1 येशूकी यूहन्‍नाकी सिनाङ मङ लोमातिवा जोवु ताङ बप्‍तिस्‍मा नङ्‍गुप ताम्‍ङे फरिसीतिवी थोवु ति येशूकी हाक्‍कोनोक। 2 यिने बप्‍तिस्‍मा नङ्‍गुप ति येशूकी मिन, खोकी लोमातिवी तेर्किनोक। 3 ती ताम्‍ङे हाक्‍कोनी येशू खोकी लोमातिवा ताङ मुला यहूदिया लुङ्‍बा क्‍युर ज्‍याक्‍नी येलुङ गालील लुङ्‍बाला लोक्‍नी फेपिन नोक। 4 खो फेपुप पेला सामरिया लुङ्‍बा नेवा क्‍यानी फेप गोकिनोक। 5 खो फेप्‍सालेन्‍सिन सामरिया लुङ्‍बाकी सुखार सिरुप ग्‍येसाला लेप्‍सुङ। ती ग्‍येसा ति याकूबकी खोरो पुज्‍युङ योसेफला बिन्‍दुप शिङगी चिप्‍ला राङ ख्‍येल्‍गिनोक। 6 तमा ते याकूबकी जोवु टोम्‍बा यी नोक। येशू युक्‍सा युक्‍सा येन छ्‍येतुप तप्‍की ती टोम्‍बी चाला ज्‍युसुङ। ती पेला ङ्‍यिमी गुङगी छ्‍युजी च्‍यिङ्‍ङी चोयी गाल्‍नोक।

7 ते सामरी पुम्‍पेजा यी छ्‍यु च्‍यकुपला वानोक। तमा येशूकी तीला “ङला थुङ्‍गुप छ्‍यु चेयी नाङ्‍नी।” सिनी सुङ्‍सुङ। 8 ती पेला खोकी लोमातिवा ति साप समा ङ्‍योपला ग्‍येसाला गाल्‍नोक। 9 तमा पुम्‍पेजा तीकी खोला “अच्‍यु ति यहूदी यिन, ङ ति सामरी पुम्‍पेजा यिन। चुक क्‍यानी अच्‍यी ङला छ्‍यु नाङ सिनी सुङ्‍गुप यिन?” सिनी सिक्‍यासुङ। (यहूदीतिवा सामरीतिवी मुला काङ साङ ख मिडिक्‍नोक।) 10 तमा येशूकी ती पुम्‍पेजा तीला सुङ्‍सुङ, “ख्‍युरुङ कोन्‍छ्‍योककी ङ्‍येम्‍बा ताङ ख्‍युरुङला छ्‍यु लोङ्‍गुप मी ति सु यिन सिनी ङो शेसिन तीला ख्‍योरे लोङ्‍गुप्‍जा, तमा खोकी ख्‍युरुङला मिजी तेरुप छ्‍यु तेरुप्‍जा।” 11 तमा ती पुम्‍पेजा तीकी येशूला “अच्‍यी लोला याङ छ्‍यु च्‍यकुप नेक्‍योक साङ मे, दी टोम्‍बा साङ तिङ्‍मु वे। तुक क्यानी अच्‍यी कनी नेसुर मिजी तेरुप छ्‍यु ति खुर्नी वुङ थुप्‍किवी रो? 12 काङ अच्‍यु ङ्‍यिरा हङ्‍गावा याकूब सिनाङ छ्‍ये यिन रो? तीकी दी टोम्‍बा ति ङ्‍यिरा थोक्‍ला जोनी बिन्‍दुप यिन। तमा ती ताङ तीकी पेजातिवा ताङ तीकी रा छ्‍युङ्‍मातिवा तेरीकी दी छ्‍यु थुवु यिन।” सिनी सिक्‍यासुङ। 13 तमा येशूकी तीला दुक सुङ्‍सुङ, “दी छ्‍यु थुङ्‍गुपतिवा तेरीला येलुङ कोम्‍बा लङ्‍गिवी, 14 यिने ङे तेरुप छ्‍यु थुङ्‍गुपतिवाला नाम्‍साङ कोम्‍बा मालङ्‍गिवी। तमा ती छ्‍यु ति तिवी मिजी नेमा नरी दोलुप छ्‍यी पुङ दोके च्‍युङ्‍नी तिवाला नाम्‍साङ मिशिवु मिजी तेर्किवी।” 15 तमा ती पुम्‍पेजा तीकी खोला “अच्‍यो, ती छ्‍यु ति ङला नङ्‍नी ङला नाम्‍साङ कोम्‍बा मालङ्‍शी, तमा ङ दे छ्‍यु च्‍यकुपला नरी वुङ साङ मोगोशी।” सिनी सिक्‍यासुङ।

