1 ङ्‍यिम्‍ज्‍यिक दासा यीला येशू मोपोर कियी नोक। मोपोर क्‍यान छर्सिमा खोकी लोमातिवी पर ने मिरा च्‍यिककी खोला सिक्‍यासुङ, “चोवो, यूहन्‍नाकी खोरो लोमातिवाला मोपोर कितुप लापुप दोके ङ्‍यिराङला साङ मोपोर कितुप लाप नाङ्‍नी।” 2 तमा येशूकी तिवाला सुङ्‍सुङ, “ख्‍यिराङ दुक सिनी मोपोर की।

5 ती ज्‍युक्‍ला लोङ येशूकी तिवाला सुङ्‍सुङ, “दोजो ख्‍यिरा पर नेमा ललाइला खोरो दाल्‍जा वोज्‍यिवी। ती ति नुप फेकाला खोरो दाल्जी ते गल्‍नी तीला ‘ओ दाल्‍जो, ङला शुब्‍ज्‍याङ सुम चोके किन्‍बा किनी, 6 च्‍यिलासिसिन ङे दाल्‍जा यी थाक्‍रिङ्‍बु नेसुर वा वे, यिने तीला शोपला ङे मुला काङ साङ मे।’ सिक्‍यासिन 7 ती ति नाङ नेसुर ‘ङला छेरा मालोङ, गो चेन सिन वे, आङातिवा ङे मुला ङ्‍यिलोङ वे। त ङ लानी ख्‍युरुङला काङ तेर मुथुपी।’ सिनी सि थुप्‍किवी? 8 ङ ख्‍यिराङला सिरिन, ती ति खोरो दाल्‍जा यिन्‍दुप तप्‍की ती ति लानी शुब्‍ज्‍याङ माबिन्‍सिनाङ तीकी दाल्‍जी लङ्‍गुप ति लङ्‍दोक क्‍यावु तप्‍की लानी तीला गोवु चोयी तेर्किवी। 9 तुक क्‍यानी ङ ख्‍यिराङला सिरिन, ‘लोङ, तमा ख्‍यिराङला नङ्‍गितो। छोल, तमा ख्‍यिराङला ङ्‍येकितो। गोला डक डक ग्‍योप, तमा ख्‍यिरा थोक्‍ला गो बेकितो।’ 10 च्‍यिलासिसिन लोङ्‍गुप तेरीला थोप्‍कितो, छोलुप तेरीला ङ्‍येकितो, तमा गोला डक डक ग्‍यकुप तेरीला गो बेकितो। 11 ख्‍यिरा पर्ला चुका पपा तीकी खोरो पुज्‍युङकी ङ्‍या लाङ्‍सिन तीला रुल तेर्किवी? 12 तमा च्‍ये मेन्‍दोक लङ्‍सिन तीला बिच्‍छी तेर्किवी? 13 ख्‍यिराङ दुक्‍टा वोनी साङ खोरो पेजातिवाला च्‍यालक ल्‍यामु तेर शेकिवी सिसिन देवाच्‍येनला ज्‍यु वोतुप ख्‍यिरा पपी याङ खोला लोङ्‍गुपतिवाला चुका मङ्‍मु खोरे थु चाङ्‍मा मनङ्‍गिवी रो?”

