1 अच्‍युनुपतिवा, मी ललाइ दिक्‍पाला ख्‍येल्‍सुङ सिसिन ख्‍यिराङ तेपा कितुपतिवी कुसु ज्‍यम्‍बु क्‍यानी तीला ल्‍यामु जोप लाका की। ती पेला ख्‍यिराङ ति च्‍याङ्‍से किसा, मिसियाङ ख्‍यिराङ साङ दिक्‍पाला ख्‍येल्‍गितो। 2 ख्‍यिराङ च्‍यिककी च्‍यिकला दुक्‍पा ख्‍येलुप पेला ख्रीष्‍टकी सुङ्‍गुप ठिमला वोतुप दोके च्‍यिककी च्‍यिकला दाल्‍जा किसा। 3 दोजो मी ललाइकी खोरुङ ति काङ दोके मिन्‍सिनाङ खक्‍छ्‍येवु यिन सिनी नोकिवी सिसिन तीकी खुरुङला राङ जिनोक जोवु यिन। 4 तीकी थोक्‍ला तेरीकी खोरो क्‍यावु लाका ति ल्‍यामो क्‍यानी ल्हो। खोरो क्‍यावु लाका ति मी यम्‍बी मुला डिक्‍नी माल्‍हा। मिसियाङ ख्‍युरुङ छ्‍येजु कितुप डिवितो। 5 च्‍यिलासिसिन मी तेरीकी खोरो चेक लावु लाका ति खोरो राङ कि गोकिवी।

6 कोन्‍छ्‍योककी सुङ लापुपतिवी सुङ लाम तेरुप मी तीला खोरो मुला वोतुप च्‍यालक ल्‍यामुतिवा गोनी बिन। 7 ख्‍योरो रङला राङ जिनोक माजो। कोन्‍छ्‍योकला सी साङ मारे तोङ्‍गुप मेङ्‍गिवी। च्‍यिलासिसिन मी काङ चु वे, तिराङ ङकिवी। 8 तुक क्‍यानी ख्‍युरुङ खोरो जुकी थोक्‍ला तिराङ जुकिवी सिसिन ख्‍योरो जु नेसुर मेलोक्‍पा तिराङ ङकिवी, यिने कोन्‍छ्‍योककी थु चाङ्‍माकी थोक्‍ला जुकिवी सिसिन खोकी थु चाङ्‍मा नेसुर नाम्‍साङ मिशिवु मिजीकी थोक्‍ला ङकिवी। 9 दाक्‍पु मी यम्‍बी थोक्‍ला लाका ल्‍यामु कितुपला नाम्‍साङ येन छ्‍येतुप ताङ यिछ्‍येतुप मेङ्‍गिवी, च्‍यिलासिसिन तुजे छेसिमा ङक थुप्‍किवी। 10 तुक क्‍यानी च्‍यु वोतुप पेला राङ मी तेरीला लाका ल्‍यामु की। खक्‍छ्‍येवुला तेपा कितुपतिवी मिछाङतिवाला मङ ल्‍यामु कि गोकिवी।

11 ल्‍होसा, दी यिकी बोम्‍बु ति ख्‍यिरा थोक्‍ला ङे लाक्‍पी राङ टिवु यिनो। 12 खुरुङला टेङ्‍बु छ्‍या देन्‍दुप गा लङ्‍गुपतिवी ख्‍यिराङला यहूदी च्‍येतुप लुक्‍सु तेन गोकिवी सिवी। तीकी तेन्‍दोक ति तिवा येशू ख्रीष्‍टकी ग्‍यङ्‍शिङकी तेन्‍दोकला वुङ्‍गुप छेटाङ दुङल नेसुर र्‍होकुपकी थोक्‍ला यिन। 13 सी यहूदी च्‍येतुप लुक्‍सु तेन्‍गिवे, तीकी ठिमला मेतेन्‍दी। यिन्‍सिनाङ ख्‍यिराङला ति च्‍येतुप लुक्‍सु तेन गोकिवी सिनी सिवी। तिवी तुक क्‍यावु तेन्‍दोक ति ख्‍यिरा जुकी थोक्‍ला तेके कितुपला यिन। 14 यिने दाक्‍पी चोवो येशू ख्रीष्‍टकी ग्‍यङ्‍शिङकी कोर्ला मिसिन ङ यम्‍बा काङला साङ तेके मिकी। ख्रीष्‍ट नेसुर जम्‍बुलिङ ति ङे थोक्‍ला ताङ ङ ति जम्‍बुलिङकी थोक्‍ला ग्‍यङ्‍शिङला कलुप यिन। 15 च्‍यिलासिसिन ख्रीष्‍ट येशू नेसुर खक्‍छ्‍येवु मिजी सम्‍बा ङ्‍येसिमा यहूदी च्‍येतुप लुक्‍सु क्‍यासिनाङ माक्‍यासिनाङ काङ साङ ख्‍येप्‍साङ मे। 16 त कोन्‍छ्‍योककी कला ङ्‍येन्‍नी मिजी क्‍योङ्‍गुपतिवा ताङ इस्राएलकी कोन्‍छ्‍योककी गिपातिवा तेरीला खोकी लोदिमु ताङ च्‍यम्‍बा थोप्‍शी।

17 तफेन नेज्‍युनी ङला सी साङ दुक्‍पा मेतेर्शी, च्‍यिलासिसिन खोला शब्‍ज्‍यी क्‍यावु यिन सिरुप पङ्‍बुकी मडीतिवा बङी ङे जुला वे।

18 अच्‍युनुपतिवा, दाक्‍पी चोवो येशू ख्रीष्‍टकी कटिन ति ख्‍यिरा सेमला वुङ्‍शी। आमिन।