1 तमा येशूकी लोमा मिरा च्‍यिङ्‍ङीतिवाला खोरे चाला कताङ्‍नी तिवाला तेरी डेतिवा थेन्‍दुप ताङ नेजुतिवा टेक ज्‍यितुप ङार ताङ ओङ्‍ज्‍येन नाङ्‍सुङ, 2 तमा तिवाला कोन्‍छ्‍योककी ग्‍येल्‍खाप ख्‍याप्‍टाक कितुप ताङ नेर्पुतिवाला टेक ज्‍यितुपला ताङ्‍सुङ। 3 तोङ्‍गुप पेला खोकी तिवाला सुङ्‍सुङ, “ख्‍यिराङ लामला डोप पेला ख्‍यिरा लोला काङ साङ माखुर, लकाम साङ गिवु साङ शुब्‍ज्‍याङ साङ टङ्‍गा साङ पोयप कितुप मज्‍या साङ माखुर। 4 ख्‍यिराङ चुका खाङ्‍बी नाङ्‍ला शुकिवे, ती ग्‍येसा ने थेन मागल्‍वा सेक्‍ला ते राङ देता। 5 चुका दासाला मीतिवी ख्‍यिराङला गासो मुशुवे, ती ग्‍येसा नेवा थेन डोप पेला ख्‍यिरा काङ्‍बाला कोवु थल्‍दुक र्‍हुन ज्‍याक्‍नी तिवी तेन्‍दोकला पङ्‍बु बिन।” 6 तमा लोमातिवा तेसुर गल्‍नी युल युलला कोन्‍छ्‍योककी लेन ल्‍यामु ख्‍याप्‍टाक कियी नेर्पुतिवाला टेक च्‍यिसुङ।

7 तमा दी तेरी च्‍युङ्‍गुप ताम्‍ङेतिवी कोर्ला गालील लुङ्‍बाला ग्‍येला कितुप हेरोदकी थोनी तीकी सेम ति छासे ख्‍यला ख्‍यिला गाल्‍नोक। च्‍यिलासिसिन ललाइकी बप्‍तिस्‍मा तेरुप यूहन्‍ना ति शेप ने सेन्‍बु लानोक सिनी सिनोक, 8 ललाइकी एलिया के छ्‍यार्सुङ सिनोक, तमा ललाइकी तोङगी कोन्‍छ्‍योककी लुङ्‍तेम्बातिवी पर नेमा मिरा च्‍यिक येलुङ सेन्‍बु लानोक सिनी सिक्‍यानोक। 9 यिने हेरोदकी “यूहन्‍नाकी गो याङ ङे च्‍ये च्‍यितिन। तुकै यिन्‍सिन ङे दुका ताम्‍ङेतिवा थोवु ती मी ति सु यिनाङ?” सिनी सिक्‍यासुङ। तमा तीकी येशूला ठेतुप नो क्‍यासुङ।

10 ती ज्‍युक्‍ला लोमातिवा लोक्‍नी वानी खोप्‍रे क्‍यावु तेरी लाकाकी कोर्ला येशूला लाप्‍सुङ। तमा खोकी तिवाला टिनी खोप्‍राङ तिराङ बेथसेदा सिरुप ग्‍येसाला फेप्‍सुङ। 11 यिने मी मङ्‍मुकी दी ताम्‍ङे हाक्‍कोनी खोला तिङ्‍यासुङ। खोकी तिवाला गासो शुनी तिवाला कोन्‍छ्‍योककी ग्‍येल्‍खापकी कोर्ला लाप नाङ्‍सुङ, नेजु टेक ज्‍यि गोवुतिवाला टेक च्‍यिसुङ।

