1 अच्‍युनुपतिवा, तिङ्‍मी ताम्‍ङे यम्‍बा ति काङ यिन सिसिन ख्‍यिराङ चोवोला तेपा क्‍यावु मी यिन्‍दुप तप्‍की सेम गा की। दी यिकी लोकुर ग्यप्‍नी टिकुपला ङला छेरा मलङ्‍गिवी, ती ति ख्‍यिराङला र्‍होकुपला यिन। 2 फेतुप की दोके क्‍यानी थमु ग्‍यकुप ताङ लाका दुक्‍टा कितुप ताङ दिक्‍पा ने थरुपला जुला च्‍येतुप लुक्‍सु कि राङ गोकिवी सिरुप मीतिवा नेसुर च्‍याङ्‍से देता। 3 दाक्‍पु ति कोन्‍छ्‍योककी थोङ्‍दाङला वुतुङ के च्‍येतुप लुक्‍सु क्‍यावु मीतिवा यिन। च्‍यिलासिसिन दाक्‍पु याङ कोन्‍छ्‍योककी थु चाङ्‍मा नेमा खोला सोवा देकिवी, तमा येशू ख्रीष्‍टला तेपा क्‍यानी तेके किवी, जुला तिराङ कितुप लुक्‍सुला ति तेपा मिकिवी। 4 ताम्‍ङे कितुप यिन्‍सिन, ङ साङ तुका जुकी ताम्‍ङेतिवाला तेपा कि थुप्‍किवी। दोजो मी ललाइकी जम्‍बुलिङकी लुक्‍सुतिवाला तेपा किवी सिसिन ङ याङ मङ ती ताम्‍ङे कि थुप्‍किवी। 5 ङ क्‍येवु ङ्‍यिमा ग्‍येला यहूदी च्‍येतुप लुक्‍सु क्‍यावु यिन, तमा ङ इस्राएलकी मी यिन, तमा बिन्‍यमिन गिपाकी मी यिन, तमा वुतुङ के हिब्रू मी यिन, तमा यहूदी ठिमकी कोर्ला सि गोवु यिन्‍सिन ङ फरिसी यिन, 6 तमा टेमुकी कोर्ला सि गोवु यिन्‍सिन येशूला तेपा कितुप मीतिवाला ङे छेटाङ बिन्‍दुप यिन, तमा यहूदी ठिमला वोतुप टेङ्‍बुकी कोर्ला सि गोवु यिन्‍सिन ङ ति क्‍येन मेतुप मी यिन।

7 यिने ती तेरी ताम्‍ङेतिवा ङे थोक्‍ला ख्‍येप्‍साङ वोतुप यिन्‍सिनाङ ती ताम्‍ङेतिवा तन्‍दा ख्रीष्‍टकी थोक्‍ला तेरी काङ साङ मिन सिनी ङ नासाम तोङ्‍यिन। 8 तोजो तिराङ मिन, चोवो येशू ख्रीष्‍टला ङो शेवु ति तेरी सिनाङ खक्‍छ्‍येवु यिन्‍दुप तप्‍की यम्‍बा तेरी ताम्‍ङेतिवा कुन यिन्‍दुप ति ङे हाक्‍कोसुङ। तमा ख्रीष्‍टकी थोक्‍ला तेरी ताम्‍ङेतिवा क्‍युर्नी ज्‍याकिन। तमा ती ताम्‍ङेतिवा तेरी ज्‍यरा ज्‍यिरा दोके यिन सिनी नोक्‍यायी। तुक क्‍यानी ङे येशू ख्रीष्‍टला ङ्‍ये थुप्‍शी, 9 तमा खो ताङ मुला च्‍यिक्‍पा राङ च्‍युङ थुप्‍शी। येलुङ ठिमला तेन्‍नी टेङ्‍बु यिन सिनी ङ नो मिकी, यिने तन्‍दा येशू ख्रीष्‍टला तेपा क्‍यासिमा वुङ्‍गुप ति वुतुङ के टेङ्‍बु यिन। ती ति येशूला तेपा क्‍यासिमा कोन्‍छ्‍योक नेमा वुङ्‍गुप टेङ्‍बु यिन। 10 ङला गोवु तेरी ताम्‍ङेतिवा ति दी यिन, ख्रीष्‍टला ङो शेवु ताङ खो टुङ्‍नी ङोसु लावु ओङ ति हाक्‍कोवु ताङ खोकी दाक्‍पी थोक्‍ला दुक्‍पा खुरुप दोके ङे साङ खोकी थोक्‍ला शि राङ गोसिनाङ शि थुप्‍शी। 11 तमा च्‍युङ्‍सिन ङ शिसिमा शेप ने सेन्‍बु लङ थुप्‍शी।

