1 Kutoo ndevaꞌa ña san jin ni, vi Jitoꞌo san,

chi maa ni taa jandakui san.

2 Maa ni, vi Jitoꞌo, kuu kava ja jito jini ña.

Maa ni kuu veꞌe kaꞌnu ja tavaꞌa ña.

Maa ni kuu ia skaku niꞌnu ña nuu tnundoꞌo.

Maa ni kuu ia Dios san.

Maa ni kuu kava ja tavaꞌa ña, te kukanu ini ña san jin ni.

Maa ni kuu kaa tikute ja jasi niꞌnu nuu oo san.

Maa ni kuu ia ndakui ja skaku niꞌnu ña.

Maa ni kuu in veꞌe sukun nuu tayuꞌu nuu san.

3 Ni ndakakuneꞌe san Jitoꞌo, chi kanuu ja saꞌa kaꞌnu san ya,

te ni skaku niꞌnu ña ya nuu ndaꞌa ñayiu ka kaꞌan uꞌu ña.

4 Ja ni ka jionduu ña jin san ja vi kaꞌni ña,

te ni yuꞌu san nuu ni jini san ja ka nduku ja vi xnaa ña jin san.

5 Te ja ni ka jionduu ña jin san ja vi tnaa ña ñuu jiꞌi,

te ja ni ka nduku ja vi skanakau ña jin san nuu yau ja kuu san.

6 Te jin maꞌñu sagua tnoꞌo suchi ini yun ni ndakakuneꞌe san Jitoꞌo,

te ni jikan san ja na chituu ña ia Dios.

Te ni onini ya tnoꞌo ni kaꞌan san ndee ini veñuꞌu ya,

chi ni kenta tnoꞌo ja kana ndaꞌu san ni onini ya.

7 Yun te vi ni niꞌi vi ni tnaa ñuyiu,

te ni ka kanda nii ndee jaꞌa yuku,

te vi nii ni kisi, chi ni kiti ini ia Dios.

8 Te ni kee ñuaꞌa xnii ya, te yuꞌu ya ni kee ñuꞌu ja teñuꞌu ña,

te ni skunta ya tikayi ñuꞌu ja kai koko koko.

9 Te ni ndakune ya andivi, te ni kuun ya siki in viko tnutnuu.

10 Te ni kaa ya yata in ia jinokuechi nuu ya ja oo ndijin, te ni ndagua ya.

Ni ndagua ya nuu yiꞌi tachi.

11 Te nuu viko tnutnuu yun ni tayuꞌu nuu ya, te xinxiin ya ni jasi ya

na kuinio in saꞌun in viko tnutnuu ja ndiso sau, in ja oo nenee.

12 Te vi yeꞌe tajan ndiaꞌa ya,

te nuu viko yun ni kuun ñiñi vi tikayi ñuꞌu ja kai koko koko.

13 Te ni kaꞌndi ndee andivi ni saꞌa Jitoꞌo,

te ni kana jaa ya ndee sukun yun,

te ni kuun ñiñi vi tikayi ñuꞌu ja kai koko koko.

14 Te ni skunta ya yutnu ndugua ya,

te ni jatenuu ña ya jin ja ka kaꞌan uꞌu ña jin ya,

te ni tetniuu ya kuaꞌa tajan, te ni kundee ya ni skunu ña ya.

15 Yun te nuu ni kaꞌan xeen ni, vi Jitoꞌo, vi ja ni tiutachi ni jin xnii ni,

te ni ka ndatuu ndijin ndee kaꞌa ndute mar vi ni ka ndatuu ndee jaꞌa ñuyiu.

16 Yun te ni skaa ia Dios ndaꞌa ya ndee sukun yun,

te ni tnii ya ndaꞌa san, te ni ndatau ña ya jin san nuu tnundoꞌo.

17 Te ni skaku niꞌnu ña ya nuu ndaꞌa tee inu ndakui ja ka kaꞌan uꞌu ña jin san,

vi nuu ñayiu ka skexiko ña jin san, chi ñayiu ndakui ka ni ka okui saa sein.

18 Chi ni ka ndakoi siki san kiuu ni tnaꞌa san tnundoꞌo,

su ni chindee ni chituu ña maa Jitoꞌo.

19 Te ni ndatau ña ya ja koo san in nuu nune jite,

ni skaku niꞌnu ña ya, chi junkuaan ini ña ya jin san.

20 Ni taa ia Dios in ja kutaꞌu kundetu san, chi saꞌa ndaa san.

Te ni tniuyaꞌu ña ya jin san, chi ni saꞌa vaꞌa san, te tu na jakueꞌe saꞌa san.

21 Chi jika san nuu ichi maa Jitoꞌo,

te tu na jakueꞌe saꞌa san, ni tu kujioo san nuu ia Dios.

22 Chi siun ni ñuꞌu ini guaꞌa san nuu ndiꞌi tnoꞌo kaxtnoꞌo ya,

te tu kujioo san nuu tnoꞌo tatnuni ya.

23 Kuu san ñayiu ndaa nuu ya, te tu na jakueꞌe saꞌa san.

24 Ni taa ia Dios in ja kutaꞌu kundetu san, chi saꞌa ndaa san.

Saꞌa vaꞌa san, te tu na jakueꞌe saꞌa san nuu ya.

25 Chi saꞌa ndaa ni jin ñayiu ka saꞌa ndaa nuu ni,

te tu xtavi kuechi ni ñayiu tu na kuechi.

