1 ङे तेके क्‍यावु ताम्‍ङे ति ख्‍येप्‍साङ मेसिनाङ, ङला चोवो नेमा थोपुप ज्‍यल्‍का ताङ खोकी हाक्‍को च्‍यितुप ताम्‍ङेकी कोर्ला ङ सिरिन। 2 येशू ख्रीष्‍टला तेपा कितुप मी मिरा च्‍यिकला ङे ङो शेकिवी। ती ति लो च्‍युप्‍ज्‍यी गोमाला तेरी सिनाङ येर देवाच्‍येन सेक तेक्‍नी गाल्‍सुङ। यिने ती ति जु ताङ डेके तेक्‍नी गलुप यिन्‍दे की, जु मेता क्‍यानी गलुप यिन्‍दे ङला छ्‍या मे। कोन्‍छ्‍योकला तिराङ छ्‍या वे। 3 ङ येलुङ सिरिन, ती मीला ङे ङो शेकिवी। यिने ती ति वुतुङ के यिन्‍दे की, ज्‍यल्‍का यिन्‍दे ङला छ्‍या मे। कोन्‍छ्‍योकला तिराङ छ्‍या वे। 4 ती मी ति कोन्‍छ्‍योककी ग्‍येल्‍खापकी दुम्‍डोकला तेक्‍नी गल्‍सिमा तीकी सि मुथुपु ताम्‍ङेतिवा थोनोक, ती ताम्‍ङे ति मी ख नेमा सिरुप साङ मेवी। 5 ङ ती मी तीकी कोर्ला तेके क्‍यानी सि थुप्‍किवी, यिने ङरा थोक्‍ला ति ङार मेतुप कोर्ला मिसिन ज्‍येन ताम्‍ङेला तेके मिकी। 6 ङे तेके क्‍यासिनाङ ङ ति अम्‍बारङ्‍शिङ कितुप मी दोके मोडोवी, च्‍यिलासिसिन ङ ति टेङ्‍बु वोतुप ताम्‍ङे तिराङ सिरिन। यिने मीतिवी ङे कोर्ला थोङ्‍गुप याङ्‍ना थोवु सिनाङ ल्‍हक्‍पा ति सी साङ नासाम मोतोङ्‍शी सिनी ङ तेके मिकी।

7 यिने ङे छासे हलेवु ताम्‍ङे थोङ्‍सुङ सिनी ङराङ यिन सिरुप नेसुर ग्‍येकुपला कोन्‍छ्‍योककी ङे जुला छेर्माङ सुकुप दोके छेटाङला ख्‍येल च्‍यिसुङ। ती छेटाङ ति शैतानकी लेन क्‍योलुप तीकी ख्‍येल च्‍यितुप यिन। तीकी ङला छासे सुक कि च्‍यिनी ङराङ यिन सिरुप नेसुर क्‍येक्‍सुङ। 8 ती छेटाङ ति ङे जु नेसुर दोनी नाङ सिनी चोवोला ङे थेङ्‍मा सुम सेक गोङ्‍बा शुयी। 9 यिने चोवोकी ङला दुक सुङ्‍सुङ, “ङे कटिन ति ख्‍युरुङला गोवु सिनाङ मङ ल्‍हक्‍पा वे। च्‍यिलासिसिन ङे ङार ति ङार मेतुपतिवी खला राङ तेरी छेकिवी।” तुक क्‍यानी ख्रीष्‍टकी ओङ ति ङे मिजीला लुशी सिनी ङ छासे गा क्‍यानी ङार मेतुपकी थोक्‍ला तेके किवी। 10 तुक क्‍यानी ङ ति ख्रीष्‍टकी थोक्‍ला ङार मेतुप पेला ताङ मी मारे तोङ्‍गुप पेला ताङ कलेला ख्‍येलुप पेला ताङ छेटाङला ख्‍येलुप पेला ताङ दुङलला ख्‍येलुप पेला लोदिमु क्‍यानी दे थुप्‍किवी। च्‍यिलासिसिन ङ ङार मेतुप पेला ङार छ्‍येवु च्‍युङ वे।

11 ख्‍यिरा राङ ङला कार क्‍यानी तुका अम्‍बारङ्‍शिङ कितुप जोवु यिन। ख्‍यिरा ङला ताङ्‍देन कि गोवु ति यिन्‍जा, च्‍यिलासिसिन ङ ति काङ मिन्‍सिनाङ खोप्‍राङ ति चोछ्‍येवु लोमा छ्‍ये यिन सिरुप मीतिवा सिनाङ चेयी साङ छ्‍युङा मे। 12 ङ वुतुङ के लोमा छ्‍ये यिन सिरुप ति छ्‍या देन्‍दुपला ख्‍यिरा पर्ला छासे डेकला देनी हलेवु ततिवा ताङ हलेवु लाकातिवा ताङ ङार छ्‍येवु लाकातिवा क्‍यावु यिन। 13 ख्‍यिराङला ङे थोक्‍ला डोसुम नाङ सिनी ताम्‍ङे माक्‍यावु ति मिसिन ङे यम्‍बा चर्चकी मीतिवाला सिनाङ ख्‍यिराङला काङ मेलोक्‍पा क्‍यासुङ रो? तुकै यिन्‍सिन तीकी कोर्ला ङे ख्‍यिराङला माफ लोङ गोकिवी।

