2
मी कुतुक कुतुकला येन्देन
1 यिने तीतस ख्युरुङ ति येन्देन टेङ्बु तिराङ लोप। 2 मी गावातिवाला कुसुमी देतुप ताङ ताङ्देन कि छ्योवु ताङ खुरुङला डेकला ज्योक थुपुप जो। तमा तिवाला तेपा रम्बु ताङ ङ्यिङ्ज्ये कितुप ताङ हम क्यानी दे थुपुप वुङ गोकिवी सिनी लोप। 3 तुक राङ क्यानी मी गामातिवा किताङ नालु ति टेङ्बु वोतुप ताङ मी यम्बी कोर्ला ताम्ङे मेलोवा मिकिवु ताङ छ्याङ्गेले मेतुप ताङ चुका ति ल्यामु नोके तिराङ लोप्शी 4 तुक राङ क्यानी मी गामातिवी पुम्पेजा ज्येन्दातिवाला दाक दाक्पी ख्योवा ताङ पेजातिवाला ङ्यिङ्ज्ये कितुप ताङ 5 खुरुङला डेकला ज्योकुप ताङ खोरो ख्योवी मुला टेङ्बु वोतुप ताङ खाङ्बा शिङ ल्यामो क्यानी ल्हाप ताङ च्यङ्च्यु सेम्बा वोतुप ताङ रङगी ख्योवी ओङला दे गोकिवी सिनी लोप्शी। तुक क्यासिन कोन्छ्योककी सुङला मी यम्बी मारे मोतोङ्शी। 6 तुक राङ क्यानी ख्योक्पेजा ज्येन्दातिवाला साङ डेकला दे सिनी टोङ्गु बिन। 7 तमा ख्युरुङ लाका तेरीला टेङ्बु क्यानी ख्योरो मिजी ति यम्बाला छ्या तेन। ख्योरो लोपुप येन्देन ति टेङ्बु ताङ ताङ्देन वोतुप ताङ 8 क्येन मेतुप वुङ्शी। तमा सी साङ ख्योरो ताम्ङेला मारे तोङ मुथुप्शी। तुक क्यानी ङ्यिरा तेन्दोकला लावुतिवी ङ्यिरा कोर्ला सिरुप ताम्ङे काङ साङ माङ्येनी ङोछाला ख्येल्शी।
9 योक्पुतिवा साङ दाक दाक्पी ज्यिन्दाककी ओङ्ज्येनला देनी ज्यिन्दाकला गा लङ्गुप ताङ ख मग्यकुप वुङ गोकिवी सिनी लोप। 10 तिवा कुन कितुप मेङ्शी, यिने तेपा कि छ्योवु वुङ्शी। तुक क्यासिन तिवी तेरी ताम्ङेला दाक्पुला दिक्पा ने थर ज्यितुप कोन्छ्योककी कोर्ला लापुप सुङ ति टेङ्बु नोक सिनी हाक्कोकिवी।
11 च्यिलासिसिन कोन्छ्योककी तेरी मीतिवाला दिक्पा ने थर ज्यितुपला कटिन नङ वे। 12 ती कटिनकी राङ दाक्पु ति कोन्छ्योकला गा मलङ्गुप लाका ताङ तेपा मिकिवु मीतिवी दोके जम्बुलिङकी च्यालकतिवाला ङ्यिङ्ज्ये कितुप क्युर्नी दी जम्बुलिङला देतुप पेला खुरुङला डेकला ज्योकुप ताङ टेङ्बु वोतुप कोन्छ्योकला गा लङ्गुप मिजी क्योङ्गुपला येन्देन नङ्गिवी। 13 ती तप्की चोछ्येवु कोन्छ्योक ताङ दिक्पा ने थर ज्यितुप चोवो येशू ख्रीष्ट फेपुप मोवाकी थोक्ला दाक्पु रेवा क्यानी गुनी देकिवी। 14 ती ख्रीष्टकी राङ दाक्पुला रङगी तेरी दुक्टातिवा नेसुर थर ज्यितुपला खोरे मिजी साङ दाक्पी थोक्ला नाङ्सुङ। तमा लाका ल्यामु कितुप खक्छ्येवु मिरिक जोपला सेम टेङ्बु जो नाङ्सुङ। 15 तुक क्यानी ख्युरुङ दी तेरी ताम्ङेतिवा मीतिवाला येन्देन बिन, ओङ्ज्येन ताङ मुला टोङ्गु बिन्नी वोरु तेन। तमा सी साङ ख्युरुङला ङ्यिङ्मर मिकिशी।