1 Te nuu ka jinkoo ron nuu mesa ja vi kaa ron xtaa jin in tee kuu kaꞌnu,

te koto guaꞌa ron maa ron na in nukoo nuu ron.

2 Te visi kaꞌan ndevaꞌa ron ja kaa ron,

su kaꞌnu niꞌnu maa ron.

3 Ma kojioꞌo ron ndei de,

chi in ndei nani ja xndaꞌu ña kuu.

4 Ma nduku ndee ndevaꞌa ron ja kuu kuika ron,

kaꞌnde ini, ma kondiꞌni ron jin yun.

5 Nuu ja na kondiaꞌa guaꞌa ron, te kuni ron ja tu na jakuika oo,

chi vi sanaa ni, te nukoo ndijin, te ndagua ichi andivi na kuinio yaꞌa naꞌnu.

6 Ma jinkoo ron nuu mesa in tee xii ndevaꞌa ja kaa ron xtaa jin de,

ni ma kojioꞌo ron ndei asin ja nevaꞌa de.

7 Chi nagua ndakani ini de jin anu de, te saa oo de,

te kachi de: “Kaa vi koꞌo ron”,

su masu ndija de ja kaꞌan de jin anu de.

8 Chi ndandujan ron sava ja ni jaa ron,

te ni tu nagua ni jiniuꞌu tnoꞌo luu ja ni kaꞌan ron nuu de.

9 Ma kokaꞌan ron nuu ñayiu vasa,

chi skexikoi tnoꞌo ndichi ja kaꞌan ron.

10 Ma ndasama ron montoo yuu janaꞌa nuu ka ñutnaꞌa ron,

te ma yaꞌa ka ron nuu ñundeꞌi suchi ka kuu laꞌu.

11 Chi in ia ndakui kuu ia kaꞌan niꞌnu ja jaꞌi,

te maa ya kuu ia ndakoo siki ron ja jaꞌa suchi ka kuu laꞌu yun.

12 Tavaꞌa nuu anu ron tnoꞌo ja xteku ña jin ron,

te konini tnoꞌo ndichi.

13 Ma yaꞌa ini ron ja ndakanu ichi ndaa ron in suchi kueli,

chi nuu ja na kani ron jin ndesaa xnuu xii, te ma kui.

14 Chi nuu ja na kani ron jin,

te skaku niꞌnu ron jin ja ma kiꞌin nuu andeya.

15 Nuu na kenta ron ja kuu ndichi ron, vi seꞌe,

te suni ruꞌun, chi kokuu sii ini rin.

16 Te kokuu sii ini ndee ini ndee anu rin,

nuu konini rin ja kaꞌan ron tnoꞌo ndaa.

17 Ma kokuu kuasun ini ron jin ñayiu ka saꞌa yika kuechi,

chi saa suaꞌa siun ni koyuꞌu niꞌnu ron Jitoꞌo.

18 Chi jandaa ja saa te skundiꞌi guaꞌa ron,

te ma naa ndoñuꞌu ja ndetu kaꞌnu ron.

19 Konini tnoꞌo kaꞌan rin, vi seꞌe, te kokuu ron suchi ndichi,

te tanuu ni ini ja kaka ron ichi guaꞌa.

20 Ma nitnaꞌa ron jin ñayiu ka jiꞌi ndevaꞌa texeen,

ni ñayiu ka jaa ndeꞌe ndevaꞌa kuñu.

21 Chi ñayiu jiꞌi vi ñayiu jaa ndeꞌe ndevaꞌa xnai ja nevaꞌi, te kokuu ndaꞌui,

chi kokusuin, te kuiꞌnui saꞌun teꞌnde.

22 Konini tnoꞌo kaꞌan tata ron, tee ni saꞌa ña jin ron,

te ma skexiko ron nana ron nuu kuu nijaꞌnu ña.

23 Kiꞌin tnoꞌo ndaa vi tnoꞌo ndichi vi tnoꞌo ja xteku ña,

vi tnoꞌo ja jinkuiꞌnu ini, te ma ndaxiko ron.

24 Kusii ini ndevaꞌa tata suchi saꞌa ndaa,

te na in nevaꞌa seꞌe ndichi, te kusii ini de jin.

25 Na kokuu sii ini tata ron vi nana ron,

te na kokuu sii ini ñaꞌa ni skaku ni skivi ña jin ron.

26 Tanuu guaꞌa tnoꞌo kaꞌan rin, vi seꞌe,

te kondiaꞌa guaꞌa nuu ichi jika rin.

27 Chi na kuinio yau kunu ndevaꞌa kuu ñaꞌa xiko maa,

te na kuinio poso tundi kuu ñasiꞌi inka teyii.

28 Te ndiaꞌa yuꞌu ña ña, na kuinio in kuiꞌna,

te saꞌa ña ja kaya kuaꞌa tee ka skindee ñasiꞌi.

29 ¿Te ndee ñayiu ndaꞌi kana? ¿Ndee ñayiu kusuchi ini? ¿Ndee ñayiu ka tee tnaꞌa?

¿Ndee ñayiu kaꞌan kuechi? ¿Ndee ñayiu tu nagua saꞌi, te ni tuji?

¿Ndee ñayiu ni nduu kuakuaꞌa nduchi nui?

30 Ñayiu yun kuu ñayiu tu xndendoo ja jiꞌi vinu,

te kuaꞌin jito tnuni kai vinu jaa.

31 Ma kondiaꞌa ron ja vivii ndukuaꞌa vinu

ni nuu yeyeꞌe ñuꞌu nuu vasu,

te ni nuu vita vita jiꞌi ñayiu.

32 Chi sandiꞌi, te kaa ña na kuinio koo,

te jatu kiundoꞌo ña na kuinio texeen ti.

33 Chi saꞌa ja nani guaa kuu ja skuni ña,

te anu ron kana tnoꞌo neꞌe tnoꞌo yichi.

34 Chi kuni ron ja na tnoꞌo ja katuu ron nuu ndute mar,

axi na tnoꞌo katuu ron xtuu in yutnu sukun ja skanda ña tachi.

35 Te kachi ron: “Ni ka xtuji ña, su tu jatu,

ni ka kani ña, su tu ni jini rin,

te nuu na ndoto rin, te kiꞌin rin jinduku rin inka vasu

ja nduvaꞌa anu rin”, kachi ron.