43
Vi ndakuatu kaꞌnuo nuu ia Dios* 43:0 Salmo yaꞌa, chi invaa ni kuu jin uu xiko uu nuu tutu janaꞌa.
Sandaa ni ja jaꞌa san, vi Dios,
te kuiin niꞌnu kuiin sagua ni ja jaꞌa san
nuu ñayiu ja tu ka kandija ña jin ni.
Skaku niꞌnu ña ni nuu ñayiu tnoꞌo vi ñayiu kueꞌe ndevaꞌa.
Chi maa ni kuu Dios san,
ia jito jini ña.
¿Te nau ja ni skexiko ña ni?
¿Nau ja kokusuchi ini san,
te ndevaꞌa ndetnuni ni vi kosaꞌa ña ñayiu ka kaꞌan uꞌu ña jin san?
 
Tetniuu ni tnoꞌo ndaa ni, vi ñuꞌu ni ja koyeꞌe nuu san,
nagua ja na kondeka ña jin san ja na ndenta san nuu yuku ii,
nuu oo maa ni, vi Dios.
Saa te kiuu san ndee nuu altar ni, vi Dios,
te yun kata san yaa nuu ni jin arpa.
Chi maa ni kuu ia Dios maa san, ja taa ni jasii ini ndevaꞌa san.
 
¿Te nau ja kokusuchi inio?
¿Nau ja kondiꞌni ndevaꞌo?
Te na kondetu kaꞌnuo ia Dios,
chi kuu ka ja saꞌa kaꞌnuo ya,
chi maa ya kuu ia Dios mao,
vi ia ja skaku niꞌnu ña jion.

*^ 43:0 Salmo yaꞌa, chi invaa ni kuu jin uu xiko uu nuu tutu janaꞌa.