1 ती तप्‍की ख्‍युरुङ च्‍यिला मी यम्‍बाला क्‍येन तेर्किवी? काङ ख्‍युरुङ ति क्‍येन मेतुप यिन रो? ख्‍युरुङ मी यम्‍बाला क्‍येन तेर्किवी, यिने ती क्‍येन ति ख्‍युरुङला राङ फोकिवी। च्‍यिलासिसिन ख्‍युरुङ मी यम्‍बाला क्‍येन तेर्किवी, यिने ख्‍युरुङ साङ ती लाका राङ किवी। 2 तुका लाका दुक्‍टा कितुप मीतिवाला कोन्‍छ्‍योककी टेङ्‍बु क्‍यानी ठिम क्‍या नङ्‍गिवी सिरुप ति दाक्‍पुला ल्‍यामो क्‍यानी छ्‍या वे। 3 ख्‍युरुङ तुका लाका दुक्‍टा कितुपतिवाला क्‍येन तेर्किवी, यिने ख्‍युरुङ ति ती लाका दुक्‍टा राङ किवी सिसिन काङ ख्‍युरुङ कोन्‍छ्‍योककी पर्च्या नेसुर थर थुप्‍किवी रो? 4 याङ्‍ना कोन्‍छ्‍योककी ख्‍युरुङला सेम ग्‍युर च्‍यिनी दिक्‍पा ने थर ज्‍यितुपला गा कितुप ति हाक्‍माकोनी खोकी च्‍यम्‍बा ताङ हम क्‍या देतुप ताम्‍ङेला मो बेप्‍किवी रो? 5 ख्‍योरो सेम क्‍योङ्‍बु वोतुप ताङ दिक्‍पा ने ग्‍युरुप सेम मेतुप तप्‍की कोन्‍छ्‍योककी मी रे रेला च्‍योङ्‍डा वोतुप टेङ्‍बुकी ठिम क्‍या नङ्‍गुप तुजेला खोकी पर्च्या ति ख्‍युरुङला मङ मङ फोकितो। 6 कोन्‍छ्‍योककी मी रे रेला तिवी काङ काङ क्‍यावे, ती दोके छ्‍यक्‍तक नङ्‍गिवी।*२:६ भजन ६२:१२ 7 छेटाङ ख्‍येल्‍सिनाङ हम क्‍यानी लाका ल्‍यामु कितुप ताङ कोन्‍छ्‍योककी थोक्‍ला मोवा ताङ ताङ्‍देन क्‍यानी खोकी मिङला नाम्‍साङ मिशिवु मिजी छोलुपतिवाला खोकी नाम्‍साङ मिशिवु मिजी नङ्‍गिवी। 8 यिने खुरुङला तिराङ नासाम तोङ्‍गुप ताङ कोन्‍छ्‍योककी सुङ टेङ्‍बुला माङ्‍येन्‍नी लाका दुक्‍टा तिराङ कितुपतिवाला खोकी ङ्‍यिर्मु ताङ पर्च्या तोङ्‍गिवी। 9 तुका लाका दुक्‍टा कितुप मीतिवा तेरीला छेटाङ दुङल ख्‍येल्‍गिवी। ती छेटाङ दुङल ति गोमाला यहूदीतिवाला ख्‍येल्‍गिवी, ती ज्‍युक्‍ला यहूदी मिन्‍दुप मिरिक यम्‍बाकी मीतिवाला ख्‍येल्‍गिवी। 10 यिने लाका ल्‍यामु कितुपतिवाला खोकी मोवा ताङ ताङ्‍देन ताङ लोदिमु नङ्‍गिवी। ती मोवा ताङ ताङ्‍देन ताङ लोदिमु ति गोमाला यहूदीतिवाला नङ्‍गिवी, ती ज्‍युक्‍ला यहूदी मिन्‍दुप मिरिक यम्‍बाकी मीतिवाला नङ्‍गिवी। 11 च्‍यिलासिसिन कोन्‍छ्‍योककी नाम्‍साङ ललाइला ल्‍यामु, ललाइला मेलोवा मिकिवी।

