10
येशूकी लोमा मिरा खाल दिन ताङ ङ्‍यीला तङ्‍गुप
ती ज्‍युक्‍ला चोवो येशूकी यम्‍बा लोमातिवा मिरा खाल दिन ताङ ङ्‍यी पेनी मिरा ङ्‍यी ङ्‍यी क्‍यानी खोरुङ फेपुप छलुप तेरी ग्‍येसा ताङ दासाला खो सिनाङ गोमाला ताङ्‍सुङ। तोङ्‍गुप पेला खोकी तिवाला सुङ्‍सुङ, “सप्‍ले दुतुप याङ बङी वे, यिने सप्‍ले दुतुप मीतिवा ति ङ्‍युङ्‍मु वे। तुक क्‍यानी सप्‍ले दुतुप मीतिवा सप्‍ले दुतुप शिङ खला तोङ सिनी सप्‍लेकी ज्‍यिन्‍दाकला गोङ्‍बा शु। त ग्‍युक, ङ ख्‍यिराङला तङ्‍गुप ति लुक रुकतिवा खटमुतिवी पर्ला तङ्‍गुप दोके राङ यिन। ख्‍यिरा लोला टङ्‍गी छयी साङ गिवु साङ काचा साङ माखुर, तमा लामला सुला साङ टसी देलेक मासिर। ख्‍यिराङ चुका खाङ्‍बाला शुकिवे, गोमाला ‘दी खाङ्‍बी मीतिवाला लोदिमु वुङ्‍शिता।’ सिनी सी। दोजो ती खाङ्‍बी मी तीकी लोदिमु वुङ्‍शी सिरुप नो वोसिन ख्‍यिरा सिक्‍यावु लोदिमु ति ती मीला थोप्‍कितो, मिसिन ती लोदिमु ति ख्‍यिराङला राङ लोक्‍नी गितो। ख्‍यिराङ ती खाङ्‍बाला राङ देनी ते काङ बिन्‍दुप ति साप ताङ थुङ्‍गुप किसा। च्‍यिलासिसिन लाका कितुप मी तीला खोरो ल ङ्‍येतुप ति टेके यिन। तमा खाङ्‍बा खाङ्‍बाला पोतिन सिरा शासा मादे।
ख्‍यिराङ चुका ग्‍येसाला शुसिनाङ तेकी मीतिवी ख्‍यिराङला गासो शुसिन तिवी ख्‍यिराङला बिन्‍दुप समा ति सो। तमा ते वोतुप नेर्पुतिवाला टेक च्‍यिनी तिवाला ‘कोन्‍छ्‍योककी ग्‍येल्‍खाप ख्‍यिरा चिप्‍ला राङ वा वे।’ सिनी सी। 10 यिने ख्‍यिराङ चुका ग्‍येसाला शुसिनाङ तेकी मीतिवी ख्‍यिराङला गासो माशुसिन ती ग्‍येसाकी लाम नेमा थेन्‍नी, 11 ‘ङ्‍यिरा काङ्‍बाला कोवु दी ग्‍येसाकी थल्‍दुक ति ख्‍यिरा तेन्‍दोकला र्‍हुनी ज्‍योकिन। यिने कोन्‍छ्‍योककी ग्‍येल्‍खाप चिप्‍ला राङ वा वे सिरुप ति ख्‍यिरा हाक्‍कोवा की।’ सिनी सी। 12 ङ ख्‍यिराङला सिरिन, कोन्‍छ्‍योककी ठिम कितुप तुजेला दी ग्‍येसाकी खला ख्‍येलुप पर्च्या ति सदोमकी खला ख्‍येलुप पर्च्या सिनाङ मङ गिवितो।”
तेपा मिकिवु ग्‍येसाकी मीतिवाला ख्‍येलुप पर्च्या
(मत्ती ११:२०-२७; १३:१६-१७)
13 “ओ खोराजीनकी मीतिवा, ख्‍यिराङला मोताप सुकितो! ओ बेथसेदाकी मीतिवा, ख्‍यिराङला मोताप सुकितो! ख्‍यिरा पर्ला ङे क्‍यावु हलेवु लाका ति टुरोस ताङ सीदोनला क्‍यावु यिन्‍सिन तेकी मीतिवी गोमाला के रा र्‍होक्‍पुकी मज्‍या कोन्‍नी खोरो गोला थल्‍जाम लुक्‍नी खोप्‍रे दिक्‍पा ने सेम ग्‍युरुप्‍जा। 14 यिने कोन्‍छ्‍योककी ठिम कितुप तुजेला टुरोस ताङ सीदोनकी मीतिवाला सिनाङ ख्‍यिराङला मङ पर्च्या ख्‍येल्‍गितो। 15 ओ कफर्नहुमकी मीतिवा, काङ ख्‍यिराङ येर देवाच्‍येनला के देकिवी? मिन, ख्‍यिराङ याङ मर ङ्‍येलाला के लुम्‍गिवी।
