1 Yun te ni jinokuei Jesús inka lado ndute mar nuu kuu yuku ja tnii Gadara. 2 Te vi inka ni nana ya nuu barco yun, te ni jino in tee ñuꞌu ña tachi ja ni kee de kuaꞌan de nuu ka yiyuꞌu ndiyi. 3 Te tee yun, chi ni oo de in kava veꞌe nuu ka yiyuꞌu ndiyi, te ni in tu na in kuu ja kuꞌni ña, ni jin cadena. 4 Chi kuaꞌa jichi ni ka ojuꞌni ndaꞌa de vi siꞌin de jin cadena, su tuu, chi ndiꞌi ni ojaꞌnde de vi ni oskuechi kueli de, te ni in tu ni okundee ja kaꞌnu ña jin de. 5 Te siun ni jika de yuku vi nuu ka yiyuꞌu ndiyi. Nduu vi ñuu ni kana de vi xtuji de maa de jin yuu. 6 Su vi jika ka vaji Jesús, te ni jini ña de, te ni jino de ni jinkuiin jiti de nuu ya. 7 Te vi ni kana koꞌo tachi ndee ini anu de, te jiñaꞌa:

―¿Nagua kuini ron ja vaji ron nuu oo rin, vi Jesús, Seꞌe ia Dios oo ndee sukun yun? Te jikantaꞌu rin nuu ia Dios ja ma taa ron tnundoꞌo koo rin ―jiñaꞌa.

8 Yun ni kaꞌan tachi yun, chi ja jiñaꞌa Jesús:

―Espíritu tachi, kee ini anu tee yaꞌa te kuaꞌan.

9 Te ni jikan tnoꞌo ña ya:

―¿Naxa nani ron?

Te jiñaꞌa:

―Legión ka nani rin, chi kuaꞌa rin ka kuu ―jiñaꞌa.

10 Te ni ka jikantaꞌu ndevaꞌa nuu ya ja ma keneꞌe ña ya yuku yun ja kiꞌinkuei. 11 Te yatni yuku yun ka ñuꞌu kuaꞌa kini ka jaa ti. 12 Te ndiꞌi tachi yun ni ka jikantaꞌu nuu ya ndee anu tee yun, te ka jiñaꞌa:

―Tetniuu ña na kiꞌinkuei rin nuu ka oo kini yun. Te kuandetu na ndekuei rin chii ti ―ka jiñaꞌa.

13 Yun te ni jandetu Jesús, te ni kanakuei espíritu tachi yun ini anu tee kuꞌu yun, te ni ndekuei chii kini yun, te vaa ndee uu mil ti ka kuu. Yun te ni ka jiko ini ndiꞌi kini yun, te ni ka jino ti makekuei ti, chi oo ndeyi, te ni kentakuei ti, ni ka tnaa ti maa ti ndee nuu ndute mar, te yun ni ka jiꞌi ti.

14 Yun te ni ka jino tee ka jito kini yun, kuanoꞌokuei de ja ni ka yuꞌu de, te ni ka ndakani de nuu ñayiu maa ñuu vi nuu ñayiu ka oo taka nuu yuku, te ni jaꞌankuei ñayiu yun, ni ka jinkoto nagua ni kuu. 15 Te nuu ni jinokuei nuu oo Jesús, te ni ka jini ja nukoo tee ni ñuꞌu ña kuakuaꞌa tachi, niꞌnu de saꞌun de, te ja ni nukuꞌun ndaa ini de, te ni ka yuꞌu ñayiu yun. 16 Te ni ka ndakani tee ni ka ojito kini yun nuu ñayiu naxa ni ndoꞌo tee ja ni ñuꞌu ña tachi yun vi naxa ni ka ndoꞌo kini yun. 17 Yun te ka jinkondei ka jikantaꞌui nuu Jesús ja kee ya kiꞌin ya nuu ñui yun.

18 Te nuu ni ndee ya nuu barco, te ni jikantaꞌu tee ni ñuꞌu ña tachi yun ja na kuandetu ya ja kiꞌinkuei de jin ya. 19 Su tu ni jandetu Jesús, chi saa suaꞌa jiñaꞌa ya:

―Kuanoꞌo ni veꞌe ni nuu ka oo tnaꞌa ni, te ndakani ni ndiꞌi javii javaꞌa ja ni saꞌa Jitoꞌo jin ni, vi naxa ni kundaꞌu ini ña ya jin ni ―jiñaꞌa ya.

20 Te kuanoꞌo de, te ni jinkondee de ndakani de nuu ñayiu taka ñuu ja tnii Decápolis ndiꞌi javii javaꞌa ni saꞌa Jesús jin de. Te ndiꞌi ñayiu ni ka saꞌu kuii kuiti ini.

21 Yun te ni ndajiokuiin tuku Jesús kuanoꞌo ya jin barco inka lado ndute mar, te yun ni ka kututu kuaꞌa ndevaꞌa ñayiu nuu oo ya yuꞌu ndute mar yun. 22 Te ni jino Jairo, in tee kuu nijaꞌnu nuu veꞌe ii sinagoga. Te nuu ni jini ña de jin ya, te ni jinkuiin jiti de nuu ya. 23 Te ni kaꞌan ndaꞌu ndevaꞌa de jin ya, te jiñaꞌa de:

―Ja ni kukaꞌu sesiꞌi san ja kui. Neꞌe ni na kiꞌon, te sonee ni ndaꞌa ni siki, nagua ja na nduvaꞌi te na kotekui ―jiñaꞌa de.