12 तमा नाम ल्‍होवु पेला लोमा च्‍यिङ्‍यीतिवा येशूकी चिप्‍ला वानी सिक्‍यासुङ, “गेकेन, दी मीतिवाला देवा तोङ, तमा तिवा गारी गुरीला वोतुप युलतिवा ताङ सप्‍ले कितुपतिवी खाङ्‍बा गल्‍नी दाक दाक्‍पी थोक्‍ला साप समा ताङ देतुप दासा छोल्शी। दी दाक्‍पु देतुप ति काङ साङ मेङ्‍येवु दासा पाङ्‍थेरी यिन।” 13 यिने येशूकी तिवाला “ख्‍यिरा राङ दिवाला साप समा बिन।” सिनी सुङ्‍सुङ। तमा तिवी “ङ्‍यिरा मुला याङ शुब्‍ज्‍याङ ङ चोके ताङ ङ्‍या ङ्‍यी चोके तिराङ वे। ङ्‍यिराङ गल्‍नी दी तेरी मीतिवी थोक्‍ला साप समा ङ्‍यो गोकिते यिन्‍दे।” सिनी सिक्‍यासुङ। 14 ते तो मिसिन ख्‍योक्‍पेजा मिरा तोङ्‍डा ङ नोक। यिने येशूकी लोमातिवाला सुङ्‍सुङ, “ख्‍यिरा मीतिवाला खल ङ ङकी छो जोनी दे च्‍यी।” 15 तमा लोमातिवी तुक राङ क्‍यानी तेरीला दे च्‍यिसुङ। 16 तमा येशूकी ती शुब्‍ज्‍याङ ङ चोके ताङ ङ्‍या ङ्‍यी चोके छ्‍याकला लानी देवाच्‍येन ने ल्‍हानी कोन्‍छ्‍योकला थुचिछे पुल्‍सिमा तिवा ति च्‍याक्‍नी मीतिवाला गोनी बिन सिनी लोमातिवाला तेसुङ। 17 तिवा तेरी डाता सेक सोसुङ, तमा ल्‍हकुप पुर्मातिवा रुक्‍सालेन्‍सिन तोलुम च्‍यिङ्‍ङी क्‍येङ्‍सुङ।

18 थेङ्‍मा यी येशू च्‍यिक राङ मोपोर कियी वोतुप पेला खोकी लोमातिवा साङ खोकी मुला राङ नोक। खोकी तिवाला दुक सिनी टि नाङ्‍सुङ, “मीतिवी ङला सु यिन सिनी सिनोक?” 19 तमा तिवी “ललाइकी बप्‍तिस्‍मा तेरुप यूहन्‍ना सिनी सिनोक, ललाइकी एलिया सिनी सिनोक, तमा यम्‍बातिवी तोङगी कोन्‍छ्‍योककी लुङ्‍तेम्बातिवी पर ने मिरा च्‍यिक सेन्‍बु लानोक सिनी सिनोक।” सिनी टिलेन ग्‍यप्‍सुङ। 20 तमा खोकी तिवाला टि नाङ्‍सुङ, “तुकै यिन्‍सिन ख्‍यिराङ ति ङला सु यिन सिनी सिवी?” तमा पत्रुसकी “गेकेन याङ कोन्‍छ्‍योककी तङ्‍गुप ख्रीष्‍ट यिन।” सिनी टिलेन ग्‍यप्‍सुङ। 21 तमा येशूकी तिवाला दी ताम्‍ङे ति सुला साङ मासिरा सिनी क छ्‍येम्‍बु नाङ्‍सुङ।

22 येलुङ येशूकी सुङ्‍सुङ, “ङ मी पुज्‍युङला दुक्‍पा बङी खुर गोकिवी, तमा यहूदी गोमा कितुप मी छ्‍येतिवा ताङ कोङ्‍यार छ्‍येतिवा ताङ यहूदी छ्‍योकी गेकेनतिवी ङला क्‍येन बिन्‍नी सेकिवी, तमा ङ्‍यिमा सुम ज्‍युक्‍ला ङ शेप ने सेन्‍बु लङ्‍गिवी।”

