1 Kaꞌnu kuu Jitoꞌo, te kanuu ja vi saꞌa kaꞌnuo ya

nuu ñuu maa ya nuu oo yuku ii ya.

2 Nase vivii sukun yuku Sión, te jiñaꞌa jasii ini nuu ndiꞌi ñayiu ñuyiu,

te ichi norte kuu ñuu maa ia kaꞌnu kuu rey.

3 Te ndee veꞌe tniuu maa ia Dios,

xneꞌe ya ja tavaꞌa guaꞌa ña ya jin ñayiu.

4 Chi ni ka kututu rey sava ka ñuu,

te tutu kuaꞌankuei de siki ñuu Jerusalén.

5 Su nuu ni ka jini de ñuu yun, te ni ka saꞌu kuii ini de,

te ni ka yuꞌu de, te ni ka jino yuꞌu de.

6 Te vi suaꞌa ka niꞌi de ja ka yuꞌu de,

te vi ka ndakuioo kuiti de ja ka jatu ndevaꞌa de, na kuinio in ñasiