1 Kachi Jitoꞌo:

“Vi konini ron ja ka kuini ron vi saꞌa ndaa ron,

te ka ndanduku ña ron jin rin.

Vi ndakaꞌan kava nuu ni ka kuvaꞌa ron,

vi nuu kana yuu nuu ni kekuei ron.

2 Vi ndakaꞌan ndi tata velu ron Abraham vi ndi nana vela ron Sara,

ñaꞌa ni skaku ni skivi ña,

chi nuu ni kana rin de, te maintnoꞌo ni maa de kuu,

su ni saꞌa vii ni saꞌa vaꞌa rin jin de,

te ni skaya kuaꞌa rin ndikin tata de.

3 Te jandaa ndija ja kundaꞌu ini rin ñuu Sión,

te ndakuñaꞌa rin tnoꞌo sii ini ndiꞌi nuu ni tnani,

te nuu ñuꞌu teꞌa ndasama rin ja nduu nuu ka oo xtnuu kuii,

te nuu ñuꞌu yichi nduu na kuinio Edén, nuu ni xtee maa rin xtnuu kuii.

Yun te vi ndakuantaꞌu ñayiu, te vi katai vi vi kanai nuu rin ja ka kusii ini.”

4 “Roon, ñayiu ñuu rin, vi konini te vi tanuu tnoꞌo kaꞌan rin,

chi nuu maa rin vaji tnoꞌo ja kaxtnoꞌo rin,

te tniuu ndaa ja saꞌa rin koyeꞌe nuu ñayiu in in ñuu.

5 Te ja oo yatni rin ja sandaa rin,

chi ja ñuꞌu ichi rin ja skaku niꞌnu ña rin,

te jin jakaꞌnu rin kotatnuni rin nuu ñayiu in in ñuu.

Te ñayiu ka oo jika, chi ka ndetu kaꞌnu ñai,

te ka kukanu ini ñai ja chindee chituu rin jin.

6 Vi koto niꞌni ichi andivi, te vi koto nuu ichi nuu ñuꞌu,

te vi kuni ron, chi naa andivi na kuinio ñuaꞌa,

te kutuꞌu ñuꞌu na kuinio in saꞌun,

te vi kuu ñayiu ka oo ñuyiu na kuinio chiukun,

su nikuii nikani koskaku niꞌnu rin ñayiu,

te siun ni kosaꞌa ndaa rin.

7 Vi konini ron ja ka jini ron vi saꞌa ndaa ron,

maa ron ñayiu ñuu ja ka tnaa ron Ley rin ini anu ron.

Te ma vi koyuꞌu ron nuu ka kaneꞌe ña ñayiu jin ron,

ni ma vi kuita ron nuu ka nani ñai jin ron.

8 Chi vi kaa ña tikixin jin ñayiu yun na kuinio saꞌun,

te na kuinio ixi ndikachi saa vi kaa ña tindaku.

Chi nikuii nikani kosaꞌa ndaa rin,

te siun ni koskaku niꞌnu rin ñayiu.”

9 Na ndoto, na ndoto ndaꞌa ni, vi Jitoꞌo san,

te ndundakui jin jakaꞌnu ni.

Na ndoto te saꞌa ni nagua ni saꞌa ni ndee jananaꞌa,

ndee tiempu ja ni yaꞌo yun,

chi maa ni kuu ia ni skuechi kueli Rahab,

ja kuu kiti xeen ñuꞌu nuu ndute mar.

10 Maa ni kuu ia ni sichi ndute mar, ndute ñuꞌu nuu kunu ndevaꞌa,

te ni june ni in ichi ndee nuu kunu kaꞌa ndute mar,

nagua ni ka yaꞌa ñayiu ni ndatau maa ni.

11 Te vi ndajiokuiin ñayiu ni ndatau Jitoꞌo,

te vi ka jitai vi ka kanai ndiukuei ñuu Sión.

Te vi siun ni vi kokusii ini, vi niꞌi in jasii ini ndevaꞌa vi koo jin,

te kujioo tnoꞌo suchi ini vi ja ka ndaꞌi ka kanai.

