1 Ka nini san jin soꞌo san, vi Dios, ja ka ndakani tata san

tniuu naꞌnu ni saꞌa ni kiuu ja ni ka oo de ndee tiempu ja ni yaꞌo yun.

2 Ka ndakani de ja jin jakaꞌnu maa ni, te ni skunu ni ñayiu ñuu yun,

te ni jiñaꞌa ni ñundeꞌi yun ja ni ka jinkoo ndi tata velu san,

te ni tetniuu ni tnundoꞌo siki ñayiu ñuu yun,

te ni saꞌa ni ja ni ka kaya ndi tata velu san.

3 Chi masu jin yuchi kani de, te ni ka niꞌi de ñundeꞌi yun,

te ni masu jin ndaꞌa de ni skaku niꞌnu ña,

chi jin jakaꞌnu maa ni vi jin jandakui ni vi jin ja yeꞌe tajan ni,

chi ni okutoo ni jin de.

4 Maa ni kuu rey san, vi maa ni kuu Dios san.

Saꞌa ni ja na vi kundee ndikin tata Jacob.

5 Chi jin maa ni, vi Dios, te vi kundee san nuu ñayiu ka kaꞌan uꞌu ña jin san,

te jin sivi ni, te vi kuain niꞌnu san ñayiu ka ndakoo siki san.

6 Chi tu kukanu ini san kuji san ni yuchi kani san

ja skaku niꞌnu ña jin san.

7 Chi maa ni skaku niꞌnu ña nuu ndaꞌa ñayiu ka kaꞌan uꞌu ña,

te jiñaꞌa ni ja kanoo nuu ñayiu ka skexiko ña jin san.

8 Te ndiꞌi ni kiuu vi kokuu teyii san jin ni, vi Dios,

te siun ni vi kondakuantaꞌu san nuu ni.

9 Su ni skexiko ña ni, te ni saꞌa ni ja ni ka kendoo kanoo san,

te tu jaꞌan ka ni jin soldado ñuu san.

10 Te ni saꞌa ni ja ni ka ndakaka yata san nuu ñayiu ka kaꞌan uꞌu ña jin san,

te ka suꞌu ñayiu ka skexiko ña jin san nagua ka nevaꞌa san.

11 Te ni ndasiaꞌa ña ni na kuinio ndikachi ja kuaꞌankuei ti nuu vi kuu ti,

te ni jatenuu ña ni neꞌu sava ka ñuu.

12 Te baratu ni xiko ni ñayiu ñuu ni,

te tu nagua ni niꞌi ni ja ni xiko ni jin.

13 Te ni saꞌa ni ja ka nani ka ndujin ña ñayiu ka oo yatni jin san,

vi ka jaku ndee ña vi ka saꞌa kuasun ña ñayiu ka oo nuu oo san.

14 Te ni saꞌa ni ja ka kani ñayiu ñuu naꞌnu kuentu san,

te ndiꞌi ñayiu ka skuiko xini nuu ka jini ñai jin san ja ka saꞌa kuasun ñai.

15 Te ndiꞌi ni kiuu tnaꞌa san jakanoo,

te vi suaꞌa ni ndukuaꞌa san ja kukanoo san,

16 nuu nini san ja ka nani ña vi ka kaneꞌe ña jin san

ja jaꞌa ñayiu ka kaꞌan uꞌu ña jin san

ja ka nduku de ja vi ndaxtenaa ña de jin sein.

17 Te visi ndiꞌi tnundoꞌo yaꞌa ka tnaꞌa san, su tu ka ndunaa ini ña san jin ni,

te ni tu ka jiso kava san tratu ni saꞌa ni.

18 Te ni tu ka ndatnaꞌnu ini san,

ni tu ka kujioo san nuu ichi ni.

19 Te visi ni saa, te ni tnaa ña ni ndee kava veꞌe nuu ka oo vaꞌu lobo,

te ni chisaꞌu ña ni jin janee ndevaꞌa ja na vi kuu san.

20 Axi nuu suaꞌa te ni ka ndunaa ini ña san jin ni, vi Dios,

te ni ka kaneꞌe san ndaꞌa san nuu inka chuꞌchi siin ja tu ka jini san ja ka chiñuꞌu san,

21 te kuni maa ni, vi Dios,

chi jini maa ni ndee nagua ndakani yuꞌu ini ñayiu jin anui.

22 Su ja jaꞌa maa ni, te ndiꞌi ni kiuu ka kuini ja vi kaꞌni ña jin san,

chi ka saꞌa ña jin san na kuinio ndikachi ja kuaꞌan ti nuu kuu ti.

23 Ndoto ni, vi Jitoꞌo san.

Ndakoo ni te ma xndendoo ndaꞌu ña ni nikuii nikani.

24 ¿Nau ja tayuꞌu nuu ni?

¿Nau ja ndunaa ini ña ni, te ka tnaꞌa ndevaꞌa san tnundoꞌo?

25 Te vi ndevaꞌa ndetnuni ka saꞌa ña, na kuinio ñuyaka,

te vi ndee nuu ñuꞌu ni ka kanduei san.

26 Ndakoo ni te chituu ña ni.

Skaku niꞌnu ña ni jin jandaꞌu ndevaꞌa ini ni, vi Dios.