4
1 तुक क्यानी अच्युनुपतिवा, ङ ख्यिराङला ङ्यिङ्ज्ये लानी नम पेला ठेतुप सिनी नासाम शर्किनोक। तमा ख्यिराङला नासाम तोङ्गुप पेला ङ छासे गा लानी मीतिवाला ख्यिरा कोर्ला तेके कितिन। ङे ङ्यिङ्ज्येवु अच्युनुपतिवा, ख्यिराङ तुक राङ क्यानी चोवो येशूला तेपा रम्बु क्यानी देता।
पावलकी टोङ्गु
2 इयोदिया ताङ सुन्तुखेला ङ छासे क्यानी गोङ्बा शोयिन, ख्यिराङ ङ्यिकर चोवोकी मीतिवा यिन्दुप तप्की थिन्नी देता। 3 ङ ताङ मुला लाका ल्यामु कितुप दाल्जो, ङ ख्युरुङला साङ सिरिन। ती आम्पुमतिवाला दाल्जा किटे किसा। च्यिलासिसिन ङ लेन ल्यामु ख्याप्टाक कितुप पेला तिवी क्लेमेस ताङ ङे मुला वोतुप यम्बा दाल्जातिवी मुला लाका टेमु क्यासुङ। तमा कोन्छ्योककी तिवी मिङ ति खोकी मिजीकी थेप नाङ्ला टि वे।
4 चोवो येशू ख्यिरा मुला ज्युवु तप्की ख्यिराङ नरी सेम गा किसा। ङ येलुङ सिरिन, ख्यिराङ सेम गा किसा। 5 ख्यिराङ च्यङ्च्यु सेम्बा वोतुप ति तेरी मीतिवाला छ्या तेन। नासाम तोङा, चोवो ङमु राङ फेपिन वोतो। 6 ख्यिराङ काङ साङ पप माकी, यिने मोपोर कितुप पेला कोन्छ्योकला थुचिछे पुल्नी ख्यिराङला गोवु तेरी ताम्ङेकी थोक्ला खोला गोङ्बा शु। 7 तुक क्यासिन मी नासाम तङ्गुप सिनाङ ल्हक्पा वोतुप कोन्छ्योककी लोदिमुकी ख्यिरा सेम ताङ नासाम ति येशू ख्रीष्टकी ओङ नेसुर र्होकितो।
8 तेरी सिनाङ तिङ्ला अच्युनुपतिवा, चुका ताम्ङे ति टेङ्बु नोके, चुका ताम्ङेला ताङ्देन कि गोवु नोके, चुका ताम्ङे टेके नोके, चुका ताम्ङे ति क्येन मेतुप नोके, चुका ताम्ङे ति ङ्यिङ्ज्येवु नोके, चुका ताम्ङे ति चिताङ कि गोवु नोके, तीला राङ नासाम तोङ। दोजो ललाइ छ्ये ताङ टेन छ्योवु वोसिन ती ताम्ङे ति ल्यामु नासाम तोङा। 9 ख्यिरा चुका ताम्ङे ति ङे नेसुर लाप्वे, चुका ताम्ङे ति सेमला लावे, चुका ताम्ङे ति ङे ख नेमा थोवे, चुका ताम्ङे ति ङे मिजीला थोङ्वे, ती दोके राङ की। तमा लोदिमु नङ्गुप कोन्छ्योक ख्यिरा मुला ज्युकितो।
बुल्वाकी थोक्ला थुचिछे पुलुप
10 ङ्यिमा चेयी ज्युक्ला येलुङ ख्यिरा ङला ङ्याम क्यावु थोङ्नी चोवो येशू नेसुर ङ छासे गा लानी वे। वुतुङ के ख्यिरा ङे थोक्ला पप किनोक, यिने ख्यिरा ङला दाल्जा कितुप छल्सिनाङ तुजे माच्युङ्नोक। 11 कतुकारला ख्येल्सुङ सिनी ङे किदुक शेतुप मिन, यिने चो पेला साङ लोदिमु कि गोकिवी सिरुप ति ङे लापिन। 12 ङे लोला बङी वोसिनाङ मेसिनाङ, चुक क्यानी मिजी क्योङ गोकिवी सिरुप ति ङला छ्या वे। डावु पेला ताङ ल्होवा कोम्बाला ताङ, बङी वोतुप पेला ताङ कतुकारला ख्येलुप पेला ताङ, चो पेला साङ लोदिमुला देतुप ति ङे लापिन। 13 च्यिलासिसिन ख्रीष्टकी नङ्गुप ङार नेसुर राङ ङ तेरी ताम्ङे कि थुप्किवी। 14 यिन्सिनाङ ङला छेटाङ ख्येलुप पेला ख्यिराङ ङे मुला राङ दुक्पा खुर्टे क्यानी छासे ल्यामु क्यासुङ।
15 थल्माला लेन ल्यामु ख्याप्टाक कितुपला ङ माकेडोनिया नेसुर क्येनी डोप पेला ख्यिरा मिसिन यम्बा चर्चकी मीतिवा सी साङ ङला दाल्जा किटे माक्या। ती ताम्ङे ति ख्यिराङ फिलिप्पीतिवाला साङ छ्या वे। 16 ख्यिरा याङ ङ थेसलोनिकेला वोतुप पेला साङ थेङ्मा च्यिक चोयी ङ्यी चोयी ङे थोक्ला दाल्जा किटे क्यासुङ। 17 ङला बुल्वा गोकिवी सिक्यावु मिन, यिने कोन्छ्योककी ख्यिराङला मोलाम नङ्गुप ति ल्हाप नोनी ङे ती ताम्ङे सिक्यावु यिन। 18 ख्यिरा इपाफ्रोडिटसला कल्नी तङ्गुप बुल्वा ति ङे लकला ख्येल्सुङ। ती बुल्वातिवा ङे थोप गोवु सिनाङ मङ यिन। ती ति टी जङ्बु खाप पो दोके ताङ कोन्छ्योकला गा लङ्गुप ताङ खोकी सेमला डोप जिन्बा दोके यिन। 19 ङे कोन्छ्योककी खोरे मोवाला वोतुप ग्यक्चेकी टोङ्बा ति येशू ख्रीष्ट नेमा ख्यिराङला ख्येलुप कतुकारतिवा तेरी डुप ज्यिकिवी। 20 त याङ दाक्पी पपा कोन्छ्योकला नरीकी नरी मोवा वुङ्शी। आमिन।
पावलकी तिङ्मी टसी देलेक
21 येशू ख्रीष्टला तेपा कितुपतिवा तेरीला टसी देलेक वे सिनी सिसा। ङे मुला वोतुप नुपतिवी साङ ख्यिराङला टसी देलेक सिनी तङ वोतो। 22 दे वोतुप येशू ख्रीष्टला तेपा कितुप मीतिवा तेरी ताङ खक्छ्येवुला रोमी ग्येल्वी ग्येल्खाङकी मीतिवी साङ ख्यिराङला टसी देलेक सिनी तङ वोतो। 23 चोवो येशू ख्रीष्टकी कटिन ति ख्यिरा सेमला वुङ्शी।