12 ती तेरी ताम्‍ङेतिवा ङे गोमाला के ङ्‍येनी वे सिनी सिक्‍यावु मिन, ती ताम्‍ङेतिवा तन्‍दा तेरी च्‍युङ वे सिक्‍यावु साङ मिन, यिने येशू ख्रीष्‍टकी ङला खोरो ति जो नङ्‍सुङ। ती तप्‍की ङ ख्रीष्‍ट दोके मिजी क्‍योङ थुपुपला छ्‍योङ्‍बाल ग्‍यप्‍नी डोयी वे। 13 ओ अच्‍युनुपतिवा, ङला तन्‍दा साङ ती थोप्‍नी वे सिनी नो मिकी, यिने ङ लाका च्‍यिक ति कितिन। ती ति काङ यिन सिसिन गोमी ताम्‍ङेतिवा क्‍युर ज्‍याक्‍नी तिङ्‍ला वुङ्‍गुप 14 येशू ख्रीष्‍ट नेमा कोन्‍छ्‍योककी देवाच्‍येन नेसुर ङला कताङ नङ्‍गुप छ्‍यक्‍तक थोपुपला ङ कशेन छ्‍योङ्‍बाल ग्‍यप्‍नी डोयी वे।

15 तमा दाक्‍पु तेपा क्‍यानी रम्‍बु वोतुप मीतिवा तेरीकी तुकै नासाम तोङ गोकिवी। दोजो ललाइ मीतिवी नासाम ति कुतुक कुतुक वोसुङ सिसिन ती ति कोन्‍छ्‍योककी ख्‍यिराङला ठछ्‍येली छ्‍या देन्‍गिवी। 16 काङ यिन्‍सिनाङ दाक्‍पु दे सेक लेप्‍नी वे, तीला राङ रम्‍बु क्‍यानी मिजी क्‍योङ्‍गुप।

17 अच्‍युनुपतिवा, ङे काङ क्‍यावे, ख्‍यिरा साङ तुकै राङ नरी लुमु से। तमा ङ्‍यिरा मिजी नेसुर छ्‍या तेन्‍दुप दोके क्‍यानी मिजी क्‍योङ्‍गुप यम्‍बा मीतिवाला ल्हानी लोपा। 18 ख्‍यिराङला ङे गोमाला थेङ्‍मा बङी सिक्‍यायी, त येलुङ ङ ङुयी सिरा सिरिन। काङ यिन सिसिन मीतिवा बङी ख्रीष्‍ट येशूकी ग्‍यङ्‍शिङकी थोक्‍ला डला गल्‍नी युकिवी। 19 तिवा डोप लाम ति ङ्‍येलाला ना डोप यिन। च्‍यिलासिसिन तिवा कोन्‍छ्‍योकला मिन, साप ताङ थुङ्‍गुपकी थोक्‍ला तिराङ सेम नोजु किवी। तिवी खोप्‍रे क्‍यावु लाकातिवाला छासे ल्‍यामु यिन सिनी सिवी, यिने तिवी क्‍यावु लाका ति ङोछा लोङ्‍गुप लाका यिन। तिवी जम्‍बुलिङकी च्‍यालकतिवाला तिराङ नासाम तोङ्‍गिवी। 20 यिने दाक्‍पु याङ देवाच्‍येनला वोतुप कोन्‍छ्‍योककी ग्‍येल्‍खापकी मीतिवा यिन। तमा दाक्‍पुला दिक्‍पा ने थर ज्‍यितुपला देवाच्‍येन नेमा फेपुप येशू ख्रीष्‍टला राङ दाक्‍पु छासे गुनी देन वे। 21 खोकी ङारकी राङ जम्‍बुलिङला वोतुप तेरी च्‍यालकतिवा खोकी ओङला ज्‍योक थुप्‍किवी। तमा खोकी ओङ नेमा राङ दाक्‍पी रुलुप जु ति खोकी मोवाला वोतुप जु दोके सम्‍बा फो ज्‍यिकिवी।