14 त येलुङ ङ थेङ्‍मा सुमला ख्‍यिरा ते वुङ्‍गुप सिनी टडिक क्‍यान वे। ङ वासिनाङ ख्‍यिराङला ति कले ख्‍येल मिज्‍यी। च्‍यिलासिसिन ङ ख्‍यिरा ते वावु ति ख्‍यिरा टोङ्‍बा थोपुपला वावु मिन, ख्यिरा थोक्‍ला वावु यिन। पपाआमी थोक्‍ला पुज्‍युङपुमतिवी टोङ्‍बा मोशोम्‍बी, यिने पुज्‍युङपुमतिवी थोक्‍ला के पपाआमी टोङ्‍बा शोम गोकिवी। 15 ङ ख्‍यिरा थोक्‍ला छासे गा क्‍यानी ङे मुला वोतुप तेरी डोसुम तोङ्‍गुप ताङ ङे मिजी साङ तेरिन। ङे ख्‍यिराङला तुका मङ्‍मु ङ्‍यिङ्‍ज्‍ये क्‍यासिनाङ ख्‍यिरा ङला ङ्‍यिङ्‍ज्‍ये मिकिवी? 16 ङे ख्‍यिराङला कले ख्‍येल माच्‍यिवु ति ख्‍यिराङला साङ छ्‍या वे। यिने ललाइ मीतिवी ङ ति छासे च्‍यङ्‍बु वे, तमा ङे ख्‍यिराङला जिनोक जोनी लुकितो सिनी सिवी। 17 काङ ङे ख्‍यिरा ते तङ्‍गुप मीतिवी पर्ला ललाइ मीतिवी ख्‍यिरा लो नेसुर ख्‍येप्‍साङ तेन्‍सुङ रो? 18 तीतसला ख्‍यिरा ते ग्‍युक सिनी ङे सिक्‍यायी। तमा तीकी मुला यम्‍बा नुपला साङ तङ्‍यिन। काङ तीतसकी ख्‍यिरा लो नेसुर काङ रे च्‍यिक रे ख्‍येप्‍साङ लासुङ रो? ङ ताङ तीकी सेम च्‍यिक्‍पा राङ च्‍युङ्‍नी मुला राङ लाका क्‍यावु मिन रो?

19 काङ ख्‍यिरा ङ्‍यिराङला ति खुरुङ र्‍होकुपला तिराङ दी ताम्‍ङे सिक्‍यावु यिन्‍दे सिनी नोकिवी? मिन, ङ्‍यिराङ येशू ख्रीष्‍टला तेपा क्‍यावु मी दोके च्‍युङ्‍नी कोन्‍छ्‍योककी थोङ्‍दाङला दी ताम्‍ङे सिरिन। ङे ङ्‍यिङ्‍ज्‍येवु अच्‍युनुपतिवा, दी तेरी ताम्‍ङेतिवा ख्‍यिराङला तेपा रम्‍बु जोपला ङ्‍यिरा सिक्‍यावु यिन। 20 ङ ख्‍यिरा ते वुङ्‍गुप पेला ख्‍यिराङ ङे नोवाला वोतुप दोके ठेकिताङ मेठेताङ, ङ साङ ख्‍यिरा नोवाला वोतुप दोके ठेकिताङ मेठेताङ सिनी ङला ज्‍यिवा लानी वे। तमा ख्‍यिरा पर्ला खाँदा कितुप ताङ ठतोक कितुप ताङ ङ्‍यिर्मु कितुप ताङ रङगी थोक्‍ला तिराङ नासाम तोङ्‍गुप ताङ मी यम्‍बाला ताम्‍ङे मेलोवा कितुप ताङ मीला मेतुप ताङ छ्‍येजु कितुप ताङ खुरुङ राङ सेम नोजु क्‍यानी युकुप गल वे सिनी ङला छासे ज्‍यिवा लानी वे। 21 ङ येलुङ ख्‍यिरा ते वुङ्‍गुप पेला कोन्‍छ्‍योककी ख्‍यिरा दोङ्‍ला ङला मो बेप्‍किते यिन्‍दे सिनी ङला ज्‍यिवा लानी वे। तमा गोमाला लाका मेटेङ्‍बु क्‍यावु ताङ शम्‍डेन कितुप ताङ ङोछा लङ्‍गुप लाका क्‍यानी दिक्‍पा कितुप नेसुर सेम मुग्‍युरुपतिवा बङीकी थोक्‍ला ङला छासे पप लानी वे।