1 पुज्‍युङपुमतिवा, कोन्‍छ्‌योककी क नङ्‍गुप दोके दाक दाक्‍पी पपाआमी खला ङ्‍येन, च्‍यिलासिसिन दी ति ताम्‍ङे टेङ्‍बु यिन। 2 रङगी पपाआमाला ताङ्‍देन की*६:२ प्रस्‍थान २०:१२, दी ति तोङ्‍ला के कोन्‍छ्‌योककी मोशाला थाक्‍छ्‌येन नङ्‍गुप क तङ्‍बु यिन। 3 तुक क्‍यासिन ख्‍यिराङ दी जम्‍बुलिङला कोन्‍छ्‌योककी मोलाम थोप्‍नी छे रिङ्‍बु च्‍युङ्‍गिवी।

4 पपातिवा, खोरो पुज्‍युङपुमतिवाला ङ्‍यिर्मु मालोङ, यिने तिवाला चोवो येशूकी येन्‍देन ताङ तालिम बिन्‍नी र्‍होल।

5 ख्‍यिराङ योक्‍पुतिवा, ख्रीष्‍टला ताङ्‍देन क्‍यावु दोके दी जम्‍बुलिङकी ख्‍यिरा ज्‍यिन्‍दाकतिवी सिक्‍यावु ताम्‍ङे ति ज्‍यिवा क्‍यानी र्‍हुकिन सिरा सेमगी दिङ नेज्‍युनी की। 6 मीतिवाला गा लोङ्‍गुपला तिवी मिङ्‍गाला तिराङ छ्‌या देन्‍दुप लाका माकी, यिने ख्रीष्‍टला शब्‍ज्‍यी पुलुप दोके सेम टेङ्‍बु क्‍यानी कोन्‍छ्‌योककी नोवाला वोतुप लाका की। 7 मीतिवी थोक्‍ला मिन, यिने चोवो येशूला शब्‍ज्‍यी पुलुप दोके सेम गा क्‍यानी किसा। 8 दी ताम्‍ङे ति हाक्‍कोवा की। योक्‍पु यिन्‍शी मिन्‍शी सी लाका ल्‍यामु किवे, तीला चोवो येशूकी छ्‍यक्‍तक नङ्‍गितो।

9 ज्‍यिन्‍दाकतिवा, रङगी योक्‍पुतिवाला किताङ ल्‍यामु की, तिवाला वोरु मादेन। दी ति हाक्‍कोवा की, ख्‍यिराङ ङ्‍यिकरकी ज्‍यिन्‍दाक ति देवाच्‍येनला ज्‍यु वे। खोकी सुला साङ ख्‍ये मेबेवी।

10 तेरी सिनाङ तिङ्‍ला ङ सिरिन, ख्‍यिराङ चोवो येशूकी ओङला ङार छ्‍येवु वुङ गोकिवी। 11 शैतानकी च्‍युतिवी तेन्‍दोकला लानी दे थुपुपला कोन्‍छ्‌योककी नङ्‍गुप तेरी मक्‍मीकी लाक्‍च्‍येतिवा लोसा। 12 च्‍यिलासिसिन दाक्‍पी ग्‍यकुप मक ति मी ताङ मुला मिन, यिने ओङ्‍ज्‍येन कितुपतिवा ताङ ङार वोतुपतिवा ताङ दी जम्‍बुलिङकी दुक्‍टाकी ङार ताङ देवाच्‍येनला वोतुप डेतिवी मुला यिन। 13 तुक क्‍यानी ती तेरी मक्‍मीकी लाक्‍च्‍येतिवा लङ्‍नी ती तुजे मेलोक्‍पाकी खला ग्‍येल थुपा की। तमा ती मक ग्‍यकुप लाका तेरी सिन्‍सिमा रम्‍बु क्‍यानी दे थुपा की।

14 ती तप्‍की ख्‍यिराङ केल्‍दाङला जिनोक मेतुप करा च्‍यी*६:१४ यशैया ११:५; ५९:१७। तमा छेकोकला टेङ्‍बुकी क्‍योरुप च्‍यालक कोन। 15 तमा लोदिमु नङ्‍गुप कोन्‍छ्‌योककी लेन ल्‍यामु ख्‍याप्‍टाक कि डोपला काङ्‍बाला काचा कोन*६:१५ यशैया ५२:७। 16 लकला तेपा रम्‍बुकी खोरुङ र्‍होकुपला क्‍योरुप च्‍यालक खुर, तुक क्‍यासिन ख्‍यिरा तेन्‍दोकला लावु डेकी तेरी मेलापतिवा से थुप्‍किवी। 17 गोला दिक्‍पा ने थरुप शमुङ कोन*६:१७ यशैया ५९:१७। तमा कोन्‍छ्‌योककी थु चाङ्‍माकी खुर्पा खुर, ती ति कोन्‍छ्‌योककी सुङ यिन। 18 नरी खोकी थु चाङ्‍माकी क्‍येङ्‍नी तेरीकी थोक्‍ला मोपोर ताङ गोङ्‍बा पुल। तोजो तिराङ मिन, टेमु ताङ च्‍याङ्‍से क्‍यानी कोन्‍छ्‌योकला तेपा कितुपतिवा तेरीकी थोक्‍ला नरी मोपोर किसा। 19 ङ खोकी सुङ ख्‍याप्‍टाक कितुप पेला ज्‍यिवा माक्‍यावा क्‍यानी छ्‍याकला वोतुप कोन्‍छ्‌योककी सुङगी तेन्‍दोक ति ख्‍याप्‍टाक कि थुप्‍शी सिनी मोपोर क्‍या नाङ। 20 तीकी थोक्‍ला राङ ङ च्‍याटोक ग्‍यप्‍नी चोन्‍खाङला वे, यिन्‍सिनाङ ङ ख्रीष्‍टकी लेन ल्‍यामु ख्‍याप्‍टाक क्‍यावु मी यिन। ङे चुक क्‍यानी लप गोकिवी ती ति ङाडेङ क्‍यानी लप थुप्‍शी सिनी मोपोर किसा।

21 ङ चुकै वे, काङ कियी वे, ती ति ख्‍यिरा साङ हाक्‍कोशी सिनी कोन्‍छ्‌योकला ल्‍यामो क्‍यानी शब्‍ज्‍यी बुलुप ङे ङ्‍यिङ्‍ज्‍येवु नुप तुखिकसकी तेरी ताम्‍ङे ति ख्‍यिराङला शेकितो। 22 दे ङ्‍यिराङला चुकै वे ख्‍यिरा साङ हाक्‍कोशी, तमा ख्‍यिरा सेमला टोङ्‍गु तेरुपला तीला ङे ख्‍यिरा चाला तङ्‍गुप यिनो।

23 पपा कोन्‍छ्‌योक ताङ चोवो येशू ख्रीष्‍ट नेमा खोला तेपा कितुपतिवा तेरीला तेपा नेसुर वुङ्‍गुप ङ्‍यिङ्‍ज्‍ये ताङ लोदिमु वुङ्‍शी। 24 तमा दाक्‍पी चोवो येशू ख्रीष्‍टला नरी ङ्‍यिङ्‍ज्‍ये कितुपतिवा तेरीकी मुला कटिन ति थोप्‍शी।