1 Ndee anu san kana tnoꞌo guaꞌa ja kaꞌan san, te jita san nuu rey.

Te yaa san kuu na kuinio yutnu tee in tee ñama tee.

2 Maa ni kuu in tee luu ka naꞌa neꞌu seyii ñayiu, te kaꞌan ni tnoꞌo vii ndevaꞌa,

te yun guaa siun ni saꞌa vii saꞌa vaꞌa ña ia Dios.

3 Te ndachindee ni yuchi kani ni xiin chii ni, chi tee tu yuꞌu kuu ni,

te yun kuu ja saꞌa ja yeꞌe tajan ni vi oo jayiñuꞌu nuu ni.

4 Te ja yeꞌe tajan ni kuu nuu kuaꞌan ni kundee ni ja jaꞌa tnoꞌo ndaa,

te saꞌa ndaa ni ja jaꞌa ñayiu ka saꞌa ndaꞌu ka saꞌa kee mai.

Te jin ndaꞌa kuaꞌa ni saꞌa ni tniuu ioo ndevaꞌa.

5 Te vi mamaa anu ñayiu ka kaꞌan uꞌu ña jin ni, kiuu yutnu ndugua ni, vi rey,

te junkuei ñayiu ñuu naꞌnu nuu jaꞌa ni.

6 Chi nuu tatnuni maa ni, vi rey, oo nikuii nikani, na kuinio nuu tatnuni ia Dios,

te vara ja nee ni xneꞌe ja ndiso ni tniuu ja tatnuni ndaa ni.

7 Chi kutoo ni ja saꞌa ndaa ni, te skexiko ni jakueꞌe,

te yun guaa ni kaji ña ia Dios, ia kuu Dios maa ni,

te ni joso ña ya texeꞌen ja kokusii ini ka ni, saa sava ka ñayiu ka oo jin ni.

8 Te ndiꞌi saꞌun ni jaꞌan xiko asin jin tatna xiko ja kuu suja ugua vi yuku nani áloe vi canela.

Te ndee ini veꞌe tniuu ja ni ndukutu jin yuu vii ndevaꞌa nani marfil,

ka tee yaa nuu ni, ja na kokusii ini ni.

9 Te neꞌu ñasiꞌi ka kuu naꞌnu ja ka oo jin ni, ka oo sesiꞌi tee ka kuu rey,

te ichi kuaꞌa ni, nukoo reina ja niꞌnu ña saꞌun ni ndukutu jin oro vii ndevaꞌa.

10 Konini tnoꞌo kaꞌan rin, vi sesiꞌi, konini guaꞌa tnoꞌo kaꞌan rin.

Ndunaa ini ñayiu ñuu ron vi ñayiu veꞌe ron,

11 nagua ja na jioꞌo ña rey jin ron ja luu kaa ron,

te kindei kititi nuu de, chi maa de kuu jitoꞌo ron.

12 Te kikuei sesiꞌi ñayiu ñuu Tiro jin ja vi skutaꞌu ñai jin ron,

te vi kakan ñayiu kuika ñuu yun in jandiuxi nuu ron.

13 Te vi yeꞌe vi tajan sesiꞌi rey oi ini veꞌi,

niꞌnui in saꞌun ni ndukutu jin yuaꞌa kuu oro.

14 Te niꞌnui in saꞌun ni kiku vii ndevaꞌa kuaꞌin nuu oo rey,

te ka ndikin ña sava ka suchi siꞌi ndutu, ja mavijinsiaꞌa ñai nuu oo maa rey.

15 Te ndiꞌi kuaꞌankuei sii ini ndevaꞌa

ja makiukuei ini veꞌe tniuu nuu oo maa rey.

16 Te seꞌe ni, vi rey, vi kotatnuni nuu tniuu ndi tata velu ni,

te chitniuu ni jin ja na vi kotatnuni ndiꞌi ñuu.

17 Te saꞌa san ja vi siun ni vi kondakaꞌan ña jin ni,

te nikuii nikani vi kosaꞌa kaꞌnu ña ñayiu ñuu jin ni.