8
पेराङ्बुतिवाला दाल्जा कितुपकी कोर्ला
1 अच्युनुपतिवा, माकेडोनिया लुङ्बाला वोतुप चर्चतिवाला कोन्छ्योककी कटिन नङ्गुप कोर्ला ङ्यिराङ ख्यिराङला सिरिन। 2 तिवा चो खोक्पा ल्हाप दुक्पातिवाला ख्येल्सिनाङ छासे सेम गा कितुप ताङ माङ्शोक मीतिवा पेराङ्बु वोसिनाङ दुक्पाला ख्येलुप मीतिवाला सेम्बा सेमगी दाल्जा किटे क्यासुङ। 3 ङ ख्यिराङला पङ्बु तेरिन, तिवी खोप्रे तेर थुपुप सिनाङ मङ ल्हक्पा सेम्बा सेमगी दाल्जा किटे क्यासुङ। 4 तोजो तिराङ मिन, यरूशलेमला वोतुप कोन्छ्योककी चाङ्मा वोतुप मीतिवी थोक्ला टङ्गा बुल्वा कल ताङ्नी मुला राङ दाल्जा कितुप ङ्येशी सिनी तिवी ङ्यिराङला गोङ्बा शुसुङ। 5 तमा तिवी ङ्यिरा नासाम तङ्गुप सिनाङ मङ ल्हक्पा लाका क्यासुङ। तिवी गोमाला खोप्रे मिजी ति कोन्छ्योककी थोक्ला पुल्सुङ, तमा ती ज्युक्ला कोन्छ्योककी नोवाला वोतुप दोके क्यानी ङ्यिरा थोक्ला साङ खोप्रे मिजी ति चेक तेसुङ। 6 तुक क्यानी तीतसकी गोमा नेज्युनी सेम्बा सेमगी दाल्जा कितुप लाका ति गो चुवु तप्की ती कटिनकी लाका ति ख्यिरा पर्ला सिन्दा कितुपला दाल्जा किटे किशी सिनी ङ्यिरा तीला टोङ्गु बिनिन। 7 ख्यिरा ती तेरी ताम्ङेला मङ ल्यामु क्या वे। ख्यिराङ तेपा कितुप ताङ येन्देन तेरुप ताङ रिक्पा वोतुप ताङ मी यम्बाला दाल्जा कितुपला ङ्यम्ले कितुप ताङ ङ्यिराङला ङ्यिङ्ज्ये कितुपला साङ तुक राङ क्यानी लाका ल्यामु क्या वे। तुक क्यानी ख्यिरा सेम्बा सेमगी दाल्जा कितुप लाकाला साङ मङ ल्यामु किशी सिरुप ति ङ्यिरा नोवा वे।
8 दी ताम्ङे ति ङे ख्यिराङला क तेरुपला सिक्यावु मिन। यिने मी यम्बी सेम्बा सेमगी दाल्जा कितुप लाकाला चो ङ्यम्ले क्यासुङ ती ति ख्यिराङला सिक्यानी ख्यिरा ङ्यिङ्ज्ये क्यावु ति टेङ्बु यिनोक मिनोक हाक्कोवुला सिक्यावु यिन। 9 दाक्पी चोवो येशू ख्रीष्टकी कटिन ति ख्यिराङला छ्या राङ वे। खो छ्युक्पु वे, यिन्सिनाङ ख्यिरा थोक्ला खो पेराङ्बु दोके च्युङ्सुङ। तीकी तेन्दोक ति खो पेराङ्बु च्युङ्गुप नेसुर ख्यिराङला छ्युक्पु च्युङ्शी सिनी यिन।
10 तमा दीकी कोर्ला ङ ख्यिराङला टोङ्गु तेरिन। लो खोर्मा यी गोमाला ख्यिरा सेम्बा सेमगी दाल्जा कितुप लाका ति गो चुसुङ। यिन्सिनाङ ती तेरी मासिन्नी सिन्दा कितुप ति ख्यिरा नो क्या वे। 11 त याङ ख्यिरा नो क्यावु लाका ति तेरी सिन्दा किसा। ख्यिरा तेर थुपा सेक बिन्नी ती लाका क्या सिन्सिमा गोमाला गो जुवु पेला ख्यिरा मुला वोतुप ङ्यिङ्ज्ये ति छ्या तेन। 12 ख्यिराङला तेरुप सेम वोसिन ख्यिरा लोला चो नोके, ती बिन्दुप ति कोन्छ्योक गा किवी, यिने ख्यिरा लोला मेतुप ति खोकी मोछोल्वी।
