41
Ni kee yuꞌu ia Dios ja skaku niꞌnu ya ñayiu Israel
Vi kasi yuꞌu ron ja ka oo ron ndee ñuu jika, te vi konini tnoꞌo kaꞌan rin:
Vi nukuꞌun ndee ini ron ja ka oo ron ñuu naꞌnu,
neꞌekuei na vi ndatnoꞌo,
te vi ndututu, na sandaa rin kuechi.
¿Na in ni saꞌa ja vaji tee ja siun ni kundee de ichi nuu kana nikandii?
Te nuu ndaꞌa maa de ni xndendoo rin ñayiu taka ñuu,
te kundee de tatnuni de nuu tee ka kuu rey,
te jin yuchi kani skueli ña de,
te jin kuji de katenuu ña de na kuinio ndaꞌa yuku.
Te sondikin ña de, te vini tu na in saꞌa tneñu ichi kuaꞌan de,
te vi viviꞌi ni kunjino siꞌin de nuu ichi kuaꞌan de.
¿Te na in saꞌa ndiꞌi tniuu yaꞌa?
¿Na in ni ndakana ñayiu ndee jaxtnañuꞌu ja vi kotekui?
Maa rin ja kuu rin Jitoꞌo, ja oo rin ndee jaxtnañuꞌu,
te suni koo rin jin ñayiu vi koo sandiꞌi ni ka, kuu ia ni saꞌa yaꞌa.
Ni ka jini ñayiu ka oo jika, guaa ndee yuꞌu ndute mar, te ni ka yuꞌi,
te vi ni ka kisi ñayiu ka oo ndee jaꞌa ñuyiu ja ni ka yuꞌi,
te ja ni ka ndututui ja mandikuei.
Te ka chituu tnaꞌa in in de jin ndisa ka satniuu de,
te ka jiñaꞌa de nuu tnaꞌa kuikin de: “Koo yutnu ni”.
Chi tee kani kaa ndakuñaꞌa de tnoꞌo ndee ini nuu tee xtute kaa kuu plata,
te tee ndasandii kaa yun jin martiyu jiñaꞌa de nuu tee kindee yuchi kaa yun
ja oo guaꞌa nuu ni ka ndatee tnaꞌa de kaa yun,
te kani de nduyu kaa chuꞌchi ja saꞌa kutu guaꞌa de
nagua ja ma kokanda.
 
Su roon, ñayiu Israel, chi ñayiu ka jinokuechi nuu maa rin ka kuu ron,
chi maa rin ni kaji ña, ja suni ka kuu ron ñayiu tatatnoꞌo Jacob,
ja ka kuu ron ndikin tata Abraham, tee ni ondeka tnaꞌa guaꞌa jin rin.
Chi ni ndeneꞌe ña rin ndee jaꞌa ñuyiu,
te ni ndakana ña rin ndee jika ka,
te kachi rin: “Maa ron ka kuu ñayiu ka jinokuechi nuu rin”.
Maa rin ni kaji ña, te tu ni skexiko ña rin jin ron.
10 Te ma vi koyuꞌu ron, chi oo maa rin jin ron,
ni ma vi kuita ron, chi maa rin kuu ia Dios ron,
te ndataa rin jandakui ron, vi chituu ña rin,
te kotnii guaꞌa ña rin jin ndaꞌa kuaꞌa rin,
ja kundee kunijaꞌnu rin.
11 Te ndiꞌi ñayiu ka kiti ini nuu ron
saꞌa rin ja vi ndukanoi, te vi kendoo ndaꞌui.
Te ñayiu ka ndakoo siki ron,
chi saꞌa rin ja vi masu nagua ka kuu saꞌuin, te vi nai.
12 Te visi na vi ndanduku ron ñayiu ka kaꞌan uꞌu ña jin ron,
su ma vi nukuꞌun ron jin.
Te ñayiu ka ndakoo siki ron ja ka jaxin tnaꞌa jin ron,
tu saꞌun ka nagua vi kokui nani kuinio ja tu ka na in ka oo.
13 Chi maa rin kuu Jitoꞌo, ia kuu Dios ron,
ja tnii guaꞌa rin ndaꞌa kuaꞌa ron,
te kachi rin: “Ma vi koyuꞌu ron, chi chindee chituu ña maa rin”.
 
14 ’Ma vi koyuꞌu ron ñayiu Israel ja suni ka kuu ron ñayiu tatatnoꞌo Jacob,
ja ka kuu ron na kuinio tindaku kueli,
chi chituu ña maa rin, kachi Jitoꞌo,
chi skaku niꞌnu ña maa rin ja kuu rin ia ii ñayiu Israel.
15 Chi saꞌa rin ja vi kokuu ron na kuinio in arkia jaa ja ka oo ndugua nuu,
te skanta ron yuku sukun, te saꞌa yuchi ron,
te skanta ron tinduu, te saꞌa kueli ron na kuinio ndaꞌa yuku.
16 Te skunta ron, te kuiso ña tachi kiꞌin,
te katenuu ndiꞌi ña tikacha.
Su maa ron, chi vi kokuu sii ini ron jin rin ja kuu rin Jitoꞌo.
Te vi chiñuꞌu ña ron ja kuu rin ia Dios ñayiu Israel.
 
