1 तुक क्‍यानी दाक्‍पु ख्रीष्‍टकी कोर्ला गोमाला लापुप येन्‍देनतिवा येलुङ लोपुप क्‍युर्नी मङ मङ रम्‍बु हाक्‍को थुपुप च्‍युङ्‍यिन डोप। शेप ते क्‍योलुप लाकातिवा नेसुर सेम ग्‍युरुप ताङ कोन्‍छ्‍योकला तेपा कितुप ताङ 2 बप्‍तिस्‍माकी कोर्ला लापुप येन्‍देनतिवा ताङ मी यम्‍बी गोला लाक्‍पा ज्‍याक्‍नी मोपोर कितुप ताङ शेप ने सेन्‍बु लोङ्‍गुप ताङ तिङ्‍मी तुजेला कोन्‍छ्‍योककी ठिम क्‍या नङ्‍गुपकी कोर्ला येन्‍देन लोपुप ति गोमाला लापुप येन्‍देनतिवा यिन्‍दुप तप्‍की तीला तिराङ लाप्‍नी मादे। 3 दोजो कोन्‍छ्‍योककी नोवा वोसुङ सिसिन दाक्‍पु ती तेरी येन्‍देनतिवा मङ रम्‍बु हाक्‍कोवु च्‍युङ्‍गिवी।

4 च्‍यिलासिसिन सी थेङ्‍मा यी कोन्‍छ्‍योककी सुङ टेङ्‍बु थोवु ताङ देवाच्‍येनकी कटिन हाक्‍को वे, तमा कोन्‍छ्‍योककी थु चाङ्‍मा थोप्‍नी वे, 5 सी कोन्‍छ्‍योककी खक्‍छ्‍येवु सुङ हाक्‍कोवु ताङ ज्‍युक्‍थमाकी कल्‍वाला कोन्‍छ्‍योककी क्‍या नङ्‍गुप ङारकी कोर्ला हाक्‍को वे, 6 यिन्‍सिनाङ तिवा तेपा कितुप क्‍युर्नी थेन गल्‍सिन, येलुङ सेम ग्‍युर्नी वुङ मुथुपी। तुका मीतिवी कोन्‍छ्‍योककी सेवुला येलुङ थेङ्‍मा च्‍यिक ग्‍यङ्‍शिङला ग्‍येल च्‍यिनी मी मिङ्‍गाला खोला मारे तोङ्‍गिवी।

7 छ्‍यर्वा नरी ग्‍यप्‍सिमा शिङ बोकिवी, तमा सशिङकी लाका कितुप मीतिवी थोक्‍ला डुप्‍सेन ल्‍यामु ल्‍येसिन तुका सशिङला कोन्‍छ्‍योककी मोलाम नङ्‍गिवी। 8 यिने ती शिङ खला छेर्क्योक ताङ युर्मा तिराङ क्‍येसुङ सिसिन ती ति काङ साङ फेन मोथोवी। तुका शिङला कोन्‍छ्‍योककी मोताप सुक थुप्‍किवी। तमा ती शिङ खला मे ग्‍यप्‍नी ना डिवी।

9 यिने ङे ङ्‍यिङ्‍ज्‍येवु अच्‍युनुपतिवा, ङ्‍यिरा तुका ताम्‍ङे क्‍यासिनाङ ख्‍यिरा थोक्‍ला ति दिक्‍पा ने थरुप ताङ मङ मोलाम वुङ्‍गुप ताम्‍ङे ल्‍यामु वे सिनी ङ्‍यिराङला तेन्‍तेन वे। 10 ख्‍यिरा यम्‍बा तेपा कितुपतिवाला शब्‍ज्‍यी क्‍यासुङ, तमा तरोङ साङ कियी वे। कोन्‍छ्‍योक ति मीला ख्‍ये मापेवा क्‍यानी ठिम क्‍या नङ्‍गुप कोन्‍छ्‍योक यिन। खोला तेपा कितुपतिवाला ख्‍यिरा शब्‍ज्‍यी क्‍यावु ताङ ङ्‍यिङ्‍ज्‍ये क्‍यावु ति खोकी मेज्‍येवी। 11 ख्‍यिराङ रे रेकी रेवा क्‍यावु ति तेरी च्‍युङ्‍गुपला तुक क्‍यावु ति तिङ्‍ला सेक तुकै राङ क्‍यानी देकिवी सिरुप ति ङ्‍यिरा नोवा वे। 12 ख्‍यिराङ छेरा माकी, यिने खोला तेपा कितुप ताङ हम क्‍या देनी खोकी थाक्‍छ्‍येन नङ्‍गुप ति थोपुप मीतिवा दोके च्‍युङ्‍शी सिरुप ति ङ्‍यिरा नोवा वे।

