13
तिङ्मी टोङ्गु
1 ख्यिराङ च्यिककी च्यिकला रङगी अच्युनुपतिवा दोके क्यानी ङ्यिङ्ज्ये किसा। 2 ङो माशेवु डेन्बुतिवाला गासो शोप टोक माज्येता, च्यिलासिसिन मी ललाइकी हाक राङ माकोवा क्यानी देवाच्येनकी लेन क्योलुप थुतिवाला शब्ज्यी क्यासुङ। 3 ख्यिराङ खुरुङ साङ चोन्खाङला वोतुप दोके नासाम तङ्नी चोन्खाङला शोरुप तिवाला ङ्याम किसा। तमा मीतिवी पाङ्शर तङ्गुपतिवाला साङ नासाम तोङ, च्यिलासिसिन ख्यिराङ साङ जुला राङ वे।
4 तेरीकी पर्ला जेन्दी ति ताङ्देन वोतुप वुङ्शी। तमा ख्योवा ताङ पेर्मी जेन्दी क्यासिमा मी यम्बा ताङ मुला शम्डेन कितुप मेङ्गिवी, च्यिलासिसिन शम्डेन कितुप ताङ यम्बा ख्योक्पेजा याङ्ना यम्बा पुम्पेजा ताङ मुला मेलोक्पा कितुपतिवाला कोन्छ्योककी ठिम क्या नङ्गिवी। 5 ख्यिरा मिजी ति टङ्गा डेवाला चा कितुप नेसुर कुतुक दे। ख्यिरा मुला चो नोके तोजोयीला राङ सेम लोदिमु च्युङ्नी दे, च्यिलासिसिन कोन्छ्योककी दुक सुङ्नी वे,
“ङ ख्युरुङला नाम्साङ पि मोतोङ,
तमा क्युर्नी साङ मोज्योक।”*१३:५ व्यवस्था ३१:६, ८
6 तुक क्यानी दाक्पु ङाडेङ क्यानी सि थुप्किवी,
“चोवो कोन्छ्योक ति ङला दाल्जा किटे कितुप चोवो यिन,
ङ ज्यिवा मिकी। मीतिवी ङला काङ कि थुप्किवी रो?”*१३:६ भजन ११८:६-७
7 ख्यिराङला कोन्छ्योककी सुङ लोपुप गेकेनतिवाला नासाम तोङ। तिवी चुक क्यानी मिजी क्याङ्सुङ, तिवा चुक क्यानी शिसुङ, तीकी कोर्ला ल्यामु क्यान ल्हानी ख्यिराङ साङ तिवी दोके तेपा किसा। 8 येशू ख्रीष्ट दाङ ताङ हारिङ तमा नरीकी नरी च्यिक्पा राङ ज्युकिवी। 9 ख्यिराङ नम्बा कुतुककी येन्देन मेटेङ्बुला मेख्येल्शी। साप थुङ्गुप लुक्सुतिवा तेन्नी मिन, यिने कोन्छ्योककी कटिन नेमा ख्यिरा सेम रम्बु च्युङ्गुप ति ल्यामु यिन। तुका लुक्सुतिवा तेन्नी ख्यिराङला काङ साङ ख्येप्साङ मेवी।
10 दाक्पी ति जिन्बा तोङ्गुप दासा च्यिक वे। ती दासाला जिन्बा पुलुप च्यालकतिवा यहूदीतिवी कोन्छ्योकला सोवा देकुप कुरला देनी कोन्छ्योकला शब्ज्यी कितुपतिवाला साप ओङ मे। 11 ते यहूदी कोङ्यार छ्येकी दिक्पी थोक्ला जिन्बा तोङ्गुप सेम्ज्येनकी ठक ति तेरी सिनाङ चाङ्मा वोतुप दासाला खुर्नी डिवी, तमा ती सेम्ज्येनकी जु ति मीतिवा देतुप दासा नेसुर फिला खुन गल्नी र्हेकिवी। 12 तुक क्यानी येशू ख्रीष्ट साङ ग्येसाकी फिला छेटाङ खुर्सुङ। ती ति खोकी ठक नेसुर दाक्पुला दिक्पा ने थर च्यिनी टेङ्बु जोपला यिन। 