16 सी ख्‍यिरा ताम्‍ङे ङ्‍येन्‍गिवे, तीकी ङे ताम्‍ङे ङ्‍येन्‍दुप यिन। सी ख्‍यिरा तेन्‍दोकला लङ्‍गिवे, ती ति ङे तेन्‍दोकला लङ्‍गुप यिन। तमा सी ङे तेन्‍दोकला लङ्‍गिवे, ती ति ङला तोङ्‍गुप तीकी तेन्‍दोकला लङ्‍गुप यिन।”
लोमा मिरा खाल दिन ताङ ङ्‍यीतिवा लोक्‍नी वावु
17 तमा येशूकी तङ्‍गुप लोमा मिरा खाल दिन ताङ ङ्‍यी ति छासे गा कियी लोक्‍नी वानी खोला दुक सिक्‍यासुङ, “चोवो, चोवोकी मिङ नेसुर डेतिवा साङ ङ्‍यिरा खला ङ्‍येन्‍गिनोक।” 18 तमा खोकी तिवाला सुङ्‍सुङ, “शैतानला देवाच्‍येन नेमा चिलाम दोके क्‍यानी लुम्‍बुप ति ङे थोङ्‍सुङ। 19 ङ्‍येना, ङे ख्‍यिराङला रुलतिवा ताङ बिच्‍छितिवाला लेपुप ताङ डेतिवी तेरी ङारकी खला ग्‍येलुप ओङ बिन वे। तुक क्‍यानी काङगी साङ ख्‍यिराङला मेलोक्‍पा कि मुथुपी। 20 यिने डेतिवा ख्‍यिरा खला ङ्‍येन्‍गिवी सिनी ख्‍यिराङ गा माकी, बोरु ख्‍यिरा मिङ ति देवाच्‍येनला टि वे सिनी गा की।”
येशू गा क्‍यावु
21 ती पेला राङ येशू कोन्‍छ्‍योककी थु चाङ्‍मा नेमा छासे गा कियी दुक सुङ्‍सुङ, “ओ पपा, देवाच्‍येन ताङ जम्‍बुलिङकी चोवो। ङ थुचिछे बुलिन, च्‍यिलासिसिन दी ताम्‍ङेतिवा ति रिक्‍पा वोतुप ताङ लापुप मीतिवाला छ्‍याकला ज्‍याक्‍नी आङा टिक्‍पे दोके मालापुप मीतिवाला छ्‍या तेन्‍सुङ। यिन, पपा, दी ति पपाला गा लङ्‍गुप नोवा यिन। 22 ङे पपी ङला तेरी ताम्‍ङे चेक तेन नाङ्‍सुङ। पपी मिसिन पुज्‍युङ सु यिन सिनी सी साङ ङो मेशेवी। तमा पुज्‍युङ ताङ पुज्‍युङकी पपाला ङो शे ज्‍यितुपला पेतुपतिवी मिसिन पपा सु यिन सिनी सी साङ ङो मेशेवी।”
23 ती ज्‍युक्‍ला येशू लोमातिवी थाकाला ग्‍युर्नी खोप्‍राङ पर्ला दुक सुङ्‍सुङ, “ती तेरी ताम्‍ङेतिवा थोङ्‍गुप ङ्‍येतुप ख्‍यिराङ ति मोलाम थोपुप यिनो। 24 ङ ख्‍यिराङला सिरिन, कोन्‍छ्‍योककी लुङ्‍तेम्‍बातिवा ताङ ग्‍येल्‍वुतिवा बङीकी ख्‍यिरा काङ थोङ्‍गुप ति ल्‍हाप नो क्‍यासुङ, यिने माथोङ। तमा ख्‍यिरा काङ थोवु ति ङ्‍येन्‍दुप नो क्‍यासुङ, यिने माथो।”
सामरी ल्‍यामुकी पे
(मत्ती २२:३४-४०; मर्कूस १२:२८-३१)
25 ङ्‍यिम्‍ज्‍यिक यहूदी छ्‍योकी गेकेन यी लानी येशूला खोक्‍पा ल्‍हापला दुक सिनी टिसुङ, “गेकेन, नाम्‍साङ मिशिवु मिजी थोपुपला ङे काङ कि गोकिवी?” 26 तमा येशूकी तीला सुङ्‍सुङ, “कोन्‍छ्‍योककी सुङला काङ सिनी टि वे? ख्‍योरो ती ति चुक क्‍यानी रानी हाक्‍कोसुङ?” 27 तमा तीकी सिक्‍यासुङ, “ ‘ख्‍योरो तेरी सेमगी दिङ ने, ख्‍योरो तेरी मिजी ने, ख्‍योरो तेरी ङार ताङ ख्‍योरो तेरी नासाम ने ख्‍योरो चोवो कोन्‍छ्‍योकला ङ्‍यिङ्‍ज्‍ये की।’ तमा ‘ख्‍योरो युल्‍वाला रङला दोके ङ्‍यिङ्‍ज्‍ये की।’ सिनी सुङ वे।” 28 तमा येशूकी तीला सुङ्‍सुङ, “ख्‍योरो टेके राङ सिक्‍यासुङ। ख्‍युरुङ तुकै राङ की, तमा ख्‍युरुङ सेन्‍बु लुकिवी।” 29 यिने ती यहूदी छ्‍योकी गेकेन तीकी खोरुङला टेङ्‍बु छ्‍या देन्‍दुपला येशूला “तुकै यिन्‍सिन ङे युल्‍वा ति सु यिनाङ?” सिनी टिसुङ।
