1 गोमाला इस्राएलकी मीतिवी पर्ला लुङ्‍तेम्‍बा मेटेङ्‍बुतिवा वोतुप दोके ख्‍यिरा पर्ला साङ गेकेन मेटेङ्‍बुतिवा थेन्‍गितो। तिवी ख्‍यिराङला छ्‍याकला ना डोप येन्‍देन मेटेङ्‍बुतिवा लोप्‍किवी, तमा येशू ति दिक्‍पा ने थर्वा नङ्‍गुप चोवो मिन सिनी तिवा खोप्‍राङ ङमु राङ ना डोप लाका कितो। 2 तमा मी बङीकी तिवी लापुप येन्‍देन मेटेङ्‍बु ङ्‍येन्‍नी दुक्‍टा किवी। तीकी जोसालेन्‍सिन मी यम्‍बातिवी साङ कोन्‍छ्‍योककी सुङ टेङ्‍बुला मारे तोङ्‍गिवी। 3 तिवा देर्पाला ख्‍येल्‍नी ख्‍यिराङला ताम्‍ङे जिनोक जोनी ख्‍यिरा नेसुर ख्‍येप्‍साङ लङ्‍गितो, यिने तिवी खुर गोवु छ्‍येर्पाकी कोर्ला गोमाला के तेन्‍तेन क्‍या वे। तुक क्‍यानी तिवा वुतुङ के ना डिवी।

4 देवाच्‍येनकी लेन क्‍योलुप थुतिवी दिक्‍पा क्‍यासिमा कोन्‍छ्‍योककी तिवा चुका तीला साङ माज्‍याक्‍नी ङ्‍येलाला क्‍युर्सुङ। तमा खोकी ठिम क्‍या नङ्‍गुप तुजे सेककी थोक्‍ला तिवाला ङ्‍येलाकी नक्‍तोमीला टानी ज्‍याक्‍सुङ। 5 नोआकी ङोला कोन्‍छ्‍योककी जम्‍बुलिङला खोरे सुङला मुयुकुप मीतिवा चुका तीला साङ माज्‍याक्‍नी छ्‍यर्वा ग्‍येर्पु ग्‍यक च्‍यिनी ना ताङ्‍सुङ। यिने खोकी सुङ टेङ्‍बु ख्‍याप्‍टाक कितुप नोआ ताङ तीकी मुला वोतुप यम्‍बा मिरा दिनला तिराङ र्‍होक्‍सुङ। 6 येलुङ खोकी सदोम ताङ गमोरा ग्‍येसातिवाला मे थ्‍वोनी ना डो च्‍यिसुङ। तमा ती ग्‍येसाकी मिराप तेरी तोर्नी डो च्‍यिसुङ। तमा खोकी सुङला मुयुकुप मीतिवाला खोकी चुक क्‍यानी ना तोङ्‍गिनोक सिरुप येन्‍देन बिन्‍सुङ। 7 यिने ती ग्‍येसाकी मीतिवी सेम नोजु क्‍यानी ङोछा लङ्‍गुप लाका दुक्‍टातिवा क्‍यावु थोङ्‍नी लोतकी सेमला छासे मेलोवा गाल्‍नोक। तुक क्‍यानी खोकी खोरे थोङ्‍दाङला टेङ्‍बु वोतुप लोतला ति र्‍होक्‍सुङ। 8 ती लोत ति मी दुक्‍टातिवी पर्ला देतुप पेला ङ्‍यिमी टेङ तिवी किताङ नालु मेलोक्‍पा थोङ्‍सा ताङ थोसालेन्‍सिन कोन्‍छ्‍योककी थोङ्‍दाङला टेङ्‍बु वोतुप तीकी सेम ति छासे सेम्‍दुक लानोक। 9 तुक क्‍यानी खोकी सुङला युकुपतिवा छेटाङला ख्‍येलुप पेला र्‍होकुप ताङ खोकी सुङला मुयुकुपतिवाला ठिम कितुप तुजे सेक छ्‍येर्पा बिन्‍नी टानी ज्‍योकुप ति कोन्‍छ्‍योकला छ्‍या वे। 10 खक्‍छ्‍येवुला शम्‍डेन कितुप नासाम ताङ्‍नी मेटेङ्‍बु कितुप ताङ खोकी ओङ्‍ज्‍येनला मारे तोङ्‍गुपतिवाला खोकी ठिम क्‍या नङ्‍गिवी।