24 Yun te kuaꞌankuei ya jin de, te ka jata ndikin ña kuaꞌa ñayiu ja vi chitu tnui xiin ya kuaꞌankuei. 25 Te neꞌu ñayiu kuaꞌa yun kuaꞌan in ñaꞌa ja ni kuu uxi uu kuia kuꞌu ña kueꞌe taꞌu ña niñi. 26 Te ja ni kuu kani ndevaꞌa ndoꞌo ña, ja ni xnaa ña ndiꞌi ja nevaꞌa ña jin kuaꞌa tee tatna, su tu nagua jiniuꞌu saꞌun ja nduvaꞌa ña, chi saa suaꞌa viꞌi ka masakaꞌu. 27 Te nuu ni jini ña ka kaꞌan ñayiu ja saꞌa Jesús, te ni jintnaꞌa ña ichi yata ya neꞌu ñayiu kuaꞌa yun, te ni keꞌe ña saꞌun ya. 28 Chi ni ndakani ini ña: “Visi ja joo saꞌun ya na niꞌo keꞌo te nduvaꞌo”. 29 Te vi nuu saa ni jinkuiin ja taꞌu ña niñi jin ña, te ni jini ña ja ni nduvaꞌa ña. 30 Yun te vini ni jini Jesús ja ni nduvaꞌa in ñayiu jin jakaꞌnu ya, te ni jionenuu ya nuu ñayiu kuaꞌa yun, te ni jikan tnoꞌo ña ya:

―¿Ndee ni ni keꞌe saꞌun san?

31 Te ka jiñaꞌa tee ka skuaꞌa jin ya:

―¿Te nau ja jikan tnoꞌo ni na in ni keꞌe ña jin ni? Te ndiaꞌa maa ni ja ka xnaꞌma ña ñayiu kuaꞌa yaꞌa jin ni ―ka jiñaꞌa de.

32 Su maa ya, chi ndiaꞌa ya nii nuu oo ya, nagua ja kuni ya na in ni keꞌe ña jin ya. 33 Te ñaꞌa yun, chi vi suaꞌa niꞌi ña ja yuꞌu ña, chi ja jini ña naxa ni kuu jin maa ña. Ni jino ña, te ni jinkuiin jiti ña nuu ya, te ni ndakani ndaa ña ndiꞌi naxa ni ndoꞌo ña. 34 Te jiñaꞌa ya:

―Sesiꞌi, ni nduvaꞌa ni, chi ni kandija ña ni jin san. Kuanoꞌo sii ini ni, chi ja ni nduvaꞌa ni nuu kueꞌe yun ―jiñaꞌa ya.

35 Te vi nini kaꞌan ka ya, te ni jinokuei ñayiu ka oo veꞌe tee kuu nijaꞌnu nuu veꞌe ii sinagoga, te ka jiñaꞌi nuu de:

―Ja ni jiꞌi sesiꞌi ni. Te ma koxnaꞌa ka ni mastru yaꞌa ―ka jiñaꞌi.

36 Su Jesús, chi tu ni ndiꞌni ni ya ja siun ka jiñaꞌi, te jiñaꞌa ya nuu tee kuu nijaꞌnu veꞌe ii sinagoga yun:

―Ma koyuꞌu ni, chi suaꞌa ni kandija ni ―jiñaꞌa ya.

37 Te tu ni jandetu ya ja vi kondikin ka ña ñayiu jin ya, chi maa ni Pedro jin Jacobo vi ñani de Juan kuaꞌankuei jin ya. 38 Te nuu ni jino ya veꞌe tee kuu nijaꞌnu veꞌe ii sinagoga, te ni jini ya ka kuvaa ñayiu, ka ndaꞌi ka kanai. 39 Ni kiuu ya, te jiñaꞌa ya:

―¿Nau ja ka kuvaa ni vi ka ndaꞌi ni? Te suchi siꞌi luluu yaꞌa, chi masu ni jiꞌi, chi suaꞌa ni kixin ―jiñaꞌa ya.

40 Su ni ka jaku ndee ña ñayiu jin ya ja siun ni kaꞌan ya. Yun te ni keneꞌe ya ndiꞌi ñayiu ndee yeꞌe, te ni jaka ya tata vi nana suchi siꞌi yun vi tee kuaꞌankuei jin ya, te ni kiukuei ya nuu katuu suchi siꞌi luluu yun. 41 Te ni tnii ya ndaꞌi, te jiñaꞌa ya:

―¡Talita kumi! ―ja kei kaꞌan: Suchi siꞌi, nuu maa ron kaꞌan rin, ndakoo.

42 Te vi nuu saa ni ndakoi, te ni jikai, chi ja oi uxi uu kuia. Te ni ka yuꞌu ndevaꞌa ñayiu yun ja ni ndatekui. 43 Su ni tatnuni niꞌi ya ja ma vi kokaꞌan nuu ni in ñayiu ja vi kuni ja siun ni saꞌa ya, te ni tatnuni ya ja na vi kuñaꞌa ja kaa suchi siꞌi yun.