13 दी ताम्ङे ति ख्यिराङला कले वुङ्शी, तमा यम्बाला ति जोल्हमु वुङ्शी सिनी ङे सिक्यावु मिन। यिने तेरीला च्यिक्पा राङ वुङ्शी सिनी सिक्यावु यिन। 14 तसाम ख्यिरा मुला बङी वोतुप पेला ती नेसुर मेतुपतिवाला तेरुप ति छासे ल्यामु यिन। तुक क्यासिन ज्युक्ला तिवाला बङी वोतुप पेला ख्यिराङला गोवु ति तिवी दाल्जा किवी। तमा तेरीला च्यिक्पा राङ च्युङ्गिवी। 15 कोन्छ्योककी सुङला साङ “बङी रुकुपतिवी मुला अला बङी मुलुवी, तमा ङ्युङ्मु रुकुपतिवाला साङ अला ङ्युङ्मु मोडोयी।” सिनी टि वे।* ८:१५ प्रस्थान १६:१८
तीतस ताङ तीकी दाल्जातिवा कोरिन्थला तङ्गुप
16 कोन्छ्योककी तीतसकी सेमला ङे दोके क्यानी ख्यिरा थोक्ला ल्हटे कितुप सेम नाङ्सुङ। तुक क्यानी ङ खोला थुचिछे बुलिन। 17 च्यिलासिसिन ख्यिरा ते ग्युक सिनी ङ्यिरा गोङ्बा शुवु ताम्ङेला तीकी ङ्येन्दुप तिराङ मिन, खुरुङ साङ छासे गा क्यानी खोरो नोवाकी राङ ख्यिरा ते गलुप यिनो। 18 तीकी मुला राङ नुप मिरा च्यिक साङ तोङ्यिन वोतो। ती ति लेन ल्यामु ख्याप्टाक कितुपला तेरी चर्चतिवी पर्ला छासे मिङ फेलुप मी यिनो। 19 तोजो तिराङ मिन, दुवु बुल्वा खुर्नी यरूशलेमला डोप पेला ङ्यिरा मुला राङ युक डोप सिनी ती नुप तीला चर्चतिवी पेतुप यिनो। ती बुल्वा खुरुप लाका ति चोवोला मोवा कितुप ताङ ङ्यिरा यम्बाला दाल्जा कितुप छासे नोवा वोतुप ति छ्या देन्दुपला यिन। 20 मी सेमगी दिङ नेज्युनी पुलुप दी बुल्वा ति दुतुप ताङ गोतुपला गोमा कितुप कोर्ला ङ्यिराङला सी साङ क्येन माग्यक्शी सिनी ङ्यिराङ च्याङ्से देनी वे। 21 च्यिलासिसिन ङ्यिराङ चोवोकी थोङ्दाङला तिराङ मिन, मी थोङ्दाङला साङ चुका ति टेङ्बु नोके ती राङ कितुपला ङ्यम्ले किवी।
22 तीतसकी मुला यम्बा नुप मिरा च्यिक साङ ङ्यिरा ख्यिरा ते तोङ्यिन वोतो। तीला ङ्यिरा थेङ्मा अलायी सेक तिन्नी ल्हासिमा छासे ङर्मा क्यानी दाल्जा कितुप थोङ्सुङ। तीकी ख्यिराङला छासे लो तेन्दुप तप्की मङ ङार छ्येवु गल वे। 23 तीतस ति ख्यिरा थोक्ला ङे मुला राङ लाका कितुप दाल्जा यिन। यम्बा नुपतिवा ति चर्चतिवी शब्ज्यी कितुपला पेतुप मीतिवा यिन। तिवा ख्रीष्टकी थोङ्दाङला ताङ्देन वोतुप मीतिवा यिन। 24 तुक क्यानी ख्यिरा तिवाला ङ्यिङ्ज्ये क्यानी पङ्बु छ्या तेन। तुक क्यासिन ङ्यिरा च्यिला ख्यिरा कोर्ला तेके क्यानोक सिरुप ति चर्चतिवी साङ हाक्को थुप्शी।