22
Vi kana ndaꞌuo nuu ia Dios vi vi ndakuantaꞌuo nuu ya
Yaa ni tee David
Dios maa san, Dios maa san, ¿nau ja ni xndendoo maa in ña ni?
¿Nau ja ni kuu jika ni ja skaku niꞌnu ña ni,
te tu nini ka ni ja kana ndaꞌi san nuu ni?
Dios maa san, kana san nuu ni tnoꞌo nduu, te tu nini ni tnoꞌo kaꞌan san,
te kana san tnoꞌo jakuaa, te ni tu kuu ja ndatatu san.
 
Su maa ni, chi ia ii kuu ni,
te nukoo maa ni nuu tatnuni ni,
te ka jita ñayiu Israel nuu ni.
Te nuu maa ni, ni ka okukanu ini ndi nijaꞌnu san,
ni ka kukanu ini ñai, te ni skaku niꞌnu ni jin.
Ni ka kanai nuu ni, te ni skaku niꞌnu ni jin,
ni ka kukanu ini ñai jin ni,
te tu ni xndendoo kueꞌe ni jin.
 
Su sein, chi masu in teyii kuu san, chi kuu san na ni kuinio in tindaku,
ka saꞌa kuasun ña ñayiu vi ka skexiko ñai jin san.
Ndiꞌi ñayiu ka ndiaꞌa ña jin san, te ka jaku ndee ñai,
vi ka saꞌa xikoi yuꞌi nuu san vi ka skuiko xini, te ka kachi:
“Tee yaꞌa, chi kukanu ini de Jitoꞌo, tu na skaku ña Jitoꞌo jin de,
te ja siun jinkuaan ini ña ya jin de, te na skaku niꞌnu ña ya nuu saa”, ka kachi.
 
Su maa ni, ni saꞌa ja ni kaku san ndee chii siꞌi san,
vi maa ni ni saꞌa ja kukanu ini ña san ndee nuu ni ñundee ña nana san.
10 Te nuu ndaꞌa maa ni oo san ndee nuu kuini ka ja kaku san,
te ndee nuu inee ii ka san chii siꞌi san, ja kuu maa ni Dios san.
11 Ma kuu jika ni nuu san,
chi ja oo yatni ja tnaꞌa san tnoꞌo suchi ini,
te tu na in chindee chituu ña jin san, vi Dios.
 
12 Chi ni ka jionduu ña kuaꞌa tee ka kaꞌan uꞌu ña na kuinio isndiki,
na kuinio isndiki xeen ja ka oo ñuu Basán, saa ni ka chikorra ña de jin san.
13 Te ka june de yuꞌu de ja vi kaa ña de,
na kuinio ndikaꞌa xeen ja kokin ti,
te skuechi kueli ti ja kaa ti.
 
14 Te ndi joo ndi joo kuaꞌan san naa san, na kuinio ndute.
Te ndiꞌi yiki san ni yaꞌa ndoso tnaꞌa,
te anu san ni nduu na kuinio ñuma,
ja ni ndute maꞌñu jiti san.
15 Te ni yichi jandakui san na kuinio in tichioo,
te ni tnindee yaa san ini laꞌla san,
te ni siaa ña ni ja vi ja oo ni ka san
ja nduu san ñuyaka ja kuu san.
 
16 Chi ni ka jionduu ña in tnii tee kueꞌe jin san
ja ka kuu de na kuinio tiꞌina,
te ni ka kaan jioo de ndaꞌa san vi siꞌin san.
17 Te kuu kondiaꞌa san ndiꞌi yiki san,
su jin jakueꞌe ka ndakani ini tee yun,
te ka ndiaꞌa guaguaꞌa ña de jin san.
18 Te ni ka ndakaꞌnde de suaꞌa ni saꞌun san,
te ni ka jitotnuni de siki saꞌun san,
ndee de guaa kendoo jin.
 
19 Su maa ni, vi Jitoꞌo, ja taa ni jandakui san,
ma kuu jika ni nuu oo san.
Neꞌe ñama ni, te chindee chituu ña ni.
20 Skaku niꞌnu ña ni nuu yuchi kani tee ka kaꞌan uꞌu ña jin san,
te ma kuandetu ni ja vi kaꞌni ña tiꞌina yun jin san.
21 Skaku niꞌnu ña ni yuꞌu ndikaꞌa
vi skaku ña ni nuu ndiki isndiki yun.
 
22 Ndakani san ja ia kaꞌnu ndevaꞌa kuu ni nuu ñani san,
te maꞌñu sagua nuu ka ndututu san kata san yaa nuu ni, vi Dios.
23 Te maa ni ja ka yuꞌu niꞌnu ni Jitoꞌo, vi kata ni yaa nuu ya,
vi ndiꞌi maa ni, ndikin tata Jacob, vi saꞌa kaꞌnu ni ya,
ndiꞌi maa ni ja ka kuu ni ndikin tata Israel, vi chiñuꞌu ni ya.
24 Chi tu skexiko ya ni tu ni kukini ini ya tnundoꞌo tnaꞌa ñayiu ndaꞌu,
te tu tayuꞌu nuu ya, chi nini ya tnoꞌo kaꞌin nuu jikantaꞌui nuu ya.
 
25 Te maa ni taa yaa ja jita san nuu ni, vi Dios,
nuu ka ndututu kuaꞌa ndevaꞌa san,
te vi jin nuu ñayiu ka yuꞌu niꞌnu ña jin ni, skunkuu san tnoꞌo ni kee yuꞌu san.
26 Te maa ni ja ka kundaꞌu ni, vi kaa ni guaa ndee vi chitu chii ni,
te maa ni ja ka ndanduku ni Jitoꞌo Dios, vi saꞌa kaꞌnu ni ya,
te vi koo vii vi koo vaꞌa ni nikuii nikani.
 
27 Te ndiꞌi tuꞌu maa ni ja ka oo ndee jaꞌa ñuyiu, vi ndakaꞌan ni Jitoꞌo Dios,
te vi ndajiokuiin ni nuu ya.
Te ndiꞌi tatatnoꞌo vi ñayiu ñuu, na vi jinkuiin jiti nuu ni, vi Dios, ja vi chiñuꞌu ñai.
28 Chi maa Jitoꞌo Dios kuu rey,
te maa ya tatnuni nuu ñayiu nii ñuu.
 
29 Te ndiꞌi maa ni, ñayiu kuika ja ka oo ñuyiu yaꞌa,
vi kindei vi kititi ni, te vi chiñuꞌu ni ia Dios.
Te ndiꞌi ñayiu vi ja ka oi ja vi ndui ñuyaka,
chi ma kuu vi saꞌa mai ja vi kotekui.
30 Te vi kokunukuechi ndikin tata san nuu ya,
te vi kokaꞌin tnoꞌo ya guaa ndee nuu sava ka ndikin tatai ja kikuei nuu kuee ka.
31 Te vi ndakani ndee nuu ñayiu kuini ka ja vi kaku,
ja saꞌa ndaa ia Dios vi ndiꞌi tniuu ja ni saꞌa ya.