1 ते फरिसी छ्‍योक्‍पाकी मीतिवी पर्ला निकोदेमस सिरुप यहूदीतिवाला गोमा कितुप मी मिरा च्‍यिक नोक। 2 ती निकोदेमस ति ङ्‍यिम्‍ज्‍यिक नुपला येशूकी चाला वानी, “गेकेन, गेकेन याङ कोन्‍छ्‍योककी तङ्‍गुप यिन सिरुप ति ङ्‍यिराङला छ्‍या वे। च्‍यिलासिसिन कोन्‍छ्‍योक गेकेनकी मुला मेतुप यिन्‍सिन गेकेनकी क्‍या नङ्‍गुप हलेवु ततिवा ति सी साङ छ्‍या देन मुथुपी।” सिनी सिक्‍यासुङ।

3 तमा येशूकी तीला “वुतुङ के ङ ख्‍युरुङला सिरिन, मीतिवा लोङ माक्‍येसुङ सिसिन सु साङ कोन्‍छ्‍योककी ग्‍येल्‍खाप थोङ मुथुपी।” सिनी सुङ्‍सुङ। 4 निकोदेमसकी खोला “मी गावा गल्‍सिमा चुक क्‍यानी क्‍ये थुप्‍किवी रो? काङ आमी खोकला शुनी येलुङ क्‍येकिवी रो?” सिनी टिसुङ। 5 तमा येशूकी तीला सुङ्‍सुङ, “वुतुङ के ङ ख्‍युरुङला सिरिन। छ्‍यु ताङ कोन्‍छ्‍योककी थु चाङ्‍मा नेमा माक्‍येसुङ सिसिन सु साङ कोन्‍छ्‍योककी ग्‍येल्‍खापला शुक मुथुपी। 6 जु नेमा क्‍येवु ति जु यिन, यिने कोन्‍छ्‍योककी थु चाङ्‍मा नेमा क्‍येवु ति थु यिन। 7 तुक क्‍यानी ङे ख्‍युरुङला लोङ क्‍ये गोकिवी सिनी सिक्‍यावु ताम्‍ङेला हलेवा माकी। 8 वुर्तुक ति खोरो नोवाला राङ ग्‍यकिवी। ख्‍योरो वुर्तुक ग्‍यपुप वोरु ति थोकिवी, यिने ती वुर्तुक कनी नेसुर वावु ताङ कनिवा डिवी सिरुप ति हाक्‍मोकोवी। कोन्‍छ्‍योककी थु चाङ्‍मा नेमा क्‍येवु मी ति तेरी तुकै राङ यिन।” 9 तमा निकोदेमसकी येशूला “ला! चुक क्‍यानी तुकै वुङ थुप्‍किवी रो?” सिनी टिसुङ।

10 येशूकी तीला सुङ्‍सुङ, “ख्‍युरुङ इस्राएलकी गेकेन यिन्‍सिनाङ ती ताम्‍ङे ति हाक्‍मोकोवी? 11 वुतुङ के ङ ख्‍युरुङला सिरिन, ङि्‍यरा काङ शेवु ति सिरिन, तमा काङ थोङ्‍गुप ति पङ्‍बु तेरिन। यिन्‍सिनाङ ङ्‍यिरा पङ्‍बु बिन्‍दुप ति ख्‍यिरा मेङ्‍येन्‍दिवी। 12 ङे ख्‍यिराङला जम्‍बुलिङकी ताम्‍ङे सिक्‍यासिनाङ तेपा मिकिनोक, तुकै यिन्‍सिन चुक क्‍यानी देवाच्‍येनकी ताम्‍ङे सिक्‍यासिन तेपा कि थुप्‍किवी रो? 13 देवाच्‍येन नेमा वावु ङ मी पुज्‍युङ मिसिन यम्‍बा सु साङ देवाच्‍येनला मागाल वे। 14 दासा पाङ्‍थेरीला मोशाकी सेर्मी रुल जोनी जोवाकी लोला लङ्‍गुप दोके मी पुज्‍युङ साङ लोङ गोकिवी। 15 ती ति खोला तेपा कितुप तेरीला नाम्‍साङ मिशिवु मिजी थोपुपला यिन। 16 कोन्‍छ्‍योककी जम्‍बुलिङकी मीतिवाला दुका ङ्‍यिङ्‍ज्‍ये क्‍या नाङ्‍नी खोकी च्‍यिक राङ वोतुप सेवु ति जम्‍बुलिङला ताङ्‍सुङ। ती ति सी खोला तेपा किवे, तिवा ङ्‍येलाला मोडोशी, यिने नाम्‍साङ मिशिवु मिजी थोप्‍शी सिनी यिन। 17 कोन्‍छ्‍योककी खोरे सेवु जम्‍बुलिङला तङ्‍गुप ति जम्‍बुलिङला ठिम कितुपला मिन, यिने खोकी सेवु नेसुर जम्‍बुलिङला र्‍होकुपला यिन। 18 सी खोला तेपा किवे, तीला ठिम मोफोकिवी। यिने तेपा मिकिवुतिवाला ति गोमाला के ठिम फोक्‍नी वे, च्‍यिलासिसिन तिवी कोन्‍छ्‍योककी च्‍यिक राङ वोतुप सेवुला तेपा माक्‍यावु तप्‍की यिन। 19 ती ठिम फोकुप ति दी यिन, कोन्‍छ्‍योककी जम्‍बुलिङला वोसिर तङ वे, यिने मीतिवा दुक्‍टा गलुप तप्‍की वोसिरला सिनाङ नक्‍तोमीला मङ सेमला गाल। 20 दुक्‍टा कितुप तेरी मीतिवा वोसिरला गा मिकिवी, तमा वोसिरकी चाला मेङ्‍गिवी। च्‍यिलासिसिन तिवा खोरो क्‍यावु दुक्‍टा ति मीतिवी थोङ्‍गिवी सिनी ज्‍यिवा किवी। 21 यिने टेङ्‍बु कितुपतिवा वोसिरकी चाला गिवी, च्‍यिलासिसिन तिवी क्‍यावु लाका ति वुतुङ के कोन्‍छ्‍योक नेमा राङ क्‍यावु यिन सिनी मी यम्‍बाला ठछ्‍येली हाक्‍को ज्‍यितुपला यिन।”

