5
1 चुका कोङ्यार छ्ये साङ कोन्छ्योककी मीतिवा नेसुर बेकिवी। तमा मी छ्योक नेसुर कोन्छ्योककी थोक्ला तीकी दिक्पाकी थोक्ला बुल्वा ताङ सेम्ज्येन सेनी जिन्बा बुलुपकी थोक्ला ज्योकिवी। 2 ती कोङ्यार छ्ये तीकी खोरो साङ दिक्पा कि थुप्किवी। ती तप्की टेङ्बुला ङो माशेनी लाम नोरुपतिवाला तीकी कुसु ज्यम्बु क्यानी टोङ्गु तेर थुप्किवी। 3 तुक क्यानी तीकी मीतिवी दिक्पी थोक्ला तिराङ मिन, यिने खोरो दिक्पाकी थोक्ला साङ सेम्ज्येन सेनी कोन्छ्योकला जिन्बा बुल गोकिवी। 4 तुका कोङ्यार छ्येकी लाका नेसुर वुङ्गुप ताङ्देन ति खोरो राङ छल्नी मेङ्येवी, यिने हारूनला दोके क्यानी कोन्छ्योककी कताङ नङ्गुप वुङ गोकिवी। 5 तुक राङ क्यानी ख्रीष्टकी साङ खोरुङ राङ कोङ्यार छ्ये च्युङ्नी ताङ्देन छोलुप नो माक्या। यिने
“ख्युरुङ ङे पुज्युङ यिनो,
हारिङ ङ ख्योरो पपा यिनो।”*५:५ भजन २:७
सिनी सुङ्गुप कोन्छ्योककी राङ खोला चिवु यिन। 6 येलुङ कोन्छ्योककी सुङला दासा यम्बाला साङ
“ख्युरुङ मल्कीसेदेककी रिम्बाला नरीकी नरी थोक्ला कोङ्यार यिनो।”*५:६ भजन ११०:४
सिनी सुङ वे।
7 येशू दी जम्बुलिङला मी जुजमला ज्युवु पेला खुरुङला शेप ने ङोसु लोङ थुपुप कोन्छ्योकला थोर ग्यप्नी ङुयी सिरा मोपोर क्यावु ति खोकी सेन्सुङ। च्यिलासिसिन येशूकी टेङ्बु क्यानी खोला ताङ्देन क्या नाङ्सुङ। 8 येशू कोन्छ्योककी सेवु यिन्सिनाङ छेटाङ दुङल खुर्नी चुक क्यानी खोकी कला ङ्येन गोकिवी सिरुप ति लाप्सुङ। 9 तमा येशू टेङ्बु च्युङ्नी कोन्छ्योककी कला ङ्येन्दुप तप्की येशूकी कला ङ्येन्दुप तेरी मीतिवाला खो नरीकी थोक्ला दिक्पा ने थर्वा नङ्गुप च्युङ्सुङ। 10 ती तप्की कोन्छ्योककी खोला मल्कीसेदेक दोके राङ कोङ्यार छ्ये जो नाङ्सुङ।
तेपाला क्युर्नी मोज्योकुप कोर्ला टोङ्गु
11 दी ताम्ङेकी कोर्ला ङ्यिरा ख्यिराङला सि गोवु याङ बङी वे, यिन्सिनाङ ख्यिराङ ङमु हाक्मोकोवु गल वे। तुक क्यानी ख्यिराङला हाक्को ज्यितुप छासे कले वे। 12 ख्यिरा तेपा क्यावु ति लो अलायी गाल, तुक क्यानी त याङ ख्यिराङ गेकेन के च्युङ गोवु ति यिन्जा, यिने तरोङ साङ ख्यिराङला ललाइकी कोन्छ्योककी सुङगी कोर्ला गोमा नेज्युनी येलुङ लोप गोवु नोक। ख्यिराङ याङ समा क्योङ्बु साप मिन, आमी नुम तिराङ थुङ्गुप आङा टिक्पे दोके नोक। 13 आमी नुम तिराङ थुङ्गुप मी ति आङा टिक्पे दोके यिन। ती आङा टिक्पेला कोन्छ्योककी सुङ टेङ्बुकी येन्देन ति हाक्मोकोवी। 14 यिने समा क्योङ्बु याङ मी ज्येन्दातिवी थोक्ला तिराङ यिन। तुका मीतिवी नरी तालिम क्यावु तप्की ल्यामु ताङ मेलोवा काङ यिन सिनी बे थुपुप गिवी।