुङ। 12 तुक क्यानी ङे ती यिकी टिवु ति लाका मेलोवा कितुप मी थोक्ला मिन, याङ्ना मी यम्बी खुरुङला लाका मेलोवा क्यानी सेम्दुक वोतुप मी थोक्ला साङ मिन। यिने कोन्छ्योककी थोङ्दाङला ङ्यिराङला ख्यिरा चो टेन्दा किनोक सिरुप ति छ्या देन्दुपला टिवु यिन। 13 ती तेरी हाक्कोसिमा ङ्यिराङला छासे टोङ्गु ङ्येसुङ।
तोजो तिराङ मिन, ख्यिराङ तेरीकी तीतसला गासो शुनी तीकी सेमला लोदिमु जोवु तप्की ङ्यिराङला मङ छासे गा लाङ्सुङ। 14 तीतस ख्यिरा चाला डोप सिनाङ गोमाला ङे तीला ख्यिरा थोक्ला छासे तेके क्यायिन। तमा ख्यिरा ङला यिछ्येता माजो वे। ङ्यिरा ख्यिराङला नरी ताम्ङे टेङ्बु लापिन। तुक क्यानी तीतसकी मुला ङ्यिरा ख्यिरा थोक्ला तेके क्यावु ति टेङ्बु वोतुप हाक्कोसुङ। 15 ख्यिराङ तेरीकी तीतसकी खला ङ्येन्दुप ताङ तीला ज्यिवा खुरुप ताङ ताङ्देन क्यानी गासो शुवु ति नासाम शर्नी तीतसकी ख्यिराङला मङ छासे ङ्यिङ्ज्ये क्यासुङ। 16 तमा ङे ख्यिराङला छासे लो तेन्दुप तप्की ङला गा लानी वे।