14 थेङ्‍मा यी येशूकी डे ग्‍यप्‍नी कुवा गलुप मी यीकी नाङ नेमा ती डे थेनिन नोक। तमा डे थेन गल्‍सिमा ती मी कुवा ति ताम्‍ङे लपुप छाल्‍सुङ। दी थोङ्‍नी मीतिवा हलेवा क्‍यासुङ। 15 यिने तिवी पर नेमा ललाइकी दुक सिक्‍यासुङ, “डेतिवी ग्‍येल्‍वु बालजिबुलकी ङार नेमा राङ दीकी डेतिवा देन्‍गिनोक।” 16 तमा यम्‍बातिवा ललाइकी देवाच्‍येन नेमा वुङ्‍गुप त च्‍यिक छ्‍या तेन सिनी खोला खोक्‍पा ल्‍हासुङ। 17 तिवी नासाम हाक्‍कोनी येशूकी तिवाला दुक सुङ्‍सुङ, “चुका लुङ्‍बाला साङ च्‍यिककी च्‍यिकला ख्‍ये पेसुङ सिसिन ती लुङ्‍बा ति ना डिवी। तमा खाङ्‍बा साङ खाङ्‍बी मीतिवा च्‍यिककी च्‍यिकला ख्‍ये पेसुङ सिसिन ती खाङ्‍बा ति ना डिवी। 18 ती दोके शैतान साङ खोप्‍राङ पर्ला ख्‍ये पेसिन तीकी ग्‍येल्‍खाप ति चुक क्‍यानी लु थुप्‍किवी रो? ख्‍यिरा ङला बालजिबुलकी ङार नेमा डेतिवा देन्‍गिनोक सिनी सिनोक। 19 दोजो ङे बालजिबुलकी ङार नेमा डेतिवा तेन्‍दुप यिन्‍सिन ख्‍यिरा मीतिवी सी ङार नेसुर डेतिवा देन्‍गिवी रो? तुक क्‍यानी ख्‍यिरा सिक्‍यावु ताम्‍ङे ति टेके मिन सिनी ख्‍यिरा मीतिवी राङ पङ्‍बु तेर्किवी। 20 यिने दोजो ङे कोन्‍छ्‍योककी ङार नेमा डेतिवा तेन्‍दुप यिन्‍सिन कोन्‍छ्‍योककी ग्‍येल्‍खाप ख्‍यिरा पर्ला वा वे। 21 मी रम्‍बु यीकी तेरी लाक्‍च्‍ये खुर्नी खोरो खाङ्‍बा र्‍हेन्‍सिन खोरो च्‍यालकतिवा र्‍होकिवी। 22 यिने ती सिनाङ मङ मी रम्‍बु यी वानी तीला थमु ग्‍यप्‍नी तीकी खला ग्‍येल्‍सिन तीकी रेवा क्‍यावु लाक्‍च्‍येतिवा तेरी ठो गल्‍नी खोप्‍रे पर्ला गोकिवी। 23 ङे छ्‍योकला मेतुप मी ति ङे तेन्‍दोकला लङ्‍गुप मी यिन, तमा ङ ताङ मुला मुरुकुप मी ति थरा थुरा तोङ्‍गुप मी यिन।”

24 “डे च्‍यिक मी ललाइ नेमा थेन्‍सिमा ती ति येन सोप दासा छोलिन दासा पाङ्‍थेरीला फार छुर युकिवी। यिने तीकी दासा माङ्‍येनी, ‘ङ थेन वावु खाङ्‍बाला राङ लोक्‍नी डोयी।’ सिनी सिवी। 25 तीकी ते लोक्‍नी वानी ल्‍हासालेन्‍सिन ती खाङ्‍बा ति च्‍यानी चेङ्‍गा जोवु ताङ रिनी ज्‍यकुप थोङ्‍गिवी। 26 तमा ती ति गल्‍नी खोरुङ सिनाङ मङ दुक्‍टा वोतुप यम्‍बा डे दिन चोकेला खोरो मुला टिनी वानी ती मी नाङ्‍ला शुनी ते राङ देकिवी। तमा ती मी तीकी तिङ्‍मी मिजी ति गोमाला सिनाङ मङ मेलोक्‍पा डिवी।”

27 येशूकी दी सुङ सुङ्‍यिन वोतुप पेला मी मङ्‍मी पर नेमा पुम्‍पेजा यीकी थोर ग्‍यकिन सिक्‍यासुङ, “ख्‍युरुङला क्‍येप ताङ नुम तेरुप आमा ति मोलाम थोपुप यिनो।” 28 ती थोनी येशूकी सुङ्‍सुङ, “बोरु कोन्‍छ्‍योककी सुङ ङ्‍येन्‍नी ती सुङला युकुपतिवा के मोलाम थोपुप यिनो।”

29 तमा मीतिवा बङी जोम्‍सालेन्‍सिन येशूकी सुङ्‍सुङ, “तसामकी गिपा ति दुक्‍टाकी गिपा यिन। तिवी त छोल्‍गिनोक, यिने तिवाला योनाकी त मिसिन यम्‍बा चुका त साङ थोङ्‍गुप मेङ्‍येवी। 30 योना ति निनवे ग्‍येसाकी मीतिवी थोक्‍ला त च्‍युङ्‍गुप दोके ङ मी पुज्‍युङ साङ तसाम पेकी गिपाकी मीतिवी थोक्‍ला त च्‍युङ्‍गिवी। 31 कोन्‍छ्‍योककी ठिम तोङ्‍गुप तुजेला ल्‍होकी थाकाकी लुङ्‍बा नेसुर वावु ग्‍येल्‍मी दी गिपाकी मीतिवा ताङ मुला लानी दी गिपाकी मीतिवाला क्‍येन ग्‍यकिवी। च्‍यिलासिसिन ती ग्‍येल्‍मु ति ग्‍येल्‍वु सोलोमनकी रिक्‍पा ङ्‍येन्‍दुपला जम्‍बुलिङकी तिङ्‍मा ने वासुङ। यिने ल्‍होसा, ग्‍येल्‍वु सोलोमन सिनाङ मङ छ्‍ये वोतुप ति दे वे। 32 येलुङ कोन्‍छ्‍योककी ठिम तोङ्‍गुप तुजेला निनवे ग्‍येसाकी मीतिवी दी गिपाकी मीतिवा ताङ मुला लानी दी गिपाकी मीतिवाला क्‍येन ग्‍यकिवी। च्‍यिलासिसिन तिवी योनाकी ख्‍याप्‍टाक क्‍यावु कोन्‍छ्‍योककी सुङ ङ्‍येन्‍नी दिक्‍पा ने सेम ग्‍युर्नोक। यिने ल्‍होसा, योना सिनाङ मङ छ्‍ये वोतुप ति दे वे।”

