1 Guaꞌa ka kuu ja koteku tnoꞌo ja ñayiu guaꞌa kuo, masu ja konevaꞌo kuaꞌa jaguaꞌa.

Te suni guaꞌa ka kuu ja vi kaꞌan guaꞌa ñayiu jion, masu ja konevaꞌo plata axi oro.

2 Inuu ni ka kuu ñayiu kuika jin ñayiu kundaꞌu,

chi ndi ndui ni saꞌa maa Jitoꞌo.

3 Ñayiu jini nagua kuu, chi nuu jini ja vaji jakueꞌe, te kujioi.

Su ñayiu tu jini naxa saꞌi, chi yaꞌi kuaꞌin, te tnaꞌi tnundoꞌo nuu jakueꞌe yun.

4 Vi niꞌo jakuika vi jayiñuꞌu vi jakotekuo,

nuu ja vi saꞌa ndaꞌuo mao, te vi koyuꞌu niꞌnuo Jitoꞌo.

5 Tnu iñu vi ja skanakau ña oo nuu ichi jika ñayiu kueꞌe.

Su ñayiu jito vaꞌa mai, chi kujioi nuu jakueꞌe yun.

6 Kaxtnoꞌo ni nuu in suchi luluu ja na kakai ichi ndaa,

nagua ja visi ja ni kuu nijaꞌnui, te ma kujioi nuu ichi yun.

7 Ñayiu kuika, chi ka tatnuni nuu ñayiu ka kundaꞌu,

te ñayiu ndita, chi jinokuechi nuu ñayiu jiñaꞌa nuu.

8 Na in saꞌa jakueꞌe, te jakueꞌe ndaniꞌi ndatnaꞌa mai,

te nai, te ma kotatnuni xeen kai.

9 Koo vii koo vaꞌa ñayiu vaꞌa ini,

chi jiñaꞌi joo ja jai nuu ñayiu ka kundaꞌu.

10 Vi skunu ni ñayiu kuasun ini, te na naa ja ka tee tnaꞌi,

vi na yaꞌa ja ka jaxin tnaꞌi vi ja ka jiñaꞌa tnaꞌi jakanoo.

11 Ñayiu jinkuaan ini ja koo vii koo vaꞌi, te kaꞌin tnoꞌo luu,

chi kondeka tnaꞌa guaꞌi jin rey.

12 Jito guaꞌa ña Jitoꞌo jin ñayiu ndichi.

Su skunu nuu ini ña ya nuu kaꞌan ñayiu xndaꞌu ña.

13 Te ñayiu kuꞌndu, chi kachi: “Yeꞌe yun oo in ndikaꞌa,

te nuu ja na kiꞌin san, te kaꞌni ña ti nuu ichi yun”.

14 Yuꞌu ñaꞌa skindee yii ña kuu na kuinio in yau kunu,

te yun junkuei tee ni xtau tniaꞌa ña maa Jitoꞌo.

15 Ja tu jiniuꞌu kuu ja oo ini anu suchi kueli.

Su kujioi nuu jakueꞌe yun nuu ja na kanio jin in xnuu xii.

16 Ñayiu keneꞌe xuꞌun nuu ndaꞌa ñayiu kundaꞌu ja kokuu kuikai,

axi ñayiu skutaꞌu ña jin ñayiu kuika, chi ndi nduu ñayiu yun vi kokuu ndaꞌu.

17 Kuneꞌe xini te konini ron tnoꞌo ka kaꞌan tee ndichi,

te ndakani ini jin anu ron tnoꞌo ja kaxtnoꞌo rin yaꞌa.

18 Chi junkuaan ini ron nuu ja tavaꞌa ron ini anu ron,

te kotuaꞌa tnoꞌo nuu yuꞌu ron nani ore ja kaꞌan ron.

19 Te suni ja kaxtnoꞌo rin nuu ron ndee vitna,

nagua ja kukanu ini ron Jitoꞌo.

20 Te yaꞌa ni tee rin nuu ron oko uxi tnoꞌo jaꞌvi

ja kaꞌan tnoꞌo ja xteku ña vi tnoꞌo ja jinkuiꞌnu ndaa ini ron,

21 nagua ja kaxtnoꞌo ja kuni ron tnoꞌo ndaa,

saa te kuni ndaa ron na tnoꞌo kaꞌan ron nuu ndajiokuiin ron nuu ñayiu ni ka tetniuu ña jin ron.

22 Ma suꞌu ron ñayiu kundaꞌu, chi kundaꞌui,

ni ma xndaꞌu ron ñayiu tnaꞌa tnundoꞌo nuu kiꞌin nuu tee netniuu ja kundaa kuechi.

23 Chi maa Jitoꞌo kaꞌan niꞌnu ja jaꞌa ñayiu yun

te ndakindee ya ja jichi ja kanda ñayiu ka suꞌu ña yun.

24 Ma kondeka tnaꞌa ron jin ñayiu inu yachi ini,

ni ma vi nitnaꞌa ron jin ñayiu ka kiti ini.

25 Kana saa kutuaꞌa ron nagua ka saꞌi,

te tnaa ron xeyu sukun ron.

26 Ma kiunduu ron nuu tniuu inka ñayiu,

ni ma tau nuu ron xuꞌun ja kondita inka ñayiu.

27 Chi nuu tu nagua nevaꞌa ron ja tniuyaꞌu ron,

te vi kindee ndee jito nuu kixin ron.

28 Ma ndasama ron montoo yuu janaꞌa nuu ka ñutnaꞌa ron

ja ni ka jani ndi tata velu ron.

29 Tee satniuu guaguaꞌa, chi nuu rey kokunukuechi de,

te ma kokunukuechi de nuu ñayiu nuu ka.