16 तमा खोकी तीला “ख्‍युरुङ गल्‍नी ख्‍योरो ख्‍योवाला कताङ्‍नी दे टि शोक।” सिनी सुङ्‍सुङ। 17 तमा तीकी “ङे ति याङ ख्‍योवा राङ मे।” सिनी सिक्‍यासुङ। येशूकी तीला सुङ्‍सुङ, “ख्‍योरो ख्‍योवा मे सिक्‍यावु ति टेके राङ यिन। 18 च्‍यिलासिसिन ख्‍योरो ति ख्‍योवा मिरा ङ चोके च्‍युङ्‍नोक, तमा तन्‍दा ख्‍योरो मुला वोतुप ति ख्‍योरो ख्‍योवा मिन। तुक क्‍यानी ख्‍योरो टेके राङ सिक्‍यासुङ।” 19 तमा ती पुम्‍पेजा तीकी सिक्‍यासुङ, “अच्‍यो, अच्‍यु याङ कोन्‍छ्‍योककी लुङ्‍तेम्‍बा यिनोक सिनी ङे हाक्‍कोसुङ। 20 ङ्‍यिरा सामरी हङ्‍गावातिवी दी पम्‍दोकला राङ कोन्‍छ्‍योकला सोवा तेक्‍सुङ। यिने अच्‍यु यहूदीतिवी याङ कोन्‍छ्‍योकला सोवा देक गोवु दासा ति यरूशलेमला राङ वे सिनी सिनोक।” 21 तमा येशूकी तीला सुङ्‍सुङ, “ओ नुमो, ङला तेपा की। तुजे यी गितो, ती तुजेला ख्‍यिराङ दी पम्‍दोकला साङ यरूशलेमला साङ कोन्‍छ्‍योकला सोवा मेदेकिवी। 22 ख्‍यिराङ सामरीतिवी याङ ङो मेशेवु तीला सोवा देकिवी, यिने ङ्‍यिराङ यहूदीतिवा ति ङो शेवु तीला सोवा देकिवी, च्‍यिलासिसिन दिक्‍पा ने थर ज्‍यितुप ति यहूदीतिवा नेसुर राङ गिवी। 23 कोन्‍छ्‍योकला सोवा देकुपतिवी कोन्‍छ्‍योककी थु चाङ्‍मा ताङ सेम टेङ्‍बो क्‍यानी खोला सोवा देकुप तुजे वुङ्‍यिन वे, तमा ती तुजे ति तन्‍दा राङ यिन। पपा कोन्‍छ्‍योककी टेङ्‍बो क्‍यानी खोला सोवा देकुपतिवाला छोल्‍गिवी। 24 कोन्‍छ्‍योक ति थु यिन, तुक क्‍यानी खोला सोवा देकुपतिवी खोकी थु चाङ्‍मा ताङ सेम टेङ्‍बु क्‍यानी सोवा देक गोकिवी।” 25 तमा ती पुम्‍पेजा तीकी येशूला “ख्रीष्‍ट सिरुप मसीह फेपुप ति ङला छ्‍या वे। खो फेप्‍सिमा खोकी राङ ङि्‍यराङला तेरी ताम्‍ङेतिवा शेकिवी।” सिनी सिक्‍यासुङ। 26 तमा येशूकी तीला सुङ्‍सुङ, “तन्‍दा ख्‍योरो मुला ताम्‍ङे कियी वोतुप ङ ति ती राङ यिन।”