33 “सी साङ दिप्‍ली च्‍येनी मोथोङ्‍गुप दासाला याङ्‍ना शोमकी वोक्‍ला मोज्‍योकिवी। बोरु पाङ नेसुर वुङ्‍गुपतिवाला ठछ्‍येली थोङ्‍शी सिनी तेरीकी थोङ्‍गुप दासाला ज्‍योकिवी। 34 ख्‍योरो जुकी दिप्‍ली ति ख्‍योरो मिक यिन। ख्‍योरो मिक ल्‍यामु वोसिन ख्‍योरो जु तेरी ठछ्‍येली गिवी। यिने ख्‍योरो मिक ल्‍यामु मेसिन ख्‍योरो जु तेरी नक्‍तोमी गिवी। 35 तुक क्‍यानी ख्‍यिरा नाङ्‍ला वोतुप ठछ्‍येली ति नक्‍तोमी वोते मेते सिनी ल्‍यामु क्‍यानी ल्‍होसा। 36 दोजो ख्‍योरो जु तेरी ठछ्‍येली गल्‍नी काङ साङ नक्‍तोमी मेसिन दिप्‍लीकी ठछ्‍येलीकी ख्‍युरुङला वो ग्‍यकुप दोके ख्‍योरो जु तेरी वो ग्‍यकिवी।”

37 येशूकी ती ताम्‍ङे सुङ सिन्‍सिमा फरिसी मिरा च्‍यिककी खोला खोरो खाङ्‍बा सोल शेवुला फेप शुसुङ, तमा खो तीकी खाङ्‍बा फेप्‍नी सोल शेवुला ज्‍युसुङ। 38 यिने ती फरिसी तीकी येशूकी सोल शेवु सिनाङ गोमाला छ्‍याक मासिलुप थोङ्‍नी हलेवा क्‍यासुङ। 39 तमा चोवोकी तीला सुङ्‍सुङ, “तन्‍दा ख्‍यिराङ फरिसीतिवा याङ कोरा ताङ देर्माङ फिला ति ल्‍यामु क्‍यानी शिकिवी, यिने ख्‍यिरा नाङ्‍ला ति देर्पा ताङ दुक्‍टाकी क्‍येङ्‍नी वे। 40 ओ अम्‍बारङ्‍शिङतिवा, फीकी ति जो नङ्‍गुप कोन्‍छ्‍योककी राङ नाङगी ति साङ जो नङ्‍गुप मिन रो? 41 कोरा ताङ देर्माङ नाङ्‍ला काङ वे, ती ति पेराङ्‍बुतिवाला बिन, तुक क्‍यासिन तेरी ताम्‍ङेतिवा ख्‍यिरा थोक्‍ला चेङ्‍गा डिवी।

42 ख्‍यिराङ फरिसीतिवाला मोताप सुक्‍शी, च्‍यिलासिसिन ख्‍यिराङ मेन्‍डोक ताङ खम्‍बु ताङ यम्‍बा नम्‍बा तेरीकी मेन्‍चातिवा नेसुर दशांश ति कोन्‍छ्‍योकला बुल्‍गिवी, यिने ठिम टेङ्‍बु ताङ कोन्‍छ्‍योकला ङ्‍यिङ्‍ज्‍ये कितुप ताम्‍ङेला ति ङ्‍याम मिकिनोक। तिवा साङ कि गोकिवी, तमा ठिम टेङ्‍बु ताङ ङ्‍यिङ्‍ज्‍ये कितुप लाका साङ ङ्‍याम कि गोकिवी। 43 ख्‍यिराङ फरिसीतिवाला मोताप सुक्‍शी, च्‍यिलासिसिन ख्‍यिराङ यहूदी छ्‍योखाङला टाल जिम्‍नी देतुप ताङ हाला मीतिवी खोरुङला ताङ्‍देन क्‍यानी छ्‍याक पुलुप ति गा गिनोक। 44 ख्‍यिराङला मोताप सुक्‍शी, च्‍यिलासिसिन ख्‍यिराङ याङ फिला ल्‍हासिन ङो मेशेवु दोके जोवु शेप मीला ज्‍योकुप टककी फुक दोके यिन, तुक क्‍यानी मीतिवा ती खला युसिनाङ ती ति शेप मीला ज्‍योकुप टककी फुक यिन सिनी छ्‍या मे।”

