38
Vi ndakuatuo nuu ia Dios ja na chituu ña ya
Yaa ni tee David
1 Ma kuxeen ni nuu san jin jakiti ini ni, vi Jitoꞌo san,
te ni ma tetniuu ni tnundoꞌo siki san nuu kiti ini ndevaꞌa ni.
2 Chi ni tnaꞌa san jin yutnu ndugua ni,
te ni kanakau ndaꞌa ni siki san.
3 Te vi nii nuu yiki kuñu san kuꞌu ja jaꞌa ja kiti ini ni,
te vini ja in yiki san tu oo vaꞌa ja jaꞌa yika kuechi san.
4 Chi vi ja ni jinonta jakueꞌe saꞌa san ndee xini san,
na kuinio in javee ndevaꞌa ja ma kundee san kondiso san.
5 Te vi teꞌi san vi jaꞌan xiko kueꞌe san ja jaꞌa tniuu vasa ja ni saꞌa san.
6 Te vi suaꞌa ndatoso san ja jatu san, te vi makuita saꞌun san,
te ndiꞌi ni kiuu kusuchi ini san jika san.
7 Chi nii yata san jatu ja yiꞌi ndevaꞌa ña kiji,
te nii nuu yiki kuñu san kuꞌu.
8 Te vi makuita saꞌun san, te vi jechi kueli san,
vi suaꞌa kuu kitni anu san ja tnana ndaꞌu san.
9 Ja jini maa ni ndiꞌi nagua ndioo ini san, vi Jitoꞌo san,
te ja jini maa ni ja jaka ndaꞌu ini san.
10 Te vi suaꞌa ni ka kanta anu san, te makuita saꞌun san,
te vi ndee nduchi nuu san masaꞌu.
11 Te ni ka kuu jika ñayiu ka ndeka tnaꞌa guaꞌa jin san
vi ñayiu ka oo yatni jin san ja jaꞌa kueꞌe kuꞌu san,
te vi ndee ñayiu veꞌe maa san ni ka kuu jika nuu oo san.
12 Te ñayiu ka nduku ja vi kaꞌni ña, ka nduku ndevaꞌi naxa vi skanakau ñai,
te ñayiu ka kuini ja vi saꞌa ñai jakueꞌe, ka kaꞌin ja vi xnaa ñai,
te ndiꞌi ni kiuu ka kaꞌin tnoꞌo tnoꞌo siki san.
13 Su sein, chi saꞌa soꞌo san maa san, te tu nini san tnoꞌo ka kaꞌin,
te saꞌa san na kuinio ñiꞌi, te tu kaꞌan saꞌun san.
14 Te kuu san na kuinio in tee ja tu nini,
te ni tu kuu ja kaꞌan niꞌnu de ja jaꞌa de.
15 Chi ndetu kaꞌnu ña san jin maa ni, vi Jitoꞌo,
te maa ni, vi Jitoꞌo ja kuu ni ia Dios maa san, kaꞌan niꞌnu ni ja jaꞌa san.
16 Te ni kachi san: “Ma vi kokusii ini ñayiu ja jaꞌa san,
te ni ma vi kosaꞌa kaꞌnui mai nuu ja kekaa san, te kanakau san nuu tnundoꞌo”.
17 Su ja oo yatni ja kanakau san, chi ni ja tu junkuiin ka ja jatu san.
18 Te yun guaa naꞌma san jakueꞌe saꞌa san,
chi kusuchi ndevaꞌa ini san jin yika kuechi san.
19 Chi inu naꞌnu vi inu ndakui tee ka kaꞌan uꞌu ña jin san,
te ka kaya ñayiu ka skexiko ña jin san, visi masu nagua saꞌa san.
20 Te ja saꞌa san jaguaꞌa, te ka ndasaꞌa ñai jakueꞌe.
Te ja nduku ndee san ja saꞌa san jaguaꞌa, te ka ndakoi siki san.
21 Ma xndendoo ña ni, vi Jitoꞌo.
Ma kuu jika ni nuu oo san, vi Dios.
22 Neꞌe ñama ni, te chituu ña ni jin san, vi Jitoꞌo,
chi maa ni kuu ia skaku niꞌnu ña.