23 तमा खोकी तिवा तेरीला सुङ्‍सुङ, “सु ङे तिङ्‍ला तिङ्‍योकुप नो किवे, तीकी खोरो नोवातिवा क्‍युर्नी ङ्‍यिमी टेङ दाक दाक्‍पी ग्‍यङ्‍शिङ खुर्नी ङे तिङ्‍ला तिङ्‍योक गोकिवी। 24 सी खोरो मिजी र्‍होकुप नो किवे, तीकी खोरो मिजी तोर्किवी। तमा सी ङे थोक्‍ला खोरो मिजी तोर ज्‍यिकिवे, तीकी खोरो मिजी र्‍होकिवी। 25 तेरी जम्‍बुलिङ थोप्‍सिनाङ खोरो मिजीला तोरुप याङ्‍ना ठोकिवी सिसिन ती मीला काङ ख्‍येप्‍साङ गिवी रो? 26 सु ङ ताङ ङे येन्‍देनला ङोछा किवे, ङ मी पुज्‍युङ साङ ङ ताङ पपा कोन्‍छ्‍योक ताङ चाङ्‍मा वोतुप देवाच्‍येनकी लेन क्‍योलुप थुतिवी मोवा ताङ मुला वुङ्‍गुप पेला तीला ङोछा कितिन। 27 यिने ङ ख्‍यिराङला टेङ्‍बो सिरिन, दे लानी देतुपतिवी पर्ला ललाइ ललाइ ति कोन्‍छ्‍योककी ग्‍येल्‍खाप माथोङ्‍वा सेक्‍ला मिशिवी।”

28 तमा दी सुङ सुङ्‍सिमा ङ्‍यिमा गेकी तिङ्‍ला येशू पत्रुस ताङ यूहन्‍ना ताङ याकूबला टिनी मोपोर कितुपला रीला फेप्‍सुङ। 29 खोकी मोपोर कियी वोतुप पेला खोकी शाल ति ग्‍युर्सुङ, तमा खोकी नम्‍सा ति वो ग्‍यकुप दोके छासे कर्मु गाल्‍सुङ। 30 तमा शार्क्येक मी मिरा ङ्‍यी छ्‍यर्नी येशू ताङ मुला ताम्‍ङे कियी नोक। तिवा ति मोशा ताङ एलिया यिनोक। 31 तिवा मोवा ताङ क्‍यान छ्‍यर्नी येशूकी यरूशलेमला छे च्‍यितुप खो टुङ्‍गुपकी कोर्ला ताम्‍ङे कियी नोक। 32 पत्रुस ताङ तीकी मुला वोतुपतिवा छासे ङ्‍यी जिनी नोक, यिने तिवा ङ्‍यी छेसिमा येशूकी मोवा ताङ खोकी मुला लानी वोतुप मिरा ङ्‍यीला थोङ्‍सुङ। 33 तमा ती मिरा ङ्‍यी ति येशू ताङ मुला क्‍येनी डोप पेला राङ पत्रुसकी येशूला सिक्‍यासुङ, “गेकेन, ङ्‍यिराङ दे राङ देतुप ल्‍यामु नोक। ङ्‍यिराङ बर्केङ सुम चोके जेवी, च्‍यिक ति गेकेनकी थोक्‍ला, च्‍यिक ति मोशाकी थोक्‍ला, तमा च्‍यिक ति एलियाकी थोक्‍ला।” यिने पत्रुसकी खोरो काङ सिक्‍यावु ति खोरुङला राङ छ्‍या मिन्‍दुक।

34 तीकी तुक सियी वोतुप पेला मुक्‍पा छुप्‍नी तिवाला उप्‍सुङ। तमा मुक्‍पा तम्‍बु छुपुप तप्‍की तिवाला ज्‍यिवा लानोक। 35 तमा मुक्‍पी पर नेमा दुक सिरुप वोरु यी ग्‍यप्‍सुङ, “दी ति ङे पेतुप पुज्‍युङ यिन। ख्‍यिराङ दीकी सिक्‍यावु ति ङ्‍येना।” 36 ती वोरु ग्‍यप्‍सिमा येशू च्‍यिक राङ ते ज्‍युनोक। ती पेला लोमातिवा खरक्‍पा सोके देनी तिवी थोङ्‍गुप ताम्‍ङे ति सुला साङ मालाप।