45 ती पेला यहूदी छ्‍योकी गेकेन मिरा च्‍यिककी येशूला सिक्‍यासुङ, “गेकेन, गेकेनकी दी ताम्‍ङेतिवा सुङ्‍नी ङ्‍यिराङला साङ मारे तोङ्‍गिनोक।” 46 तमा येशूकी तीला सुङ्‍सुङ, “ख्‍यिराङ यहूदी छ्‍योकी गेकेनतिवाला साङ मोताप सुक्‍शी, च्‍यिलासिसिन ख्‍यिराङ खुरुपला कले वोतुप खुरु ति मीतिवाला खुर ज्‍यिकिनोक, यिने खोप्‍राङ ति तिवाला दाल्‍जा कितुपला ती खुरुला थो साङ मोतोङ्‍नोक। 47 ख्‍यिराङला मोताप सुक्‍शी, च्‍यिलासिसिन ख्‍यिराङ ति ख्‍यिरा हङ्‍गावातिवी सेतुप कोन्‍छ्‍योककी लुङ्‍तेम्‍बातिवी थोक्‍ला शेप मीला ज्‍योकुप टककी फुकतिवा ल्‍यामु जेवी। 48 तुकै राङ क्‍यानी ख्‍यिराङ ख्‍यिरा हङ्‍गावातिवी क्‍यावु लाकाकी कोर्ला पङ्‍बु तेर्किवी। ख्‍यिरा हङ्‍गावातिवी ति कोन्‍छ्‍योककी लुङ्‍तेम्‍बातिवाला सेसुङ, यिने ख्‍यिराङ ति तिवी थोक्‍ला शेप मीला ज्‍योकुप टककी फुकतिवा जेवी। 49 तुक क्‍यानी तेरी ताम्‍ङे हाक्‍कोवु कोन्‍छ्‍योककी दुक सुङ्‍गिवी, ‘ङ ङे लुङ्‍तेम्‍बातिवा ताङ लोमा छ्‍येतिवाला मीतिवी ते तोङ्‍यिनो। यिने तिवी ङे तङ्‍गुपतिवी पर्ला ललाइला ति सेकिवी, ललाइला ति छेटाङ तेर्किवी।’ 50 तुक क्‍यानी जम्‍बुलिङ ज्‍येङ्‍गुप पे नेज्‍युनी सेतुप कोन्‍छ्‍योककी लुङ्‍तेम्‍बातिवी ठककी क्‍येनकी चेक ति दी गिपाकी मीतिवी लङ्‍गिवी। 51 ती ति हाबिलकी ठक नेज्‍युनी छोठी ताङ कोन्‍छ्‍योककी ल्‍हङाङकी पर्ला सेतुप जकरियाकी ठक सेक यिन। यिन, ङ ख्‍यिराङला सिरिन, तिवा तेरी चेक ति दी गिपाकी मीतिवी लङ गोकिवी। 52 ख्‍यिराङ यहूदी छ्‍योकी गेकेनतिवा मोताप सुक्‍शी, च्‍यिलासिसिन ख्‍यिरा कोन्‍छ्‍योककी सुङ हाक्‍कोवु रिक्‍पाकी लिमी खुन गल्‍नी खोरुङ साङ माशु, तमा यम्‍बा शुकुप छोलुपतिवाला साङ शुकुपला ग्‍येकिवी।”

53 तमा येशू ती खाङ्‍बा नेसुर थेन्‍दुप पेला यहूदी छ्‍योकी गेकेनतिवा ताङ फरिसीतिवी खोकी तेन्‍दोकला कशेन क्‍येन तेरुप नोनी खोला टिवा बङी ग्‍यप्‍सुङ। 54 तमा खोकी ख नेमा थेन्‍दुप काङ रे च्‍यिक रे ताम्‍ङे नेसुर खोला क्‍येन तेरुपला तिवी चिवा क्‍यानी देनोक।