27 ती पेला राङ खोकी लोमातिवा लेसुङ, तमा येशूकी ती पुम्‍पेजा ताङ मुला ताम्‍ङे कियी वोतुप थोङ्‍नी तिवा छासे हलेवा लासुङ। यिन्‍सिनाङ तिवी नाङ ने सी साङ “गेकेनला काङ गोसुङ?” याङ्‍ना “च्‍यिला गेकेनकी ती पुम्‍पेजा ताङ मुला अरा उरा सुङ्‍गुप यिन?” सिनी येशूला माटी।

28 तमा ती पुम्‍पेजा ति खोरो दिङ्‍गर क्‍युर ज्‍याक्‍नी खोरो युलला छ्‍योङ्‍बाल ग्‍यम लोङ गल्‍नी युलकी मीतिवाला 29 “दे फेप्‍नी दी मी तीला ल्हो ताङ! ती मी तीला ङे क्‍यावु लाकातिवा तेरी छ्‍या नोक। खो ति ख्रीष्‍ट राङ मिन?” सिनी सिक्‍यासुङ। 30 तमा मीतिवा युल नेसुर थेन्‍नी येशूला ल्‍हापला वुङ्‍यिन नोक।

31 मीतिवा वुङ्‍यिन कितुप पेला येशूकी लोमातिवी खोला “गेकेन, सोल शे।” सिनी खोला गोङ्‍बा शुसुङ। 32 यिने खोकी “ङे मुला याङ ख्‍युरुङला छ्‍या मेतुप साप समा वे।” सिनी तिवाला सुङ्‍सुङ। 33 खोकी तुक सुङ्‍सिमा लोमातिवा च्‍यिककी च्‍यिकला “मी ललाइकी सोल खुर्न वानी खोला शुते यिन्‍दे?” सिनी सिक्‍यासुङ। 34 तमा येशूकी लोमातिवाला सुङ्‍सुङ, “ङे समा ति ङला तोङ्‍गुप कोन्‍छ्‍योककी नोवाला वोतुप दोके कितुप ताङ खोकी ङला कि ज्‍यितुप लाका तेरी कितुप यिन। 35 ख्‍यिरा ‘सप्‍ले दुतुपला तरोङ साङ ल ज्‍यी लु वे।’ सिनी मिसिरी रो? यिने ङ ख्‍यिराङला सिरिन, ख्‍यिराङ सप्‍ले छोवु शिङला ल्‍यामो क्‍यानी ल्हो, सप्‍ले छोनी साङ दुतुप पेला लेप्‍नी वे। 36 सप्‍ले दुतुपतिवाला ल थोप्‍किवी, तमा तिवी ति नाम्‍साङ मिशिवु मिजी थोपुप डुमा दुकिवी। तमा सप्‍ले देपुप ताङ दुतुप ङ्‍यिकर मुला राङ गा किवी। 37 तुक क्‍यानी ‘मिरा च्‍यिककी सप्‍ले देप्‍किवी, तमा यम्‍बा तीकी सप्‍ले दुकिवी।’ सिनी सिक्‍यावु ति टेके डिकिवी। 38 ङे ख्‍यिराङला मी यम्‍बी हुर्ताक क्‍यानी तपुप सप्‍ले दुतुपला तङ्‍यिन। ख्‍यिरा याङ हुर्ताक माक्‍या, यिने मी यम्‍बी हुर्ताक क्‍यानी ङ्‍येतुप नेसुर ख्‍येप्‍साङ ङ्‍येन वे।”

39 ती सामरी पुम्‍पेजा तीकी “ङे काङ क्‍या वे, ती तेरी खोकी ङला सुङ्‍सुङ।” सिनी येशूकी कोर्ला पङ्‍बु बिन्‍दुप तप्‍की ती युलकी सामरीतिवा बङीकी खोला तेपा क्‍यासुङ। 40 तुक क्‍यानी तिवा खोकी चाला वानी तिवी मुला राङ ज्‍यु सिनी खोला गोङ्‍बा शुसुङ। तमा खो ङ्‍यिमा ङ्‍यी सेक तिवी मुला राङ ज्‍युसुङ। 41 ते मीतिवी मङ मङ खोकी सुङ थोनी खोला तेपा क्‍यासुङ। 42 तमा तिवी ती पुम्‍पेजाला “तन्‍दा ङ्‍यिरा तेपा क्‍यावु ति ख्‍योरे सिक्‍यावु तप्‍की मिन, ङ्‍यिरा राङ खोकी सुङ थोनी खो ति वुतुङ के जम्‍बुलिङकी मीतिवाला दिक्‍पा ने थर ज्‍यितुप यिनोक सिनी हाक्‍कोवु तप्‍की यिन।” सिनी सिक्‍यासुङ।