26 Te xneꞌe ni maa ni ja ia vii kuu ni jin ñayiu vii,

te ndichi ini ni na tnundoꞌo tetniuu ni siki ñayiu kueꞌe.

27 Chi skaku niꞌnu maa ni ñayiu ka saꞌa ndaꞌu ka saꞌa kee,

su saꞌa ndaꞌu ni jin ñayiu ka saꞌa teyii mai.

28 Maa ni, vi Jitoꞌo san, guaa sieꞌe ni lámpara san.

Maa ni, guaa yeꞌe nuu ñunee jika san, vi Dios.

29 Maa ni, guaa chituu ña ni, vi Dios, te kundee san siki ñayiu ka jaxin tnaꞌa jin san,

te jin maa ni, vi Dios, te kuiso san muro ñayiu ka kaꞌan uꞌu ña jin san.

30 Te ichi ndaa kuu ichi ia Dios,

te ka kukanu inio tnoꞌo kaꞌan Jitoꞌo,

chi jito jini ya ndiꞌi ñayiu ka nutnaꞌa ña jin ya ja na tavaꞌa ña ya.

31 Chi maintnoꞌo maa Jitoꞌo kuu ia Dios,

te maintnoꞌo maa ya kuu kava ja jito jini ña ya.

32 Te maa ia Dios taa jandakui san,

te ndakanu ichi ndaa ña ya.

33 Te saꞌa ñama ya siꞌi san ja jino san na kuinio isu,

te saꞌa ya ja oo yutnu san ndee sukun, te ma kanakau san.

34 Te saꞌa ñama ya ndaꞌa san ja kaxin tnaꞌa san,

vi saꞌa yutnu ya ndaꞌa san nagua ja kakuiko guaꞌa san kuji san ja kuu bronce.

35 Te ndesi niꞌnu ni nuu oo san na kuinio in kaa tikute,

ja skaku niꞌnu ña ni, vi Dios, te jin ndaꞌa kuaꞌa ni tnii guaꞌa ña ni,

te vi ja vaꞌa ini ni, te ni chituu ña ni ja ni kee guaꞌa san.

36 Chi maa ni skaa ka siꞌin san ja jika ñama ka san,

te tu ndee kekaa san ja ndonso san.

37 Te ni sondikin san tee ka kaꞌan uꞌu ña jin san ndee ni jintnaꞌa san de,

te tu ni ndajiokuiin san guaa ndee ni xnaa ndiꞌi san jin de.

38 Te ni skuechi kueli san de nagua ja ma vi kundee ka de ja vi ndakoo de,

te ni ka ndonso de nuu jaꞌa san.

39 Chi ni taa maa ni jandakui san ja ni ka jaxin tnaꞌa san, vi Dios,

te ni saꞌa ni ja ni ka saꞌa ndaꞌu ka saꞌa kee tee ka ndakoo siki san.

40 Te ni saꞌa ni ja ni ka ndajiokuiin tee ka kaꞌan uꞌu ña jin san,

saa te ni xnaa san tee yun ja ka skexiko ña de jin san.

41 Ni ka kana de ja vi chituu ña jin de, su tu na in ni skaku niꞌnu ña.

Suni ni ka kana de nuu Jitoꞌo, su tu ni onini ya tnoꞌo ka kaꞌan de.

42 Te ni saꞌa yuchi san jin de, na kuinio ñuyaka ja xtechi tachi,

te ni skunta jika san jin de, na kuinio ndeꞌi nuu ichi.

43 Te ni skaku niꞌnu ña ni nuu ndaꞌa ñayiu ñuu san ja ka ndakoo siki san.

Te ni jani ña ni ja kotatnuni san nuu ñayiu ñuu naꞌnu,

te ka jinokuechi ñayiu nuu san ja tu ni ojini san.

44 Te nuu kaꞌan san, te ka jantnoꞌo ñayiu yun nuu san.

Te visi ñayiu inka ñuu ka kui, su ka yindei ka yititi nuu san.

45 Te ni ka kuita ñayiu inka ñuu, te vi suaꞌa ka niꞌi ja ka yuꞌi,

ni ndekuei veꞌe nuu ni ka tayuꞌu nui.

46 Na koteku Jitoꞌo nikaa nikiꞌin,

chi kaꞌnu kuu ia kuu na kuinio kava.

Kaꞌnu kuu Dios, ia ni skaku niꞌnu ña.

47 Chi maa ya kuu ia Dios ja ndaxtenaa ya ñayiu ni ka saꞌa ña jakueꞌe,

te saꞌa ya ja ka yindei ka yititi ñayiu yun nuu san.

48 Maa ia Dios skaku niꞌnu ña nuu ndaꞌa ñayiu ka kaꞌan uꞌu ña jin san,

te saꞌa kaꞌnu ña ya nuu ñayiu ka ndakoo siki san.

Te maa ya skaku niꞌnu ña nuu ndaꞌa tee inu xeen.

49 Te yun kuu ja saꞌa kaꞌnu ña san jin ni neꞌu ñayiu ñuu naꞌnu, vi Jitoꞌo,

te kata san yaa nuu ni.

50 Te saꞌa Jitoꞌo ja kundee san ja kuu san rey,

chi xneꞌe ya ja nikuii nikani kundaꞌu ini ña ya jin san

ja kuu san David, vi ndikin tata san.