3
बप्तिस्मा तेरुप यूहन्नाकी ख्याप्टाक क्यावु
(मत्ती ३:१-१२; मर्कूस १:१-८; यूहन्ना १:१९-२८)
1 रोमी ग्येल्वु कैसर तिबेरिअसकी ग्येला क्यावु लो च्येङाला पन्तियस पिलातस ति यहूदिया लुङ्बाला रोमी ठिम कितुप मी छ्ये नोक। तमा हेरोद ति गालील लुङ्बाला ग्येला किनोक, तीकी नुप फिलिप ति इतुरिया ताङ त्राखोनितिस लुङ्बाला ग्येला किनोक। तमा लुसानियास ति अबिलेने लुङ्बाला ग्येला किनोक। 2 तोजो पेला हन्नास ताङ कैयाफा ति यहूदी ल्हङाङला तेरी सिनाङ कोङ्यार छ्ये यिनोक। ती पेला कोन्छ्योककी सुङ ति दासा पाङ्थेरीला वोतुप जकरियाकी पुज्युङ यूहन्नाला लेसुङ। 3 तमा यूहन्ना ति यर्दन चङ्बुकी फार छुरकी तेरी लुङ्बाला गल्नी मीतिवाला “ख्यिराङ दाक दाक्पी दिक्पा ने सेम ग्युर्नी बप्तिस्मा लो, तमा कोन्छ्योककी ख्यिरा दिक्पा ता ज्यिकिवी।” सिनी ख्याप्टाक क्यासुङ। 4 ती ति कोन्छ्योककी लुङ्तेम्बा यशैयाकी कोन्छ्योककी सुङला टिवु दोके राङ च्युङ्सुङ।
“दासा पाङ्थेरीला मिरा च्यिककी थोर ग्यप्नी सिवी,
‘चोवो फेपुप लाम टडिक की।
खोकी थोक्ला लाम थेकाङ जो।
5 तेरी बुक्योकतिवा सोप गोकिवी,
तेरी री ताङ पम्दोकतिवा तेल गोकिवी,
लाम क्यका क्योकातिवा थेकाङ जो गोकिवी।
तमा लाम कलेतिवा जोल्हमु जो गोकिवी।
6 तमा तेरी मीतिवी कोन्छ्योककी थर्वा नङ्गुप ति थोङ्गिवी।’ ”
7 खोरो चाला बप्तिस्मा लङ वावु मीतिवाला यूहन्नाकी दुक सिक्यासुङ, “ओ, रुल कुपेङकी च्यप्रुक दोके दुक्टा वोतुपतिवा, त वुङ्गुप कोन्छ्योककी पर्च्या नेमा टो सिनी सी ख्यिराङला लाप्सुङ? 8 वुतुङ के ख्यिराङ दिक्पा ने सेम ग्युर्नी कोन्छ्योककी थाकाला वावु यिन्सिन ती दोके लाका ल्यामु की। तमा ख्यिरा सेमला ‘दाक्पु ति अब्राहामकी गिपा यिन।’ सिनी सिरुप माछोल। च्यिलासिसिन ङ ख्यिराङला सिरिन, कोन्छ्योककी दी दोतिवा नेसुर साङ अब्राहामकी गिपा जो थुप्किवी। 9 दोङ्बी शापला तरी ख्येल्नी सिन वे, तमा डेलु ल्यामु मोगोरुप तेरी दोङ्बुतिवा च्येनी मे नाङ्ला क्युर्किवी।”
