LIURU KUU UU
42
Salmos 42—72
Vi kondetu kaꞌnuo ia Dios
Yaa ka jita ndikin tata Coré
1 Na kuinio isu ja ndaꞌi ti, nduku ti in yute nuu koꞌo ti ndute,
saa kana ndaꞌu san ndanduku ña san jin ni, vi Dios.
2 Te yichi kokin san ja koo san jin ni, vi Dios, chi Dios teku kuu maa ni.
¿Te na kiuu saa kuu ja ndajiokuiin san ja koo san nuu ni, vi Dios?
3 Te tenuu san kuu na kuinio xtaa ja teku san,
te nduu vi ñuu ni ndaꞌi san.
Te ndiꞌi ni kiuu ka kachi ñayiu nuu san:
“¿Ndenu oo tu Dios ni?”
4 Nuu ndakaꞌan san yaꞌa, te vi kukueli san ja kusuchi ini san,
chi ndakaꞌan san naxa ni ka ojika san jin ñayiu kuaꞌa,
te ni ojaka san jin, ni ojaꞌankuei san ndee veꞌe maa ia Dios.
Te ni ka okana san ja ka kusii ini san vi ni ka ondakuantaꞌu san nuu ya,
te ni ka osaꞌa san in viko kaꞌnu kiuu yun.
5 ¿Te nau ja kokusuchi inio?
¿Nau ja kondiꞌni ndevaꞌo?
Te na kondetu kaꞌnuo ia Dios,
chi kuu ka ja saꞌa kaꞌnuo ya,
chi maa ya kuu ia Dios mao,
vi ia ja skaku niꞌnu ña jion.
6 Chi kusuchi ndevaꞌa ini san, vi Dios.
Yun kuu ja ndakaꞌan ña san jin ni ndee nuu ñuꞌu oo jioo yute Jordán
vi ndee nuu yuku Hermón vi ndee yuku lule Mizar.
7 Te in nduaꞌa kunu ndevaꞌa kana jin inka nduaꞌa
nuu jiso ja kuei niꞌnu ndute,
te ndiꞌi ola ja tetniuu ni, ni jiso siki san.
8 Su tnoꞌo nduu kundaꞌu ini ña Jitoꞌo Dios jin san,
te tnoꞌo jakuaa kokata san nuu ya.
Te kondakuatu san nuu Dios, ia taa ja teku san.
9 Te kuñaꞌa san nuu Dios, ia kuu kava ja in niꞌnu in sagua ja jaꞌa san:
“¿Nau ja ni ndunaa ini ña ni jin san?
¿Nau ja kokusuchi ini san,
te ndevaꞌa ndetnuni ni vi kosaꞌa ña ñayiu ka kaꞌan uꞌu ña jin san?”
10 Chi vi ndee yiki kaji san uꞌu,
nuu ka taa kanoo ña ñayiu ka kaꞌan uꞌu ña jin san,
nuu vi ndiꞌi kiuu ni ka kachi nuu san:
“¿Ndenu oo tu Dios ni?”
11 ¿Te nau ja kokusuchi inio?
¿Nau ja kondiꞌni ndevaꞌo?
Te na kondetu kaꞌnuo ia Dios,
chi kuu ka ja saꞌa kaꞌnuo ya,
chi maa ya kuu ia Dios mao,
vi ia ja skaku niꞌnu ña jion.