30 तमा येशूकी तीला टिलेन नाङ्‍सुङ, “मी मिरा च्‍यिक यरूशलेम नेमा मर यरीहोला डोयी कितुप पेला ती ति च्‍याक्‍पातिवी लकला ख्‍येल्सुङ। च्‍याक्‍पातिवी तीला पेर्तुङ्‍बा सिङी जोसिमा तीला दुनी शिला के जोनी क्‍युर ज्‍याक्‍नी गाल्‍नोक। 31 ती पेला कोङ्‍यार यी ती लाम नेमा राङ मर वासुङ, यिने तीकी ती मी तीला थोङ्‍सिमा तीला क्‍योक क्‍यानी यम्‍बा थाका नेमा गाल्‍सुङ। 32 चेयी ज्‍युक्‍ला लेवी यी साङ ती दासाला वानी तीला थोङ्‍सिमा तीला क्‍योक क्‍यानी यम्‍बा थाका नेमा गाल्‍सुङ। 33 यिने सामरी यी युक डोयी कितुप पेला ती मी वोतुप दासाला लेप्‍नी तीला थोङ्‍सिमा छासे ङ्‍यिङ्‍ज्‍ये लासुङ, 34 तमा ती मी तीकी चाला गल्‍नी तीकी मतिवाला नुम ताङ गुन्‍डुम छ्‍याङ कुन बिन्‍नी मारा टिल बिन्‍सुङ। ती ज्‍युक्‍ला तीकी तीला खोरो पुङ्‍गोकला कल्‍नी डोखाङ यीला क्‍यल्‍नी तीला ल्‍हटे क्‍यासुङ। 35 तमा ती सला तीला तीकी ङुलकी डप्‍बु* १०:३५ ङुलकी डप्‍बु च्‍यिक ति लावा मिरा च्‍यिककी ङ्‍यिमी ल यिन। ङ्‍यी डोखाङकी ज्‍यिन्‍दाकला तेतिन सिरा ‘दीला ल्‍हटे किसा, तमा टङ्‍गा चो ल्‍हक्‍पा ख्‍येलुप ति ङ लोक्‍नी वुङ्‍गुप पेला तेतुप्‍नो।’ सिनी सिक्‍यासुङ।” 36 ती पे सुङ्‍सिमा येशूकी ती यहूदी छ्‍योकी गेकेनला टि नाङ्‍सुङ, “ख्‍योरो नासामला दी मिरा सुमकी पर्ला सु च्‍याक्‍पाकी लकला ख्‍येलुप मी तीकी युल्‍वा ति यिन?” 37 तीकी सिक्‍यासुङ, “तीला ङ्‍यिङ्‍ज्‍ये क्‍यावु मी ति यिन।” तमा येशूकी तीला सुङ्‍सुङ, “गल्‍नी ख्‍युरुङ साङ तुकै राङ की।”
येशू मार्था ताङ मरियमला ठेतुप
38 तमा येशू ताङ खोकी लोमातिवा डोयी कितुप पेला युल यीला लेप्‍सुङ। ती युलला मार्था सिरुप पुम्‍पेजा यीकी खोतिवाला खोरो खाङ्‍बा गासो शुसुङ। 39 तीकी ति मरियम सिरुप नुम यी नोक। ती मरियम ति चोवोकी शापकी चाला देनी खोकी सुङ ङ्‍येनिन नोक। 40 यिने मार्था ति खोरो टडिक कि गोवु लाकातिवा बङी वोतुप तप्‍की खोम राङ मिन्‍दुक। तमा तीकी येशूकी चाला वानी सिक्‍यासुङ, “चोवो, ङे नुमकी ङला तिराङ लाका कितुपला क्‍युर्नी ज्‍यकुप ति गेकेनकी ङ्‍याम मिकिवी? ङला दाल्‍जा किटे कि सिनी तीला सुङ्‍नी।” 41 यिने चोवोकी तीला सुङ्‍सुङ, “मार्था, मार्था, ख्‍युरुङ याङ ताम्‍ङे बङीकी कोर्ला पप ताङ सेम्‍दुक किनोक। 42 यिने गोवु ताम्‍ङे ति च्‍यिक तिराङ वे। चुका ति ल्‍यामु नोके, ती ति मरियमकी पेसुङ। ती ति सी साङ ती नेसुर ठोक मुथुपी।”

*10:35 १०:३५ ङुलकी डप्‍बु च्‍यिक ति लावा मिरा च्‍यिककी ङ्‍यिमी ल यिन।