17 Te ñayiu ka kundaꞌu ja tu nagua ka nevaꞌi,
ka ndukui ndute, te tu ka niꞌi,
te vi ka yichi yaa yuꞌi jin soko ndute.
Su vi kokaꞌin nuu maa rin ja kuu rin Jitoꞌo,
te konini rin tnoꞌo ka kaꞌin,
chi maa rin kuu ia Dios ñayiu Israel, te ma xndendoo ndaꞌu rin jin.
18 Chi saꞌa rin ja junkoo in yute ndee in tinduu teꞌa
vi na kana in nuu ndute maꞌñu in chikoꞌi,
vi saꞌa rin ja ñuꞌu teꞌa na kokuu nuu junkuꞌun ndute,
te ñuꞌu yichi na kokuu nuu kana ndute.
19 Te nuu ñuꞌu teꞌa, xtee rin tnu itni vi tnu acacia
vi tnu arrayan vi tnu olivo,
te nuu ñuꞌu yichi xtee rin tnuyuja vi tnuciprés vi tnuboje,
20 nagua ja na vi kuni ndiꞌi ñayiu nuu vi kondiaꞌi,
te na vi skuaꞌa guaꞌi, te vi jinkuiꞌnu ini
ja maa rin kuu Jitoꞌo, ja saꞌa rin ndiꞌi yaꞌa,
maa rin kuu ia Dios ñayiu Israel ja ni jani ini yaꞌa.
Kaꞌnu ka kuu ia Dios saa chuꞌchi
21 Te jiñaꞌa Jitoꞌo:
“Neꞌekuei ron ka kuu ron chuꞌchi,
te vi kaꞌan nagua ka kuini ron,
vi kaꞌan niꞌnu ja jaꞌa ron”, jiñaꞌa ia Dios ja kuu ya rey Jacob.
22 “Neꞌekuei te vi kaꞌan nagua kokuu nuu kuee ka
vi naxa ni kuu ndee janaꞌa,
nagua ja na ndachikuaꞌa rin, te na kuni rin naxa kaa ja kokuu,
te vi kaxtnoꞌo nagua kokuu kiuu vaji yaꞌa.
23 Vi kaꞌan nagua kokuu nuu kuee ka,
nagua ja na kuni rin ja dios ka kuu ron.
Vi saꞌa visi joo javaꞌa axi jakueꞌe,
nagua ja na kuni rin, te na koyuꞌu ndevaꞌa ña rin.
24 Su roon, chi masu nagua ka kuu saꞌun ron,
te ni ma kuu nagua vi saꞌa saꞌun ron.
Te ja tneꞌe ndevaꞌa ka kuu ñayiu ka kaji ña jin ron
ja kokuu ron chuꞌchi mai.
 
25 ’Ndee ichi norte ni kana rin in tee,
te kii de ichi nuu jinonta nikandii,
te ndakakuneꞌe ña de jin rin,
te kuain niꞌnu de tee ka tatnuni na kuinio ndeꞌi,
nagua saꞌa tee saꞌa ndatniuu ñuꞌu ja xtiꞌi de ñuꞌu jin siꞌin de.
26 ¿Te na in ni ndakani yaꞌa ndee jaxtnañuꞌu ja kii de,
nagua ja vi kunio,
axi na in ja ni kaꞌan ndee janaꞌa nagua ja kuu vi kachio:
Ndija ron tnoꞌo ni kaꞌan ron?
Su tu na in ni kaꞌan, ni tu na in ni ndakani,
te jandaa ndija ja tu na in ñayiu ni onini,
chi ni in ron, tu na in ni kaꞌan.
27 Chi maa rin kuu jaxtnañuꞌu ja ni kaxtnoꞌo tnoꞌo sii ini nuu ñayiu Sión,
te maa rin ni tetniuu in tee ja ndakani de tnoꞌo vii tnoꞌo vaꞌa nuu ñayiu Jerusalén,
ja ja oo yatni ja vi ndajiokuiin ñayiu ñuu yun.
28 Te nuu ni ndiaꞌa rin, te ni in chuꞌchi yun tu na in oo,
chi tu na in oo neꞌu chuꞌchi yun ja kuu xteku ña jin rin,
te ni tu na in kaꞌan nuu jikan tnoꞌo rin.
29 Te ndiꞌi yun ka kuu ja tu jiniuꞌu,
te tu saꞌun nagua kuu vi saꞌa,
chi ninoꞌo ni chuꞌchi ja tu nagua jiniuꞌu ka kuu.”