1 Maa andivi xneꞌe ja vii yeꞌe tajan ia Dios,

te yeꞌe maa andivi kaxtnoꞌo ja ni saꞌa ya jin ndaꞌa ya.

2 Te in kiuu ndakani ja kaꞌnu ndevaꞌa kuu ia Dios nuu inka kiuu,

te in jakuaa kaxtnoꞌo tnoꞌo ndichi nuu inka jakuaa.

3 Visi tu na in kaꞌan, ni tu na in ndakani,

te ni tu na in nini,

4 su tnoꞌo kaxtnoꞌo andivi kenta ninii ñuyiu,

te vi ndee jaꞌa ñuyiu kenta tnoꞌo kaꞌan.

Te nuu andivi ni saꞌa ia Dios in veꞌe nikandii,

5 te kusii ini nikandii kee veꞌe yun, na kuinio in tee inka ni tnandaꞌa jaa,

te otuaꞌa ja kunu nuu ichi na kuinio in tee jino.

6 Te kee ndee in lado andivi, te jionduu kenta ndee inka lado andivi.

Te ni in, tu na in kuu kaku nuu ja iꞌni nikandii yun.

7 Te ley Jitoꞌo Dios kuu ley ndaa,

chi ndasaꞌa jaa ña jin ñayiu.

Te tnoꞌo tatnuni Jitoꞌo Dios kuu tnoꞌo kukanu inio,

chi saꞌa ndichi ña jin ñayiu saꞌa ndaꞌu mai.

8 Tnoꞌo ja xtaku Jitoꞌo Dios ka kuu tnoꞌo ndaa,

chi saꞌa ja kusii ini anu ñayiu.

Te tnoꞌo tatnuni Jitoꞌo Dios kuu tnoꞌo vii,

chi saꞌa ja yeꞌe nuu ñayiu.

9 Te ja yuꞌu niꞌnuo Jitoꞌo Dios kuu javii,

te oo nikuii nikani.

Te nuu sandaa Jitoꞌo Dios kuechi, te saꞌa ndaa ya,

chi ndiꞌi ja saꞌa ya oo ndaa.

10 Te tnoꞌo kaꞌan ya, chi junkuaan ka inio saa oro,

vi junkuaan ndevaꞌa ka inio saa kuakuaꞌa oro ni nduvii,

te vixin ka saa nduxi ñuñu, nduxi ja jati nuu maa jioo.

11 Te tnoꞌo tatnuni maa ni xteku ña jin san ja jinokuechi san nuu ni, vi Jitoꞌo,

te na ñayiu jantnoꞌo, te niꞌi in jakaꞌnu ja kutaꞌu kundetui nuu ni.

12 Su tu na in, te ndakuni jakueꞌe saꞌi,

su konekaꞌnu ini ni, vi Jitoꞌo, na jakueꞌe saꞌa san, te tu jini san.

13 Te suni kindee ni ja teyii san ja jinokuechi san nuu ni,

te ma kuandetu ni ja kokuu nijaꞌnu ja teyii yun nuu san,

te junkau san nuu jakueꞌe.

Chi saꞌa ni ja na kokuu san in teyii vii, ja tu na yika kuechi kotavi san.

14 Te na junkuaan ini ni tnoꞌo kaꞌan san vi ja ndakani ini san, vi Jitoꞌo san,

chi maa ni kuu in kava ja tavaꞌa guaꞌa ña,

vi ia ni ndatau ña nuu jakueꞌe.