1 Dios kuu ia jito jini ña, vi taa ya jandakuio,

ia chituu ñama ña nuu ka tnaꞌo tnundoꞌo.

2 Te yun guaa ma vi koyuꞌo, visi na kisi ñuꞌu,

te na junkuei yuku ndee kaꞌa ndute mar.

3 Te visi na kana xeen ndute mar vi na kagua tnaꞌa xeen nuu de,

visi na kisi yuku ja xeen ndevaꞌa oo de, su ma vi koyuꞌo.

4 Te oo in yute ja jiñaꞌa jasii ini nuu ñayiu ñuu maa ia Dios,

te yaꞌa ndute yun nuu ii, nuu oo maa ia kaꞌnu ndevaꞌa.

5 Te oo maa ia Dios maꞌñu sagua ñuu yun,

te yituu guaꞌa ña maa ya,

vi chituu ña ya nuu tuu ndii ja ndakiꞌin inka kiuu.

6 Ni ka kuvaa ñayiu, vi ni ka kisi nuu ka tatnuni rey;

ni kana jaa ia Dios, te ni naa ñuyiu.

7 Te oo maa Jitoꞌo Dios jion, ia ndakui ndevaꞌa,

te maa ia tavaꞌa ña jion kuu ia Dios ndi Jacob.

8 Neꞌekuei ni te vi kondiaꞌa ni tniuu ni saꞌa Jitoꞌo,

ja siuꞌu ya ñayiu jin tnundoꞌo ja tetniuu ya ñuyiu.

9 Chi maa ya saꞌa ja tu ka jaxin tnaꞌa ka ñayiu nii guaa ndee jaꞌa ñuyiu.

Te maa ya jaꞌnu kuji vi skuechi ya lanza,

vi teñuꞌu ya carreta ñayiu ka jaxin tnaꞌa.

10 Te kachi ia Dios: “Vi koo titiꞌi,

te vi ndakuni ja maa rin kuu Dios,

chi kokuu kaꞌnu rin nuu ñayiu in in ñuu,

vi kokuu kaꞌnu rin nuu ñayiu ninii ñuyiu”.

11 Te oo maa Jitoꞌo, ia ndakui ndevaꞌa jion,

te maa ia tavaꞌa ña jion kuu ia Dios ndi Jacob.