1 Ni kachi san jin maa san: “Nini oo nuu ka oo ñayiu kueꞌe yaꞌa,

te na koto mao naxa koo naxa kakao,

te ma kaꞌan kueꞌo ja saꞌo yika kuechi,

te na kasi yuꞌo”, ni kachi san.

2 Te ni jasi yuꞌu san, te tu ni kaꞌan saꞌun san,

te vini tnoꞌo vaꞌa, tu ni kaꞌan san,

su ni kusuchi ndevaꞌa ka ini san.

3 Te vi suaꞌa jatu anu san ja siun ndakani ini san,

te ni kusuchi ndevaꞌa ini san, te ni kachi san:

4 “Kaxtnoꞌo ni nuu san na kiuu kuu ja kuu san, vi Jitoꞌo,

vi nasaa ka kiuu kuu ja koteku san,

nagua ja kuni san ja masu naꞌa koteku san ñuyiu.

5 Chi joo ni kiuu ni taa ni ja koteku san,

te masu na ja vaviꞌi kuu ja teku san nuu ni.

Te ja ka teku ndiꞌi ñayiu kuu nani kuinio in ja jaka inio.

6 ’Chi jandaa ja nani kuinio in kuandaꞌu ka kuu ñayiu, chi nunuu ni ka tekui,

te jandaa ja tu jiniuꞌu ja ka ndioo ndevaꞌa ini ñayiu, te ka tatutui ja kuika ka nevaꞌi,

su tu ka jini na xiin ndaꞌa kendoo.

7 ’Nuu saa, ¿te nagua kuu ja ndetu san, vi Jitoꞌo san?

Maintnoꞌo maa ni, guaa ndetu kaꞌnu san.

8 Ndatau ña ni nuu ndiꞌi jakueꞌe saꞌa san,

te ma kuandetu ni ja vi kuaku ndee ña ñayiu vasa jin san.

9 Ni jasi yuꞌu san, te tu ni kaꞌan saꞌun san, chi saa saꞌa maa ni jin san.

10 Xtajioo ni tnundoꞌo ni tetniuu ni siki san,

chi kuaꞌan san mandiꞌi san jin tnundoꞌo ja ni tetniuu ni jin ndaꞌa ni.

11 Chi ja jaꞌa yika kuechi ñayiu kuu ja tetniuu ni tnundoꞌo ja ndakanu ndaa ni jin,

te na kuinio tikixin, saa xnaa ni jin ja ka kutoo ka ñayiu,

chi jandaa ja ndiꞌi ñayiu ka kuu nani kuinio in ja jaka inio.

12 ’Konini ni tnoꞌo ndakuatu san nuu ni, vi Jitoꞌo.

Konini ni joo ja kana ndaꞌu san nuu ni, te ma kondiaꞌa ña ni suaꞌa ni

ja ndaꞌi san jin tenuu san.

Chi kuu san na kuinio in ñayiu inka ñuu,

axi na kuinio in ñayiu jika ndaꞌu nuu ni,

nagua ni ka ojika ndaꞌu ndi tata velu san nuu ñuyiu.

13 Xndendoo ña ni, nagua ja na ndusii ini san,

ama ka ja kuu san, te naa san nuu ñuyiu yaꞌa.”