तिवा ङ राङ यिन सिनी काङ साङ ज्‍यिवा माक्‍यानी मेलोवा किवी, तमा मोवा वोतुप ओङ्‍ज्‍येनतिवाला साङ ज्‍यिवा माक्‍यानी मारे तोङ्‍गिवी। 11 यिने देवाच्‍येनकी लेन क्‍योलुप थुतिवा ति गेकेन मेटेङ्‍बुतिवा सिनाङ मङ ङार छ्‍येवु ताङ ओङ्‍ज्‍येन वोसिनाङ कोन्‍छ्‍योककी दोङ्‍ला ति मोवा वोतुप ओङ्‍ज्‍येनतिवाला मारे तोङ्‍गुप ताङ क्‍येन साङ मेतेरी। 12 यिने ती गेकेन मेटेङ्‍बुतिवा याङ खोरो हाक्‍माकोवु ताम्‍ङेला मारे तोङ्‍गिवी। तिवा नो मेशेवु सेम्‍ज्‍येनतिवा दोके यिन्‍दुप तप्‍की खोप्‍राङ नोवाला तिराङ युकिवी। तिवा जिम्‍नी सेतुपकी थोक्‍ला क्‍येवु सेम्‍ज्‍येन दोके यिन। तुक क्‍यानी सेम्‍ज्‍येनतिवा दोके तिवा ना डिवी। 13 तिवी दुक्‍टा क्‍यावु तप्‍की तिवी छ्‍येर्पा ति खोप्‍रे राङ खुर गोकिवी। तिवा ङ्‍यिमी गुङला छ्‍याङ आराक थुनी देतुप ति गा किवी, तिवा ङोछा मेतुप ताङ ताङ्‍देन कि मोछ्‍योवु मी यिन। तिवी ख्‍यिराङ मुला राङ देनी साप ताङ थुङ्‍गुप पेला साङ नरी जिनोक जोप तिराङ गा किवी। 14 तिवा नरी शम्‍डेन कितुप नासाम तिराङ तोङ्‍गिवी। तिवा चो दिक्‍पा क्‍यासिनाङ सेम लो मिदिवी, तिवी तेपा रम्‍बु मेनी सेम नटेकोटे वोतुप मीतिवाला अलम च्‍योलोम जेवी। तिवी सेम ति देर्पा कितुपला छासे खामु गिवी। तुक क्‍यानी तिवा मोताप सुकुप गिपातिवा यिन। 15 तिवा लाम थेकाङला युकुप क्‍युर ज्‍याक्‍नी लाम मेटेङ्‍बुला गल्‍नी बओरकी पुज्‍युङ लुङ्‍तेम्‍बा बालमकी दला शुकुप गल वे। ती बालम ति गोमाला लाका मेटेङ्‍बु क्‍यानी टङ्‍गा शोम्‍बुप गा किनोक।*२:१५ गन्‍ती २२:४-३५ 16 यिने तीकी क्‍यावु दुक्‍चे क्‍येनकी थोक्‍ला लप्‍सिर सोसुङ। ताम्‍ङे लप मुथुपुप तीकी पुङ्‍गोककी साङ मी दोके क्‍यानी तीकी कितुप लाका मेलोवा ति क्‍येक्‍सुङ।

17 तिवा छ्‍यु मेतुप छ्‍यी पुङ दोके ताङ वुर्तुककी फुरुप ल्‍हवुल दोके यिन। तिवी थोक्‍ला ङ्‍येलाकी नक्‍तोमी दासा टडिक क्‍या वे। 18 तिवा अम्‍बारङ्‍शिङ कितुप ताङ तेन्‍दोक मेतुप ताम्‍ङे तिराङ किवी, तमा मलोक लाका मेलोक्‍पा कितुप क्‍युर ज्‍यकुप मीतिवाला साङ सेम नेसुर वुङ्‍गुप नासाम मेलोक्‍पाला ख्‍येल ज्‍यितुपला लुकिवी। 19 तिवी मीतिवाला दिक्‍पा ने रङ्‍ज्‍येन थोप्‍किवी सिनी थाक्‍छ्‍येकिवी, यिने खोप्‍राङ ति दिक्‍पी ओङला राङ ख्‍येल वे। च्‍यिलासिसिन ख्‍यिराङ चुका मी ति ती ओङला ख्‍येल वे, ती मी ति तीकी योक्‍पु यिन। 20 दोजो तिवी दाक्‍पुला दिक्‍पा ने थर ज्‍यितुप चोवो येशू ख्रीष्‍टला ङो शेनी दी जम्‍बुलिङकी मेटेङ्‍बु वोतुप च्‍यालक नेसुर थेन्‍सिमा येलुङ गोमी किताङ नालुला लोक्‍नी ती दिक्‍पी ओङला राङ डिवी सिसिन तिवा गोमी ति सिनाङ ज्‍युक्‍ला मङ मेलोक्‍पा डिवी। 21 ती तप्‍की तिवाला बिन्‍दुप कोन्‍छ्‍योककी सुङ टेङ्‍बु ति तिवी हाक्‍कोनी साङ ती सुङला मुयुकुप सिसियाङ, बोरु तिवाला कोन्‍छ्‍योककी थोङ्‍दाङला टेङ्‍बु वोतुप सुङगी कोर्ला हाक्‍माकोवु राङ ल्‍यामु यिन्‍दुप्‍जा। 22 तुक क्‍यानी तिवी थोक्‍ला “की तीकी खोरो क्‍युनी खोरो राङ लकिवी। फाक्‍पाला टुनी बिन्‍सिन येलुङ दक्‍च्‍यिरला राङ गङ्‍ङ्‍येल चेवी।”*२:२२ हितोपदेश २६:११ सिरुप पेकी तेन्‍दोक ति डिकिवी।