10 तमा मीतिवी यूहन्नाला “तुकै यिन्सिन ङ्यिराङ ति काङ कि गोकिवी?” सिनी टिसुङ। 11 यूहन्नाकी तिवाला सिक्यासुङ, “सी मुला छ्योवा ङ्यी नोके, तीकी मेतुपतिवाला तेर्शी। सी मुला साप समा नोके, तीकी साङ मेतुपतिवाला तेर्शी।” 12 से दुतुपतिवा साङ बप्तिस्मा लङ्गुपला ते वानी यूहन्नाला “गेकेन, ङ्यिराङ ति काङ कि गोकिवी?” सिनी टिसुङ। 13 तमा यूहन्नाकी तिवाला सिक्यासुङ, “ख्यिरा दु गोवु सिनाङ ल्हक्पा से मादु।” 14 तमा मक्मीतिवी साङ टिसुङ, “ङ्यिराङ ति काङ कि गोकिवी?” यूहन्नाकी तिवाला सिक्यासुङ, “सु नेसुर साङ वुर्च्युम ग्यप्नी टङ्गा माठोक, तमा क्येन मेटेङ्बु ग्यप्नी माठोक, बोरु दाक दाक्पी थोपुप लला लोदिवा क्यानी दे।”
15 मीतिवा थर्वा नङ्गुप ख्रीष्टला रेवा क्यानी गुन देतुप तप्की तिवी नासामला “यूहन्ना ति ख्रीष्ट यिन्दे यिन्दे।” सिनी नो क्यानोक। 16 तिवी नोवा हाक्कोनी यूहन्नाकी तिवा तेरीला सिक्यासुङ, “ङ ख्यिराङला छ्यु थ्वोनी बप्तिस्मा तेरिन, यिने ङ सिनाङ मङ ओङ छ्येवु वोतुप मी यी फेपिन वे। ङ याङ खोकी शप्चेकी र्हाम्डोक डोलुप साङ पोमु मे। खोकी ख्यिराङला कोन्छ्योककी थु चाङ्मा ताङ मे नेसुर बप्तिस्मा नङ्गिवी। 17 खोकी लकला ग्यालुक वे, ती ग्यालुक थ्वोनी खोरो लेङाङला वोतुप डुप्सेनतिवा च्यर्नी डुमा ति खोरो पङाङ नाङ्ला दुम ज्योकिवी, तमा फुङ्मा ति नाम्साङ मिशिवु मे नाङ्ला र्हेकिवी।”
18 यूहन्नाकी यम्बा टोङ्गुतिवा साङ बङी बिन्नी मीतिवाला लेन ल्यामु ख्याप्टाक क्यासुङ। 19 यिने ग्येल्वु हेरोदकी खोरो नुपकी पेर्मी हेरोदियासला खोरो पेर्मी जोनी ज्यकुप ताङ तीकी क्यावु यम्बा दुक्टातिवी थोक्ला यूहन्नाकी तीला वोरु तेन्सुङ। 20 तमा हेरोदकी मङ दुक्टा क्यानी यूहन्नाला चोन्खाङ नाङ्ला उप्सुङ।
येशूकी बप्तिस्मा लावु
(मत्ती ३:१३-१७; मर्कूस १:९-११; यूहन्ना १:३२-३४)
21 तमा तेरी मीतिवी बप्तिस्मा लासुङ। येशूकी साङ बप्तिस्मा लानी मोपोर कियी वोतुप पेला देवाच्येन सेसुङ। 22 ती पेला कोन्छ्योककी थु चाङ्मा ति गम्देर दोके क्यानी खोकी खला पाप्सुङ। तमा देवाच्येन नेमा “ख्युरुङ ङे ङ्यिङ्ज्येवु पुज्युङ यिन, ख्योरो मुला ङ छासे गा ला वे।” सिरुप वोरु यी वासुङ।
येशू ख्रीष्टकी हङ्गावातिवा
(मत्ती १:१-१७)
23 येशू कोन्छ्योककी सुङ ख्याप्टाक कितुप लाका गो जुवु पेला खो ति लो खल्ज्यिक ताङ च्यिथम्बा चोयी लेप्नोक। मीतिवी खोला योसेफकी पुज्युङ यिन सिनी नासाम तोङ्गिनोक। योसेफ ति एलीकी पुज्युङ नोक, 24 एली ति मत्तातकी पुज्युङ, मत्तात ति लेवीकी पुज्युङ, लेवी ति मल्कीकी पुज्युङ, मल्की ति यान्नाकी पुज्युङ, 