22 ती सुङ्‍सिमा येशू खोरो लोमातिवा ताङ मुला यहूदिया लुङ्‍बाला फेप्‍नी ते ङ्‍यिमा चेयी पर सेक ज्‍युनी मीतिवाला बप्‍तिस्‍मा नाङ्‍सुङ। 23 तमा यूहन्‍नाकी साङ सालीम सिरुप दासाकी चाला वोतुप एनोनला मीतिवाला बप्‍तिस्‍मा तेर्किनोक, च्‍यिलासिसिन ते छ्‍यु बङी वोतुप तप्‍की यिन। मीतिवा ङ्‍यिमी टेङ यूहन्‍नाकी चाला वानी बप्‍तिस्‍मा लङ्‍गिनोक। 24 ती पेला सेक यूहन्‍ना ति चोन्‍खाङला माशोर्नोक। 25 तमा यूहन्‍नाकी लोमातिवा ताङ ललाइ यहूदी मी यीकी पर्ला जु चाङ्‍मा जोप यहूदी लुक्‍सुकी कोर्ला लप्‍सिर ग्‍यक्‍टी चेसुङ। 26 ती ज्‍युक्‍ला यूहन्‍नाकी लोमातिवा यूहन्‍नाकी चाला वानी, “गेकेन, गोमाला गेकेन ताङ मुला यर्दन चङ्‍बी फर्केनला वोतुप गेकेनकी पङ्‍बु बिन्‍दुप ती मी ति मीतिवाला बप्‍तिस्‍मा तेरिन नोक, तमा मीतिवा तेरी खोकी चाला डिनोक।” सिनी सिक्‍यासुङ। 27 तमा यूहन्‍नाकी तिवाला दुक सिक्‍यासुङ, “कोन्‍छ्‍योककी देवाच्‍येन नेमा मानाङ्‍सिन मीकी काङ साङ ङ्‍ये मुथुपी। 28 ‘ङ ति ख्रीष्‍ट मिन, यिने खो सिनाङ गोमाला तङ्‍गुप ति यिन।’ सिनी ङे सिक्‍यावु ताम्‍ङेला पङ्‍बु तेरुप ति ख्‍यिराङ राङ यिन। 29 नमाला जेन्‍दी कितुप ति माक्‍पा यिन, यिने माक्‍पी क्‍योल्‍मिन ति माक्‍पी चाला लान देनी माक्‍पी वोरु थोसिमा छासे गा किवी। तुक राङ क्‍यानी ङला छासे गा ला वे। 30 खो ति मङ मङ फेल गोकिवी, ङ ति मङ मङ ङ्‍युङ गोकिवी।”

31 “देवाच्‍येन नेमा फेवु ति तेर ताङ सिनाङ चोछ्‍ये वे। जम्‍बुलिङकी मी ति जम्‍बुलिङकी मी राङ यिन, तमा जम्‍बुलिङकी थोक्‍ला तिराङ ताम्‍ङे किवी। यिने देवाच्‍येन नेमा फेवु ति तेरी सिनाङ चोछ्‍ये वे। 32 तमा खोकी देवाच्‍येन नेमा काङ थोङ्‍गुप ताङ काङ थोवु ति पङ्‍बु नङ्‍गिवी। यिन्‍सिनाङ सी साङ खोकी सुङ्‍गुप पङ्‍बुला तेपा मिकिवी। 33 यिने सी खोकी पङ्‍बुला तेपा किवे, तीकी कोन्‍छ्‍योक ति टेङ्‍बु वे सिनी तेन्‍तेन किवी। 34 कोन्‍छ्‍योककी तङ्‍गुप तीकी कोन्‍छ्‍योककी सुङ लप्‍किवी, च्‍यिलासिसिन कोन्‍छ्‍योककी तीला खोकी थु चाङ्‍मा छासे मङ्‍मु नङ्‍गुप तप्‍की यिन। 35 पपा कोन्‍छ्‍योककी खोरे सेवुला ङ्‍यिङ्‍ज्‍ये क्‍या नाङ्‍नी तेरी ओङ्‍ज्‍येन ति खोला चेक तेन नाङ्‍सुङ। 36 सी कोन्‍छ्‍योककी सेवुला तेपा किवे, तीला नाम्‍साङ मिशिवु मिजी थोप्‍किवी। यिने सी कोन्‍छ्‍योककी सेवुला तेपा मिकिवे, तीला ती मिजी मोथोपिवी, बोरु कोन्‍छ्‍योककी पर्च्या तीकी खला ख्‍येल्‍गिवी।”