12 Te kachi ia Dios:

“Maa rin kuu ja taa tnoꞌo sii ini,

¿te na in ka kuu ron, ñayiu Israel, ja ka yuꞌu ron in ñayiu ja jiꞌi,

axi in seꞌe ñayiu ja naa nani kuinio yuku kuii?

13 ¿Te a ja ni ka ndunaa ini ron Jitoꞌo ron,

ia ni saꞌa ña jin ron, ia ni jata andivi vi ni jani yutnu ñuyiu?

¿Te nau ja ndiꞌi ni kiuu ka yuꞌu ron nuu ka jini ron

ja kiti ndevaꞌa ini tee saꞌa ndevaꞌa ndetnuni ña jin ron

nuu nduku de naxa xnaa ña de jin ndiꞌi ron?

Su vitna, ¿ndenu oo jakiti ini tee saꞌa ndevaꞌa ndetnuni ña jin ron?

14 Su ñayiu ka tnaꞌa tnundoꞌo ja ka ndesi vekaa,

chi ja oo yatni ja vi yai,

te ma vi kui ini vekaa yun, ni ma kokaꞌni ka ña ja vi kaa vi koꞌi.

15 Chi maa rin kuu Jitoꞌo ron,

te sivi rin kuu Jeovaa, ia ndakui ndevaꞌa.

Te maa rin kagua ndute mar, te saꞌa rin ja ka kañu xeen ola ndute yun.

16 Te taa rin tnoꞌo rin ja kaꞌan ron,

te chisaꞌu ña rin jin kati ndaꞌa rin,

chi ni jata rin andivi, te ni skuja rin nuu ni jani rin ñuyiu,

te jiñaꞌa rin nuu ñayiu ñuu Sión: Ñayiu ñuu maa rin ka kuu ron.”

17 Ndoto, vi Jerusalén, ndoto.

Ndakoo ron ja ni tnaꞌa ron tnundoꞌo jin jakiti ini Jitoꞌo,

chi ni jiꞌi ron nuu vasu nuu ñuꞌu jakiti ini ya vi ndee ni xndiꞌi ndiꞌi ron,

te ni ndajini saꞌun ron.

18 Te jin ndiꞌi seꞌe ja ni skaku ron,

ni in tu ni ondeka ña jin ron na ichi kaka ron,

te ndiꞌi seꞌe ja ni skuaꞌnu ron, tu na in ni otnii ndaꞌa ron.

19 Te uu jakueꞌe yaꞌa ni kii siki ron:

Ni ka xnaa ña jin ron, vi ni ka suꞌu ja ni onevaꞌa ron.

Ni ka jiꞌi seꞌe ron jin soko, vi ni ka jaꞌni ña jin.

Te tu na in ni kundaꞌu ini ña jin ron,

ni tu na in ni ndasaꞌa sii ini ña.

20 Te ni ka kuita seꞌe ron, te ndiꞌi ni skina ka nduei

na kuinio isu ja kanakau ti nuu ka kakuiko ti.

Chi ni kanakau jakiti ini Jitoꞌo siki seꞌe ron,

vi jakuxeen ia Dios ron nui.

21 Yun kuu ja vitna te konini maa ron ja tnaꞌa ron tnoꞌo suchi ini

ja ni ndajini ron, su masu jin vinu.

22 Suaꞌa kaꞌan Jitoꞌo, ia Dios ron, ia kaꞌan niꞌnu ja jaꞌa ñayiu ñuu ya:

“Vitna te xtajioo rin vasu ja saꞌa ja ndajini ron nuu ndaꞌa ron,

te ma koꞌo saꞌun ka ron vasu nuu ñuꞌu jakiti ini rin.

23 Te kuñaꞌa rin vasu rin ja vi koꞌo ñayiu ka saꞌa ndevaꞌa ndetnuni ña jin ron,

ja ni ka kachi nuu ron: Jinkotuu te na vi yaꞌa rin siki ron.

Te ni jinkotuu ron nuu ñuꞌu, te na kuinio ichi kuu yata ron ja ni ka yaꞌa ñayiu yun.”