12 कोन्‍छ्‍योककी मोशाला नङ्‍गुप ठिम छ्‍या मेतुप यहूदी मिन्‍दुप मिरिक यम्‍बाकी मीतिवी दिक्‍पा क्‍यासिन तिवी क्‍यावु दिक्‍पाकी थोक्‍ला तिवा ना डिवी। तमा खोकी नङ्‍गुप ठिम छ्‍या वोतुप यहूदीतिवी ती ठिमला मातेन्‍नी दिक्‍पा क्‍यासिन खोकी ठिमला सिक्‍यावु दोके पर्च्या तोङ्‍गिवी। 13 च्‍यिलासिसिन ठिम ङ्‍येन्‍नी मीतिवा ति कोन्‍छ्‍योककी थोङ्‍दाङला टेङ्‍बु मेवी, यिने ती ठिमला युकुप मीतिवा ति कोन्‍छ्‍योककी थोङ्‍दाङला टेङ्‍बु गिवी। 14 यहूदी मिन्‍दुप मिरिक यम्‍बाकी मीतिवी मुला मोशाकी ठिम ति मे, यिने मोशाकी ठिमला सिक्‍यावु दोके तिवी सेम नेमा मिजी टेङ्‍बु क्‍याङ्‍सुङ सिसिन, तिवी मुला ठिम मेसिनाङ ती ति तिवी मिजीकी थोक्‍ला ठिम यिन। 15 तुक क्‍यानी कोन्‍छ्‍योककी ठिमला काङ गोवु ति तिवी सेमला टि वे सिरुप ति तिवी सेम नेमा पङ्‍बु तेर्किवी। तमा तिवी सेमला वोतुप ठिमकी तिवी नासामला ल्‍यामु काङ यिन, मेलोवा काङ यिन सिरुप ति बेकिवी। 16 दी ताम्‍ङे ति ङे ख्‍याप्‍टाक क्‍यावु लेन ल्‍यामुला सिक्‍यावु दोके येशू ख्रीष्‍ट नेसुर कोन्‍छ्‍योककी मीतिवी क्‍यावु छ्‍याकला वोतुप ताम्‍ङेतिवा तेरीकी खला ठिम कितुप तुजेला ठछ्‍येली हाक्‍कोकिवी।

17 दोजो ख्‍युरुङ ङ यहूदी यिन सिवी, ठिमला रेवा क्‍यानी कोन्‍छ्‍योक ताङ मुला तम्‍जी ल्‍यामु वे सिनी अम्‍बारङ्‍शिङ किवी, 18 तमा दोजो ख्‍युरुङ खोकी नोवा साङ हाक्‍कोकिवी, ख्‍युरुङ कोन्‍छ्‍योककी ठिम लापुप तप्‍की खक्‍छ्‍येवु ताम्‍ङेतिवा साङ गिवी सिनी सिवी, 19 तमा दोजो ख्‍युरुङ मिक शर्वाला लाम छ्‍या देन्‍दुप मी यिन, नक्‍तोमीला लाम माङ्‍येवु मीतिवाला लाम छ्‍या देन्‍दुप मी यिन सिनी सिवी, 20 तमा दोजो ख्‍युरुङ कोन्‍छ्‍योककी नङ्‍गुप तेरी ठिम नेसुर रिक्‍पा ताङ मिजी टेङ्‍बुकी कोर्ला हाक्‍कोवु तप्‍की अम्‍बारङ्‍शिङतिवाला मेलोवा गल्‍सिन ल्‍यामु जेवी, काङ साङ हाक्‍मोकोवु मीतिवाला येन्‍देन तेर्किवी सिनी सिवी सिसिन, 21 च्‍यिला ती ताम्‍ङे ति खुरुङ ति मालाप्‍नी मी यम्‍बातिवाला तिराङ लोप्‍किवी? दाक्‍पी कुन कितुप मेवी सिनी ख्‍यिरा मीतिवाला ति लोप्‍किवी, यिने ख्‍युरुङ ति च्‍यिला कुन किवी? 