37 ती सला तीला येशू ताङ खोकी लोमातिवा री नेमा मर पाप्‍सालेन्‍सिन मी बङी खोला ठेसुङ। 38 तमा तिवी पर नेमा मी मिरा च्‍यिककी च्‍यार ग्‍यकिन सिक्‍यासुङ, “गेकेन, ङ गोङ्‍बा शोयी, ङे पुज्‍युङला ल्‍हा नाङ। ती ति ङे च्‍यिक राङ वोतुप पुज्‍युङ यिन। 39 तीला डेकी कुल्‍सिमा ती ति शार्क्येक च्‍यार ग्‍यकिवी, तमा तीला र्‍हुक च्‍यिनी तीकी ख नेसुर बोवा थेन ज्‍यिकिवी, तमा तीला पि माताङ्‍नी छासे दुक्‍पा तेर्किवी। 40 ङे गेकेनकी लोमातिवाला ती डे तीला तेन तोङ सिनी गोङ्‍बा शुयिन, यिने तिवी देन माथुप।” 41 ती थोसिमा येशूकी सुङ्‍सुङ, “ओ तेपा मेतुप ताङ सुर्क्योक्‍पा वोतुप गिपा! ङ नम सेक ख्‍यिरा मुला देतुप्‍जा, तमा नम सेक ख्‍यिराङला हम क्‍यानी देतुप्‍जा? ख्‍योरो पुज्‍युङला दे टि शोक ताङ।” 42 तमा ती पेजा ति येशूकी चाला वुङ्‍यिन कितुप पेला साङ डेकी तीला तल ताङ्‍नी र्‍हुक च्‍यिसुङ। यिने येशूकी ती डे तीला वोरु तेन्‍नी ती पेजाला टेक च्‍यिनी तीकी पपाला चेक तेसुङ। 43 तमा मीतिवा कोन्‍छ्‍योककी चोछ्‍येवु वोतुप ओङ थोङ्‍नी तेरी हलेवा क्‍यासुङ।

तमा तेरी मीतिवा येशूकी क्‍या नङ्‍गुप लाका थोङ्‍नी हलेवा कियी वोतुप पेला खोकी खोरे लोमातिवाला सुङ्‍सुङ, 44 “ङे ख्‍यिराङला सिक्‍यावु दी ताम्‍ङे ति ख्‍यिरा ङ्‍याम क्‍यानी ङ्‍येना, ङ मी पुज्‍युङ ति मीतिवी लकला चेक तेकिवी।” 45 यिने तिवी ती ताम्‍ङेकी तेन्‍दोक काङ यिन सिनी हाक्‍माको। च्‍यिलासिसिन तिवी ती ताम्‍ङे हाक्‍मोकोशी सिनी तीकी तेन्‍दोक ति छ्‍याकला राङ नोक। तमा तिवा ज्‍यिवा लानी खोला ती ताम्‍ङेकी कोर्ला टेपला साङ ङाडेङ माक्‍या।

46 तमा लोमातिवी पर्ला सु तेरी सिनाङ छ्‍ये यिन सिरुप कोर्ला खाँदा क्‍यानोक। 47 तिवी नासाम तङ्‍गुप ति येशूकी हाक्‍कोनी आङा टिक्‍पे यीला टि फेप्‍नी खोरो चाला लानी दे च्‍यिनी 48 तिवाला सुङ्‍सुङ, “सी ङे मिङला दी आङा टिक्‍पेला सेमला लिङ्‍गिवे, तीकी ङला सेमला लिङ्‍गुप यिन। तमा सी ङला सेमला लिङ्‍गिवे, तीकी ङला तोङ्‍गुप तीला सेमला लिङ्‍गुप यिन। ख्‍यिरा पर्ला सु तेरी सिनाङ छ्‍युङा नोके, ती ति तेरी सिनाङ छ्‍ये यिन।”