25 यान्ना ति योसेफ मत्ताथियासकी पुज्युङ, मत्ताथियास ति आमोसकी पुज्युङ, आमोस ति नहूमकी पुज्युङ, नहूम ति इसलीकी पुज्युङ, इसली ति नग्गैकी पुज्युङ, 26 नग्गै ति माथकी पुज्युङ, माथ ति मत्ताथियासकी पुज्युङ, मत्ताथियास ति सेमैनकी पुज्युङ, सेमैन ति योसेखकी पुज्युङ, तमा योसेख ति योदाकी पुज्युङ नोक। 27 योदा ति योआननकी पुज्युङ, योआनन ति रेसाकी पुज्युङ, रेसा ति यरुबाबेलकी पुज्युङ, यरुबाबेल ति शालतिएलकी पुज्युङ, शालतिएल ति नेरीकी पुज्युङ, 28 नेरी ति मल्कीकी पुज्युङ, मल्की ति अद्दीकी पुज्युङ, अद्दी ति कोसामकी पुज्युङ, कोसाम ति एलमादमकी पुज्युङ, एलमादम ति एरकी पुज्युङ, 29 एर ति यहोशूकी पुज्युङ, यहोशू ति एलीएजरकी पुज्युङ, एलीएजर ति योरिमकी पुज्युङ, योरिम ति मत्तातकी पुज्युङ, मत्तात ति लेवीकी पुज्युङ, 30 लेवी ति शिमियोनकी पुज्युङ, शिमियोन ति यहूदाकी पुज्युङ, यहूदा ति योसेफकी पुज्युङ, योसेफ ति योनानकी पुज्युङ, योनान ति एल्याकीमकी पुज्युङ नोक। 31 एल्याकीम ति मलेआकी पुज्युङ, मलेआ ति मिन्नाकी पुज्युङ, मिन्ना ति मत्ताथाकी पुज्युङ, मत्ताथा ति नातानकी पुज्युङ, नातान ति दाऊदकी पुज्युङ, 32 दाऊद ति यिशैकी पुज्युङ, यिशै ति ओबेदकी पुज्युङ, ओबेद ति बोअजकी पुज्युङ, बोअज ति सल्मोनकी पुज्युङ, सल्मोन ति नहशोनकी पुज्युङ, 33 नहशोन ति अम्मीनादाबकी पुज्युङ, अम्मीनादाब ति आरामकी पुज्युङ, आराम ति हेस्रोनकी पुज्युङ, हेस्रोन ति फारेसकी पुज्युङ, फारेस ति यहूदाकी पुज्युङ, 34 यहूदा ति याकूबकी पुज्युङ, याकूब ति इसहाककी पुज्युङ, इसहाक ति अब्राहामकी पुज्युङ, अब्राहाम ति तेरहकी पुज्युङ, तेरह ति नाहोरकी पुज्युङ नोक। 35 नाहोर ति सरूगकी पुज्युङ, सरूग ति रऊकी पुज्युङ, रऊ ति पेलेगकी पुज्युङ, पेलेग ति एबेरकी पुज्युङ, एबेर ति शेलहकी पुज्युङ, 36 शेलह ति केनानकी पुज्युङ, केनान ति अर्पक्षदकी पुज्युङ, अर्पक्षद ति शेमकी पुज्युङ, शेम ति नोआकी पुज्युङ, नोआ ति लेमेखकी पुज्युङ, 37 लेमेख ति मतूशेलहकी पुज्युङ, मतूशेलह ति हनोककी पुज्युङ, हनोक ति येरेदकी पुज्युङ, येरेद ति महलालेलकी पुज्युङ, महलालेल ति केनानकी पुज्युङ, 38 केनान ति एनोशकी पुज्युङ, एनोश ति शेतकी पुज्युङ, शेत ति आदमकी पुज्युङ नोक, तमा आदम ति कोन्छ्योककी पुज्युङ यिनोक।