22 शम्‍डेन कितुप मेवी सिनी ख्‍योरो मीतिवाला लोप्‍किवी, यिने ख्‍युरुङ ति च्‍यिला शम्‍डेन किवी? तमा ख्‍युरुङ ल्‍हतिवाला ताङ्‍देन कितुप मेवी सिनी सिवी, यिने च्‍यिला ल्‍हङाङकी च्‍यालक राङ कुन किवी? 23 काङ ख्‍युरुङ कोन्‍छ्‍योककी नङ्‍गुप ठिमकी कोर्ला तेके किवी, यिने च्‍यिला ख्‍युरुङ ति खोकी ठिमला मातेन्‍नी खोला ताङ्‍देन मिकिवी? 24 ती तप्‍की कोन्‍छ्‍योककी सुङला “ख्‍यिरा तेन्‍दोककी यहूदी मिन्‍दुप मिरिक यम्‍बाकी मीतिवी कोन्‍छ्‍योकला मारे तोङ्‍गिवी।” सिनी टि वे।*२:२४ यशैया ५२:५; इजकिएल ३६:२२

25 दोजो ख्‍युरुङ कोन्‍छ्‍योककी नङ्‍गुप ठिमला युकिवी सिसिन यहूदीतिवी च्‍येतुप लुक्‍सु तेन्‍दुप साङ तेन्‍दोक वे, यिने ठिम मातेन्‍सुङ सिसिन च्‍येतुप लुक्‍सु तेन्‍दुप साङ तेन्‍दोक मे। ख्‍युरुङ ति यहूदी मिन्‍दुप मिरिक यम्‍बाकी मीतिवा दोके राङ यिन। 26 तुक क्‍यानी च्‍येतुप लुक्‍सु माक्‍यावु मिरिक यम्‍बाकी मीतिवी कोन्‍छ्‍योककी नङ्‍गुप ठिमला सिक्‍यावु दोके मिजी क्‍योङ्‍गिवी सिसिन च्‍येतुप लुक्‍सु मातेन्‍सिनाङ च्‍येतुप लुक्‍सु तेन्‍दुप यहूदीतिवा दोके मिन रो? 27 ती तप्‍की जुला च्‍येतुप लुक्‍सु माक्‍यावुतिवी कोन्‍छ्‍योककी नङ्‍गुप ठिमला वोतुप दोके मिजी क्‍योङ्‍गिवी सिसिन तिवी च्‍येतुप लुक्‍सु क्‍यासिनाङ कोन्‍छ्‍योककी ठिमला सिक्‍यावु दोके मिजी मोक्‍योङ्‍गुप मीतिवाला क्‍येन तेर्किवी। 28 तुक क्‍यानी ख तिराङकी ङ ति यहूदी यिन सिरुप ताङ च्‍येतुप लुक्‍सु क्‍यानी छ्‍या देन्‍दुप ति वुतुङ्‍की यहूदी मिन। 29 यिने वुतुङ्‍की यहूदी टेङ्‍बु ति खोरो सेमगी दिङ नेज्‍युनी कोन्‍छ्‍योककी ठिमला युकिवी। तमा वुतुङ्‍की च्‍येतुप लुक्‍सु क्‍यावु ति ठिमला सिक्‍यावु दोके जुला तिराङ कितुप मिन, कोन्‍छ्‍योककी थु चाङ्‍मा नेमा सेमला क्‍यावु यिन। तुका मीतिवाला मी नेसुर मिन, कोन्‍छ्‍योक नेमा ताङ्‍देन ङ्‍येकिवी।