49 ती ज्‍युक्‍ला यूहन्‍नाकी सिक्‍यासुङ, “गेकेन, मिरा च्‍यिककी गेकेनकी मिङला डे देनिन वोतुप ङ्‍यिरा थोङ्‍सुङ। यिने ती ति दाक्‍पी तिङ्‍ला तिङ्‍योकुप मी मिन्‍दुप तप्‍की ङ्‍यिरा तीला तुक कितुपला क्‍येकिन।” 50 तमा येशूकी तीला सुङ्‍सुङ, “तीला माग्‍यक, च्‍यिलासिसिन सु ख्‍यिरा तेन्‍दोकला मेवे, तिवा ख्‍यिरा थोक्‍ला राङ गिवी।”

51 येशू देवाच्‍येनला फेपुप तुजे चिप्‍ला राङ लेपुप तप्‍की खो यरूशलेम नेवा फेपुप सिनी सेमला तेन्‍तेन क्‍यासुङ, 52 तमा खोकी थोक्‍ला तेरी ताम्‍ङे टडिक कितुपला ललाइ मीतिवाला खोरुङ सिनाङ गोमाला सामरीतिवी युल यीला ताङ्‍सुङ। 53 यिने ती युलकी मीतिवी खो यरूशलेमला राङ फेपिन वोतुप हाक्‍कोनी खोला सेमला माला। 54 ती थोङ्‍नी खोकी लोमा याकूब ताङ यूहन्‍नाकी खोला “गेकेन, काङ ङ्‍यिराङ देवाच्‍येन नेमा मे ताङ्‍नी दिवाला ना तोङ ज्‍यितुप गेकेनकी नो वे?” सिनी सिक्‍यासुङ 55 यिने येशूकी तिवी थाकाला ग्‍युर्नी तिवाला वोरु तेन्‍सुङ। 56 तमा खोतिवा यम्‍बा युलला राङ फेप्‍सुङ।

57 ती ज्‍युक्‍ला येशू ताङ लोमातिवा लाम नेवा फेपिन कितुप पेला मी मिरा च्‍यिककी खोला “चोवो कनी फेप्‍किवे, ङ साङ चोवोकी तिङ्‍ला तिङ्‍योकिन।” सिनी सिक्‍यासुङ। 58 तमा येशूकी तीला सुङ्‍सुङ, “च्‍यिप्‍च्‍याङतिवी ति यिपुप मुक्‍तुम वे, तमा नामगी च्‍यच्‍युमतिवी ति छाङ वे। यिने ङ मी पुज्‍युङला याङ गो ज्‍योकुप दासा साङ मे।” 59 लोङ येशूकी मी यम्‍बा यीला सुङ्‍सुङ, “ङे तिङ्‍ला तिङ्‍योक।” यिने तीकी सिक्‍यासुङ, “गोमाला गल्‍नी ङे पपा कल्‍दोक कि च्‍यी।” 60 तमा येशूकी तीला सुङ्‍सुङ, “शेपतिवी खोरो शेपतिवाला कल्‍दोक कि च्‍यी, यिने ख्‍युरुङ ति गल्‍नी कोन्‍छ्‍योककी ग्‍येल्‍खापकी कोर्ला ख्‍याप्‍टाक की।” 61 येलुङ मी यम्‍बा यीकी येशूला सिक्‍यासुङ, “चोवो, ङ याङ चोवोकी तिङ्‍ला तिङ्‍योकिन, यिने गोमाला लोक्‍नी गल्‍नी ङे खाङ्‍बी मीतिवी मु नेसुर क्‍येनी वुङ च्‍यी।” 62 येशूकी तीला सुङ्‍सुङ, “सु खोरो लाक्‍पा थोङ्‍बी लाजेनला जिम्‍नी तिङ्‍ला ग्‍युर्नी ल्‍हे वे, तिवा कोन्‍छ्‍योककी ग्‍येल्‍खापला डो छ्‍योवु मे।”