1 थेङ्‍मा सुमला ङ ख्‍यिरा ते वुङ्‍यिनो। नासाम तोङा, कोन्‍छ्‍योककी सुङला सुङ्‍गुप दोके “ख्‍यिरा पर्ला वोतुप चुका क्‍येन वोसिनाङ मिरा ङ्‍यी सुम पङ्‍बु ज्‍याक्‍नी तिराङ तेन्‍तेन कि गोकितो।”*१३:१ व्यवस्था १७:६; १९:१५ 2 थेङ्‍मा ङ्‍यीला ङ ख्‍यिरा मुला वोतुप पेला ख्‍यिराङला टोङ्‍गु बिन्‍दुप दोके ङ ख्‍यिरा पर्ला मेसिनाङ ख्‍यिराङला येलुङ छासे क्‍यानी टोङ्‍गु तेरिन, ङ वुङ्‍गुप पेला गोमाला दोके दिक्‍पा कितुपतिवा ताङ यम्‍बा सुला साङ क्‍युर्नी मोज्‍योक। 3 च्‍यिलासिसिन ख्रीष्‍ट ङे मिजी नेमा ताम्‍ङे किवी सिरुप पङ्‍बु ति ख्‍यिरा छोल्‍गितो। खोकी ख्‍यिरा पर्ला ठिम क्‍या नङ्‍गुप पेला खो ङार मेतुप मिन, ङार छ्‍येवु वोतुप ति हाक्‍कोकिवी। 4 खो वुतुङ के जुला वोतुप पेला ङार मेतुप च्‍युङ्‍नी ग्‍यङ्‍शिङ लोला कल्‍नी सेसुङ। यिन्‍सिनाङ कोन्‍छ्‍योककी ओङला खो ङोसु राङ ज्‍यु वे। ती दोके ङ्‍यिराङ साङ खो ताङ मुला वोतुप तप्‍की ङार मेतुप वे, यिने खो शेप ने ङोसु लङ्‍गुप दोके ङ्‍यिराङ कोन्‍छ्‍योककी ओङ नेसुर ख्रीष्‍टकी मुला मिजी क्‍याङ्‍नी ख्‍यिराङला ठिम किवी।

5 ख्‍यिराङ तेपा रम्‍बु वोताङ मे ख्‍यिरा राङ नासाम तोङ, तमा ल्‍यामो क्‍यानी ल्हो। तमा ख्रीष्‍ट ख्‍यिरा मिजीला ज्‍यु वोताङ मे सिरुप ति हाक्‍कोकिवी। ख्रीष्‍ट ख्‍यिरा मिजीला मेसुङ सिसिन ख्‍यिरा तेपा क्‍यावु ति काङ साङ फेन मोथोवु डिवी। 6 वुतुङ के ङ्‍यिराङ ति फेन मोथोवु मागल वे सिरुप ति ख्‍यिरा हाक्‍कोशी सिनी ङला रेवा वे। 7 ख्‍यिराङ काङ साङ लाका मेलोवतिवा मिकिशी सिनी ङ्‍यिराङ कोन्‍छ्‍योकला मोपोर किवी। ङ्‍यिरा मोपोर क्‍यावु ति ङ्‍यिराङ ल्‍यामु वोतुप छ्‍या देन्‍दुपला मिन, यिने ङ्‍यिराङ फेन मोथोवु दोके थोङ्‍सिनाङ ख्‍यिराङ लाका टेङ्‍बु कि थुप्‍शी सिनी ङ्‍यिराङ मोपोर किवी। 8 ङ्‍यिराङ टेङ्‍बुकी तेन्‍दोकला लानी काङ साङ कि मुथुपी, यिने टेङ्‍बुकी थोक्‍ला तिराङ लाका कि थुप्‍किवी। 9 ङ्‍यिराङ ङार मेतुप वोसिनाङ ख्‍यिराङ ति रम्‍बु वोतुप पेला ङ्‍यिराङ छासे गा लङ्‍गिवी। ख्‍यिराङ तेरी येर्के गल्‍नी ल्‍यामु च्‍युङ्‍शी सिनी ङ्‍यिराङ मोपोर किवी। 10 ख्‍यिरा मु नेसुर ङ थाक्‍रिङ्‍बु वोतुप तप्‍की दी यिकी टिकिन वोतो। दीकी तेन्‍दोक ति ङ ख्‍यिरा ते वुङ्‍गुप पेला चोवोकी ङला नङ्‍गुप ओङ्‍ज्‍येन नेसुर ङे ख्‍यिराङला च्‍युरुवु कि मोगोशिता। ती ओङ्‍ज्‍येन ति ख्यिराङला ना तोङ्‍गुपला मिन, तेपा रम्‍बु जोपला यिन।

11 लो तमा, अच्‍युनुपतिवा, त याङ ङ दोजोयी राङ टिकिनो। ख्‍यिराङ येर्के गल्‍नी ल्‍यामु च्‍युङ्‍शिता। ङे सिक्‍यावु ताम्‍ङेला ल्‍यामु क्‍यानी ङ्‍येना। मी यम्‍बी मुला सेम च्‍यिक्‍पा राङ च्युङ्‍नी लोदिमु क्‍यानी देता। दाक्‍पुला ङ्‍यिङ्‍ज्‍ये ताङ लोदिमु नङ्‍गुप कोन्‍छ्‍योक ति ख्‍यिरा मुला ज्‍युकितो। 12 च्‍यिककी च्‍यिकला ङ्‍यिङ्‍ज्‍ये ताङ मुला टसी देलेक सिसा। 13 कोन्‍छ्‍योकला तेपा कितुप तेरी अच्‍युनुपतिवी ख्‍यिराङला टसी देलेक सिनी तङ वोतो। 14 चोवो येशू ख्रीष्‍टकी कटिन ताङ कोन्‍छ्‍योककी ङ्‍यिङ्‍ज्‍ये ताङ खोकी थु चाङ्‍माकी डिक्‍जोम ति ख्‍यिराङ तेरीकी मुला नरी लुशिता।