3
1 A ꞌbïtïngngö ꞌdee nïïmö ya Yahüüdü kööꞌdö keere iini iꞌi ya ïïye? A taradene köꞌdö keere aminna? 2 Kadhabbu nafïïnï, ka dhidha Masala magümmünü Yahüüdü ka tumma tanno oono. 3 Üürü ömöꞌdï inggide taalo amma? Ara tanu ka tamma tanno eene tanangnga Masala ka aadha ka tamma tanno eene? 4 Uꞌu, tumma na Masala ka timinꞌda anangnga ömöꞌdï ka korokoro nyeꞌdꞌde. Sorne iki,
“Tumma nüüdü kara tussu adene afeꞌde
ka ꞌbuugu ma serïye ara tumma nüüdü tiiꞌbaana.” 3.4 Tüüsü ma Nakaaru 51.4
5 Üürü tatoroko naaja kala taꞌdiila ꞌbïïnï kungngo ara angnga tiki nya? Masala oogo müünï ada kadu kuꞌbu, kono ka ööꞌdö a tagorooꞌbo tanno oono angnga? Aꞌa neema ꞌbïtïngngö ka tamöꞌdï. 6 Uꞌu, üürü taalo nggeege ara Masala tasigi kadu nya? 7 Üürü korokoro yeede anangnga tumma na Masala ka tadhorro a tïdhïndhï tanno oono, na aꞌa sa tasigidene ka tamöꞌdï tiya toroko ya amana? 8 Aminna agu angnga taalo kiki aꞌda, “Kada küünï tatoroko amang ka taꞌdiila töꞌdö”? Kadu könö kakeela aꞌa kasigi aꞌa aꞌda aꞌa nadiri tumma na miini no, eege ka saga tahükümüdene kada adho ka fïïnï.
Kadu nyeꞌdꞌde koroko
9 Ïkïrï angnga kara tiki aꞌda minna? Angnga kagiiꞌbi kajeene? Taalo nggeege ꞌdo, assa ungngo takiki aꞌda Yahüüdü nja kajeene ꞌdo kungngo ka tauugaara ma tatoroko. 10 Sorne iki,
“Taalo ömöꞌdï ma taꞌdiila, salla unggodho kungngo taalo.
11 Taalo ömöꞌdï ma tussu,
taalo ömöꞌdï ma tasaasa Masala.
12 Kadu nyeꞌdꞌde kaama
kadagüünï tatoroko eege ïnꞌdïlï,
taalo ömöꞌdï unggodho üünï nïïmö ya aꞌdiila ya,
taalo unggodho kungngo.” 3.12 Tüüsü ma Nakaaru 14.1–3
13 “Naꞌbugeyi neene ka naala ma oofo na tanfaꞌda no,
nagonggoꞌdo neene kama korokoro.” 3.13 Tüüsü ma Nakaaru 5.9
Tümmü ma nöönï kungngo eene ka nanïïnö. 3.13 Tüüsü ma Nakaaru 140.3
14 “Nanïïnö neene kadigine ana linggi nja taꞌdiiri.” 3.14 Tüüsü ma Nakaaru 10.7
15 “Uune neene kïïsö ka tüüfü erïïdö.
16 Kagaꞌda ꞌbuugu küünï eema ya toroko ya kita eene kara co kide ya.
17 Fïïnï ma taꞌdiila taalo kussu.” 3.17 Asaiya 59.7–8
18 “Taalo riꞌba ma Masala eene ka ööye.” 3.18 Tüüsü ma Nakaaru 36.1
19 Kussu angnga nïïmö ya serïye ka teema ya, iꞌi adünügü co kadu tanno ka nïïsö ma serïye no, amang ka nanïïnö takïꞌdöönö, a kadu nyeꞌdꞌde ka ꞌbüdhülü töꞌdö kidha ma Masala. 20 Kudumma linggo ma serïye taalo ka tanangnga ömöꞌdï ka ꞌdiila ka Masala kidha, kudumma serïye amana angnga ka tussu tatoroko.
Tadho ka fïïnï nja Tamma
21 Lakiini ꞌbïtïngngö köꞌdö taꞌdiila na Masala aꞌda taalo serïye aꞌda serïye nja tumma ma naganeꞌbi kadïnö kini. 22 Oogo möꞌdö a tinsili a tamma ka Yasu Almasiihi kudumma taalo tambananjaana kuꞌbu nja ömöꞌdï tiya amma ya. 23 Kudumma kadu nyeꞌdꞌde kungngo ka oroko, taalo kussu fïïnï ma Masala. 24 Lakiini Masala manangnga eege ka ꞌdiila aꞌda taalo faana kide afaana ana eere ma Yasu Almasiihi ya oolona eege ya. 25 Masala manangnga iꞌi kada nïïmö ma tïrrï, ma tamma ka erïïdö tiya iini, oogo magüünï nggeege ma tala taꞌdiila noono, kudumma ka tidhi oona kuꞌbu tanno oono afa ka tatoroko kadagüünï adene ka dhidha. 26 Mala taꞌdiila noono ka ürüünü ma ꞌbïtïngngö amang kono tanangnga kadu na amma ka Yasu no ka tinsili.
27 Nïïmö ya amana angnga ka taꞌdiniga oona cooꞌdo iꞌi ya ïïye? Ara angnga taꞌdiniga oona cooꞌdo aminna? A lingngo? Uꞌu lakiini a tamma. 28 Kiki inggide aꞌda ömöꞌdï ara tinsili a tamma ka Masala aꞌda taalo alinggo a tumma ma serïye. 29 Ara Masala ta Masala tammo Yahüüdü unggodho eege? Alla oogo ma kajeene nyeꞌdꞌde afeꞌde, ïï oogo ma Masala ma tammo kajeene afeꞌde. 30 Kudumma Masala ma unggodho, manangnga Yahüüdü ka ꞌdiila a tamma kono afa moono ka amana kajeene ka ꞌdiila a tamma. 31 Nggeege ara angnga ta kaadha ka serïye a tamma? Uꞌu ara angnga tagümmünü serïye kuꞌbu.