31
Tnoꞌo jaꞌvi ni kaꞌan rey Lemuel
1 Yaꞌa kuu tnoꞌo jaꞌvi ni kaꞌan rey Lemuel, tnoꞌo ni jiñaꞌa ia Dios ja ni kaxtnoꞌo nana de nuu de.
2 ¿Nagua ndoꞌo ron, vi seꞌe?
¿Nagua ndoꞌo ron, vi seꞌe, ni ñuꞌu chii rin?
¿Nagua ndoꞌo ron, vi seꞌe, ni jikan rin nuu ia Dios?
3 Ma xnaa ron jandakui ron jin ñasiꞌi,
ni ma kaka ron ichi ka jika ñaꞌa ka skunaa ña jin rey.
4 Masu vatuka kuu, vi Lemuel, ja vi kokoꞌo rey vinu,
ni ja vi kokoꞌo tee ka tatnuni texeen.
5 Chi kana saa nuu ka jiꞌi de, te vi ndunaa ini de naxa tatnuni ley ñuu de,
te vi saꞌa kueꞌe de jin ñayiu ka tnaꞌa tnundoꞌo.
6 Vi kuñaꞌa texeen na vi koꞌo ñayiu ja yatni ja vi kuu,
vi vinu na vi koꞌo ñayiu ka kusuchi ini.
7 Na vi koꞌi, te na vi ndunaa ini ja ka kundaꞌui,
te ma vi konaꞌa kai ja ka tnaꞌi tnundoꞌo.
8 Kaꞌan jaa, ja jaꞌa ñayiu ña kuu vi kaꞌan ja jaꞌa mai,
te kaꞌan niꞌnu ja jaꞌa ñayiu tu na in chituu ña.
9 Te kaꞌan jaa, vi saꞌa ndaa ja jaꞌa ñayiu yun,
vi kaꞌan niꞌnu ja jaꞌa ñayiu ka kuu ndaꞌu vi ñayiu tu nagua ka nevaꞌa.
Tnoꞌo yiñuꞌu nuu in ñasiꞌi guaꞌa ndevaꞌa
10 ¿Na in ni niꞌi in ñasiꞌi guaꞌa ndevaꞌa?
Te yaꞌu ndevaꞌa ndee ña saa yuu vii ndevaꞌa.
11 Te yii ña, chi kukanu ini ña de jin ña,
te tu nagua jaꞌni ña jin de, chi ndiꞌi ni niꞌi ña.
12 Te jiñaꞌa ña javaꞌa nuu de, masu jakueꞌe,
ndiꞌi ni kiuu ja teku ña.
13 Te kee ña kuaꞌan ña nduku ña ixi ndikachi vi yuaꞌa ja kee yuku nani lino,
te sii ini ndevaꞌa satniuu ña jin ndaꞌa ña.
14 Kuu ña na kuinio in barco ja jika xiko,
chi ndee ñuu jika vaji jin ja kokaa.
15 Te neꞌe ndevaꞌa ndakoo ña,
te jiñaꞌa ña ja ka jaa ñayiu veꞌe ña,
vi jiñaꞌa ña na tniuu vi saꞌa in in suchi siꞌi ka jinokuechi nuu ña.
16 Ndachikuaꞌa guaguaꞌa ña nasaa ndee in ñundeꞌi,
te ndakuaan ña,
te jin xuꞌun ja niꞌi ña, te ndaxtee ña tnu uva.
17 Ndakuꞌni tnutnuu ña chii ña,
te vi ni ini ni anu ña satniuu ña.
18 Jini ña ja niꞌi guaꞌa ña xuꞌun jin tniuu saꞌa ña,
te ni tu ndaꞌva ña lámpara ña jakuaa ja satniuu ña.
19 Jin in ndaꞌa ña skuiko ña tnu kate,
te jin inka ndaꞌa ña kagua ña yuaꞌa.
20 Jiñaꞌa ña nagua ka jiniuꞌu ñayiu ka kundaꞌu,
vi chituu ña ñayiu tu nagua ka nevaꞌa.
21 Tu yuꞌu ña jin ñayiu veꞌe ña nuu kuun tiꞌiñu,
chi ndiꞌi ñayiu veꞌe ña ka yoso tnaꞌa saꞌun ka niꞌnu.
22 Chi maa ña kiku saꞌun kaa nuu jito kixin ña,
vi niꞌnu ña saꞌun vii ndevaꞌa ja kuu lino,
vi saꞌun kuaꞌa nditnuu ja luu ndevaꞌa kaa.
23 Ndiꞌi ñayiu ka nee yiñuꞌu nuu yii ña,
te oo de neꞌu tee ka kuu nijaꞌnu nuu ñuu.
24 Kiku ña saꞌun vii ndevaꞌa ja kuu lino,
vi saꞌa ña sinchu,
te xiko ña nuu ñayiu ka jaan vi ka ndaxiko saꞌun.
25 Nukuntuu maa ña jin tniuu ndaa ja saꞌa ña vi jandakui ña,
te tu ndiꞌni ña nagua kokuu kiuu vaji.
26 Kaꞌan ña tnoꞌo ndichi,
te kaꞌan luu ña jin ñayiu nuu kaxtnoꞌo ña nui.
27 Ndiaꞌa guaguaꞌa ña naxa ka saꞌa ñayiu veꞌe ña,
te satniuu ña, masu kuꞌndu kuu ña.
28 Ka ndakoo seꞌe ña, te ka jiñaꞌi: “Na taꞌu na ndetu ni, vi nana”;
te suni yii ña, chi kaꞌan yiñuꞌu de jin ña, te jiñaꞌa de:
29 “Ka oo kuakuaꞌa ñasiꞌi ja ni ka saꞌa guaꞌa ña,
su guaꞌa ndevaꞌa ka ni saꞌa maa ron saa ndiꞌi ñaꞌa yun”.
Jiñaꞌa de.
30 Xndaꞌu ndevaꞌa ña jaguaꞌa ka naꞌa ñasiꞌi, vi tu jiniuꞌu ja luu ka ndaa ña,
su ñasiꞌi ja yuꞌu niꞌnu Jitoꞌo, chi guaꞌa kuu ja koo jayiñuꞌu nuu ña.
31 Te vi saꞌa kaꞌnu ni ña nuu ñayiu ñuu ni,
te jin ndiꞌi tniuu ni saꞌa ña, vi konee yiñuꞌu ni nuu ña.