43 तमा ते येशू ङ्‍यिमा ङ्‍यी ज्‍युसिमा तेसुर गालील लुङ्‍बाला फेप्‍सुङ। 44 गोमाला थेङ्‍मा यी येशूकी “कोन्‍छ्‍योककी लुङ्‍तेम्‍बाला खोरो लुङ्‍बा नेसुर मीतिवी ताङ्‍देन मिकिवी।” सिनी सुङ्‍नोक। 45 तमा खो गालीलला फेप्‍सिमा गालीलकी मीतिवी खोला गासो शुसुङ, च्‍यिलासिसिन तिवा साङ यहूदी थरुप तुछ्‍येनला यरूशलेमला गलुप पेला खोकी क्‍या नङ्‍गुप तेरी हलेवु लाका थोङ्‍नोक।

46 तमा येशू गालील लुङ्‍बाकी काना सिरुप ग्‍येसाला लोङ फेप्‍सुङ। ती ग्‍येसा ति गोमाला खोकी छ्‍यु ति गुन्‍डुम छ्‍याङला ग्‍युर च्‍यितुप दासा यिन। ते लुङ्‍बाकी मी छ्‍ये यी नोक, तीकी पुज्‍युङ ति कफर्नहुमला ना नोक। 47 ती मी छ्‍ये तीकी येशू यहूदिया नेसुर गालीलला फेम वे सिरुप ताम्‍ङे थोनी येशूकी चाला वानी, “गेकेन, ठाकुरे फेप्‍नी ङे पुज्‍युङला टेक च्‍यिनी।” सिनी खोला गोङ्‍बा शुसुङ। च्‍यिलासिसिन ती पेला तीकी पुज्‍युङ ति नानी शिला के नोक। 48 तमा येशूकी तीला “ख्‍यिरा ततिवा ताङ हलेवु लाकातिवा माथोङा सेक्‍ला नाम्‍साङ तेपा मिकिवी।” सिनी सुङ्‍सुङ। 49 ती मी तीकी “ओ गेकेन, ङे पुज्‍युङ शेप सिनाङ गोमाला के मर फेप्‍नी तीला टेक च्‍यिनी।” सिनी खोला मङ गोङ्‍बा शुसुङ। 50 तमा येशूकी तीला “ख्‍युरुङ खाङ्‍बा ग्‍युक, ख्‍योरो पुज्‍युङ सेन्‍बु लङ्‍गिवी।” सिनी सुङ्‍सुङ। खोकी तुक सुङ्‍गुप ताम्‍ङेला तेपा क्‍यानी ती मी ति खोरो खाङ्‍बा नेवा गाल।

51 ती मी ति मर डोयी कितुप पेला तीकी लावातिवी तीला लामला ठेनी तीकी पुज्‍युङ सेन्‍बु लासुङ सिनी सिक्‍यासुङ। 52 तमा तीकी खोरो पुज्‍युङ चो पेला टेक्‍सुङ सिनी लावातिवाला टिसालेन्‍सिन तिवी “दाङ ङ्‍यिमी गुङगी छ्‍युजी च्‍यिक चोयीला टेक्‍सुङ।” सिनी सिक्‍यासुङ। 53 तमा ती पुज्‍युङकी पपा तीकी ती तुजे ति येशूकी खुरुङला “ख्‍योरो पुज्‍युङ सेन्‍बु लङ्‍गिवी।” सिनी सुङ्‍गुप तुजे यिन सिरुप ति हाक्‍कोसुङ। तुक क्‍यानी खुरुङ ताङ खोरो मिछाङतिवा तेरीकी येशूला तेपा क्‍यासुङ। 54 दी त ति येशू यहूदिया नेसुर गालीलला लोङ फेप्‍सिमा छ्‍या तेन नङ्‍गुप हलेवु त ङ्‍यिवा यिन।