13 कोन्‍छ्‍योककी अब्राहामला थाक्‍छ्‍येन नङ्‍गुप पेला खो सिनाङ यम्‍बा सु साङ छ्‍ये मेतुप तप्‍की खोरे मिङला दुक सिनी न क्‍याल्‍सुङ, 14 “वुतुङ के ङ ख्‍युरुङला मोलाम बङी तेरिन, तमा ख्‍योरो गिपातिवा बङीकी बङी फेल ज्‍यितिनो।”*६:१४ उत्‍पत्ति २२:१७ 15 तमा अब्राहामकी कोन्‍छ्‍योककी कला ङ्‍येन्‍नी हम क्‍यानी गुनी देतुप तप्‍की अब्राहामला खोकी थाक्‍छ्‍येन नङ्‍गुप मोलाम ति तेरी थोप्‍सुङ। 16 मीतिवा खोप्‍राङ सिनाङ मी छ्‍येतिवी मिङला न क्‍योल्‍गिवी, तमा न क्‍यल्‍नी राङ सिक्‍यावु ताम्‍ङेतिवा तेन्‍तेन कितुप ताङ तेरी खाँदातिवा डिकिवी। 17 तुक राङ क्‍यानी कोन्‍छ्‍योककी याङ खोकी थाक्‍छ्‍येन नङ्‍गुप मोलाम थोपुपतिवाला खोकी थाक्‍छ्‍येन नङ्‍गुप ति नाम्‍साङ मोफोवु क्‍यानी तेरुप सिनी तेन्‍तेन कितुपला न क्‍याल्‍सुङ। 18 कोन्‍छ्‍योककी दाक्‍पुला थाक्‍छ्‍येन नङ्‍गुप ताङ न क्‍यल नाङ्‍सुङ। ती ताम्‍ङे ङ्‍यी ति नाम्‍साङ मोफोवी, च्‍यिलासिसिन कोन्‍छ्‍योककी जिनोक जो मुथुपी। तुक क्‍यानी दाक्‍पु र्‍होकुपकी थोक्‍ला टोनी वावुतिवाला दाक्‍पी दोङ्‍ला ज्‍यकुप रेवा ति थोपुपला छासे ङाडेङ ग्‍येर्पु ङ्‍येन वे। 19 ती रेवाला राङ दाक्‍पी मिजी ति रेन्‍नी देन वे। दी रेवा ति ग्‍येम्‍छो नाङ्‍ला वोतुप टुला लङ्‍गर ग्‍यप्‍सिमा टु ति र्‍होकुप दोके दाक्‍पी सेमला रम्‍बु ताङ र्‍होकुप च्‍युङ्‍नी वे। तमा ती रेवा ति यहूदी ल्‍हङाङला ग्‍यपुप गोयोल नङगी छासे चाङ्‍मा वोतुप दासा सेक लेपुपला दाल्‍जा किवी। 20 दाक्‍पी छ्‍योकला येशू ति दाक्‍पु सिनाङ गोमाला के ती गोयोल नाङ्‍ला फेप्‍नी नरीकी नरी थोक्‍ला मल्‍कीसेदेक दोके कोङ्‍यार छ्‍ये च्‍युङ्‍नी वे।