3
Yasu agiiꞌbi Müüsa
Nggeege nagöre eede na ma kaniisa no insili no na osso ka tümmüneene ma ꞌdotomboꞌdo, aaga ïïrï Yasu ya tafïïnï ma tamma tanno aja uugaara ma kaꞌboge yaaja ka tamma kini ya. Iꞌi ümmü tumma na ömöꞌdï tiya agesse iꞌi ya, afa ma Müüsa ka tagümmü tumma ma Masala ka ꞌdï ma Masala nyeꞌdꞌde kungngo. Yasu iꞌi yungngo ïdhïndhï adagiiꞌbi Müüsa afa ma tatürüꞌböönö ka tïdhïndhï adagiiꞌbi ꞌdï ka eyi tiya iini. Ömöꞌdï ya arüꞌbü ꞌdï ya inggide, lakiini Masala oogo mungngo marüꞌbü eema ïnꞌdïlï. A Müüsa agaꞌdiila ka ꞌdï ma Masala nyeꞌdꞌde kada ömöꞌdï ma linggo eema tumma na ara teemadene ka naguuru tanno töꞌdö no. Lakiini Almasiihi kada ꞌBiiꞌbala ya aꞌdiila ya ka ꞌdï ma Masala. Angnga ka ꞌdï tiya iini, üürü kafa angnga taalo kariꞌba angnga ma tafa ka eema tiya aja ka tïndhïgï iꞌi ya.
Aaga adïnö ma kadu na taalo kamma no
Afa ma Koronggore tiya Insili ya ka tiki,
“Uuru no kada kara taföönyö ꞌbugeyi ya Masala ya,
aaga fa tasilli tumma miini
afa tiya maaga ka tagüünï ka uuru ma taꞌbꞌbadene ka dhïïle ya kungngo.
Kita a kafaafa ma aaga ka takaꞌbꞌba kagawwa aꞌa ka eedi kiji linggo neede nja eene a nagürüünü kukumu kadu keera.
10 Iꞌi yungngo eede ka tagorooꞌbo nja sere tiya niki aꞌda,
‘Nanggeedi neene turi kungngo kaama,
taalo kussu nafïïnï yeede.’
11 Aꞌa naküdöönö ka tagorooꞌbo tanno eede,
‘Eege taalo kara co ka talïngnge tanno eede.’ ” 3.11 Tüüsü ma Nakaaru 95.7–11
12 Nagöre eede, aaga adïnö koꞌdo, ömöꞌdï könö ana kada afa tana eedi ya toroko ya, amma ka Masala apadaga oona keere ka Masala tammo efe ka ꞌdï mo. 13 Adha ya, aaga fünügünja koꞌdo ꞌbucca kudumma tumma ma uuru kungngo ka sorne ïïꞌdï tatoroko tïïsïnï ömöꞌdï öccö ana kada asilli eema. 14 Angnga ka unggodho nja Almasiihi kaja kara tagümmü ajeene dhorro taꞌbilli ataꞌdiila tanno aganna kaja ka dhidha no. 15 Sorne ma Masala iki,
“Uuru no, kada ka taföönyö ꞌbugeyi ya Masala,
aaga fa tasilli eema afa maada ka tagasilli tumma na Masala kungngo.” 3.15 Tüüsü ma Nakaaru 95.7–8
16 Kadu öccö eege kungngo kakaanu ka tumma? Taalo kadu no nyeꞌdꞌde na Müüsa ka ööꞌdö ana eege ndama Misiri no? 17 Kamada eege kungngo a Masala ka tagorooꞌbo ada kene a nagürüünü kukumu kadu keera no? Nja kadu tanno agüünï tatoroko no kaꞌdïnggö kaaya ka dhïïle. 18 Kamada eege kungngo a Masala ka taküdöönö aꞌda taalo kara co ka talïngnge tanno oono? Taalo kadu na silli tumma noono no? 19 Kiji angnga eege taalo kambaanya co, kudumma eene kitaalo kamma.

3:11 3.11 Tüüsü ma Nakaaru 95.7–11

3:15 3.15 Tüüsü ma Nakaaru 95.7–8