2
खक्छ्येवु थर्वा
1 तुक क्यानी दाक्पी थोवु कोन्छ्योककी सुङ टेङ्बुला मङ छासे ङ्यम्ले कि गोकिवी। मिसियाङ दाक्पु ति खोकी सुङ्गुप सुङला क्युर ज्याक्नी लाम मेटेङ्बुला डो थुप्किवी। 2 तोङ्ला देवाच्येनकी लेन क्योलुप थुतिवी दाक्पी हङ्गावातिवाला सिक्यावु सुङ ति वुतुङ के टेङ्बु च्युङ्सुङ। तमा ती सुङला मेङ्येन्दुप ताङ ती सुङला मुयुकुपतिवाला ङ्ये गोवु पर्च्या ति ङ्येसुङ। 3 दाक्पी तुका थर्वा ग्येर्पुला साङ ङ्याम माक्यासुङ सिसिन मङ चुक क्यानी ती पर्च्या नेसुर पिशोर थुप्किवी रो? दी थर्वा ति गोमाला चोवो येशूकी राङ ख्याप्टाक क्या नाङ्सुङ। खोकी ख्याप्टाक क्या नङ्गुप सुङ ङ्येन्दुपतिवी राङ ती सुङ ति टेङ्बु यिन सिनी ङ्यिराङला पङ्बु बिन्सुङ। 4 दी थर्वा ति टेङ्बु यिन्दुप पङ्बु छ्या देन्दुपला कोन्छ्योककी साङ ततिवा छ्या देन्दुप ताङ हलेवु लाकातिवा ताङ नम्बा बङीकी ङार छ्येवु लाकातिवा क्या नाङ्सुङ। तमा खोकी नोवाला वोतुप दोके खोरे थु चाङ्माकी कटिनतिवा साङ नाङ्सुङ।
थर्वा नङ्गुप ख्रीष्ट
5 दाक्पी ताम्ङे कियी वोतुप त वुङ्गुप जम्बुलिङ ति कोन्छ्योककी खोरे देवाच्येनकी लेन क्योलुप थुतिवी ओङला माज्याक वे। 6 यिने कोन्छ्योककी सुङला दासा च्यिकला दुक सिनी टि वे,
“कोन्छ्योक, मी ति काङ यिन रो!
ख्योरे तीकी थोक्ला नासाम तोङ्गुप ती।
मी पुज्युङ ति सु यिन रो?
ख्योरे तीकी थोक्ला ल्हटे कितुप ती।*२:६भजन ८:४-६
7 ख्योरे चेयी पर सेककी थोक्ला तीला देवाच्येनकी लेन क्योलुप थुतिवा सिनाङ छ्युङा जो नाङ्सुङ।
तमा तीला ग्येल्वुला दोके मोवा ताङ ताङ्देन नाङ्सुङ।
8 तमा ख्योरे तेरी च्यालकतिवा खोकी ओङला राङ ज्याङ नाङ्सुङ।”
कोन्छ्योककी खोरे ओङला तेरी च्यालकतिवा ज्याङ नङ्गुप पेला खोकी ओङला मेतुप चुका च्यालक साङ मे। यिन्सिनाङ तसाम दाक्पी तेरी च्यालकतिवा खोकी ओङला राङ वोतुप मोथोङ्गिवी। 9 यिने दाक्पु येशूकी कोर्ला नासाम तोङ्गुप। कोन्छ्योककी कटिनकी खो मी तेरीकी थोक्ला टुङ्गुपला चेयी पर सेककी थोक्ला देवाच्येनकी लेन क्योलुप थुतिवा सिनाङ छ्युङा जो नाङ्सुङ। मी तेरीकी थोक्ला शेपला दुक्पा खुर्सिमा कोन्छ्योककी खोला ग्येल्वुला दोके मोवा ताङ ताङ्देन नाङ्सुङ।
10 जम्बुलिङकी तेरी च्यालकतिवा कोन्छ्योककी राङ ज्ये नङ्गुप यिन। तमा तेरी च्यालकतिवा खोकी थोक्ला राङ वे। खोकी गिपातिवा बङीला खुरुङला वोतुप दोके मोवा ति गोतुपला येशूला छेटाङ खुर च्यिनी टेङ्बु जो नाङ्गुप ति कि राङ गोवु यिन। च्यिलासिसिन येशू ति तिवाला थर्वा नङ्गुपला लाम छ्या तेन्सुङ। 11 मीला दिक्पा नेसुर टेङ्बु जो नङ्गुप येशू ताङ खोकी टेङ्बु जोवु मी तेरीकी पपा ति च्यिक राङ वे। तुक क्यानी खोकी खोरे राङ टेङ्बु जो नङ्गुप मीतिवाला ङे नुपतिवा सिरुपला खो ङोछा मिकिवी। 12 खोकी कोन्छ्योकला दुक सुङ्गिवी,
“ङ ङे नुपतिवी पर्ला ख्योरे क्यावु हलेवु लाका ति ख्याप्टाक कितिन।
तमा तिवा जोम्नी सोवा देकुप पेला ङ ख्युरुङला सोवा देकिन।”*२:१२भजन २२:२२
13 येलुङ खोकी सुङ्सुङ,
“ङ कोन्छ्योकला राङ रेवा कितिन।”
तमा येलुङ खोकी सुङ्सुङ,
“ल्होसा, कोन्छ्योककी ङला नङ्गुप पुज्युङपुमतिवी मुला ङ देन वे।”*२:१३ यशैया ८:१८
14 ती पुज्युङपुमतिवा श ताङ ठकला वोतुप जु यिन्दुप तप्की खो साङ तिवा दोके श ताङ ठकला वोतुप जु च्युङ्सुङ। तुक क्यानी खो टुङ्नी शेपकी ङार वोतुप शैतानला ना ताङ्सुङ। 15 तुक क्यानी छे काङ शेपला ज्यिवा क्यानी शेपकी ओङला ख्येलुपतिवाला खोकी थर्वा नाङ्सुङ। 16 वुतुङ के खोकी देवाच्येनकी लेन क्योलुप थुतिवी थोक्ला मिन, यिने अब्राहामकी गिपातिवी थोक्ला ङ्याम क्या नङ्गिवी। 17 तुक क्यानी तेरी ताम्ङेला खो रङगी अच्युनुपतिवा दोके च्युङ गोसुङ। तमा मीतिवी क्यावु दिक्पी ठिलेन च्योलुपला खो कोन्छ्योकला शब्ज्यी बुलुप च्यम्बा ताङ खोङ्तेर्मु वोतुप कोङ्यार छ्ये च्युङ्सुङ। 18 खो खोरे साङ बङी शैतानकी खोक्पा ल्हापला ख्येल्नी दुक्पा खुरुप तप्की त याङ खोक्पा ल्हापला ख्येलुपतिवाला खोकी दाल्जा किटे क्या नङ्गिवी।