13 ती दोके दाक्पु साङ मीतिवा देतुप दासा नेसुर फिला येशूकी चिप्ला डोप। तमा दाक्पु साङ खोकी दोके मीतिवी मारे तङ्सिनाङ हम क्यानी देतुप। 14 च्यिलासिसिन दी जम्बुलिङला दाक्पी ति नरीकी थोक्ला देतुप ग्येसा मे, यिने दाक्पु ज्युक्ला वुङ्गुप ग्येसाकी थोक्ला गुनी देकिवी। 15 तुक क्यानी दाक्पु येशू नेसुर नरी कोन्छ्योकला सोवा देकिन सिरा खोला जिन्बा तोङ्गुप। तुक क्यावु ति दाक्पी खोला चोवो कोन्छ्योक यिन सिनी मी यम्बाला पङ्बु तेरुप यिन। 16 च्यिककी च्यिकला ल्यामु कितुप ताङ रङगी लोला वोतुप च्यालकतिवा यम्बा गोवुतिवाला तेरुप लाका कितुप टोक माज्येता। च्यिलासिसिन दाक्पी तुका जिन्बा पुलुप ति कोन्छ्योकला सेमला डिवी।
17 ख्यिराङला गोमा कितुप गेकेनतिवी सिक्यावु खला ङ्येन्नी तिवी ओङला देता। च्यिलासिसिन तिवी ख्यिरा मिजीला ल्हटे किवी, तमा तिवी खोप्रे क्यावु लाकाकी ची ति कोन्छ्योकला ते गोकिवी। ख्यिराङ तिवी ओङला दे। तुक क्यासिन तिवी ती लाका ति सेम मेलोक्पा क्यानी मिन, सेम गा क्यानी कि थुप्किवी। मिसियाङ ख्यिराङला काङ साङ ख्येप्साङ मेङ्गिवी।
18 ङ्यिरा थोक्ला साङ नरी मोपोर किसा। ङ्यिरा सेम टेङ्बु वे सिरुप ति तेन्तेन वे। ङ्यिराङ ति नरी खोङ्तेर्मु क्यानी मिजी क्योङ्गुप नो वे। 19 खक्छ्येवुला ङ ख्यिराङला ठाकुरे सिरिन, ङ ख्यिरा ते ङमु राङ वुङ थुप्शी सिनी ङे थोक्ला साङ मोपोर किसा।
तिङ्मी मोपोर
20 चोवो येशूकी ग्यङ्शिङला ठक तेन्नी कोन्छ्योक ताङ मीतिवी पर्ला थाक्छ्येवु ताम्ङे क्या नङ्गुप तप्की खो दाक्पुला गोमा कितुप गोठाला छ्ये च्युङ्सुङ। तमा कोन्छ्योक ति खोला टुङ्गुप ने ङोसु लोङ्गुप लोदिमु वोतुप कोन्छ्योक यिन। 21 ती कोन्छ्योककी खोकी नोवाला वोतुप ति ख्यिरा तेरी किशी नोनी ख्यिराङला गोवु तेरी ल्यामु वोतुपतिवा नङ्शी। तमा चुका ति खोला सेमला डोप नोके, येशू ख्रीष्ट नेसुर ती ति ख्यिरा मिजीला खोकी क्या नङ्शी। येशू ख्रीष्टला नरीकी नरी मोवा च्युङ्शी। आमिन।
22 अच्युनुपतिवा, ङ ख्यिराङला ठाकुरे सिरिन, ङे टोङ्गु बिन्दुप ति ङ्येना। दी टोङ्गु ति ङे ख्यिराङला चेयी तिराङ टिनी वोतो। 23 ङ ख्यिराङला दी ताम्ङे ति हाक्को ज्यितिन, दाक्पी नुप तिमोथी साङ चोन्खाङ ने थेन वोतो। दोजो ती ङमु राङ वासिन ङ तीकी मुला ख्यिराङला ठेतुपला वुङ्गुप्नो।
24 ख्यिराङला गोमा कितुप गेकेनतिवा ताङ तेरी तेपा कितुपतिवाला साङ टसी देलेक वे सिनी सिसा। तमा इटालिया नेसुर वावुतिवी साङ ख्यिराङला टसी देलेक सिनी तङ वोतो।
25 ख्यिराङ तेरीकी मिजीला कोन्छ्योककी कटिन नङ्शी।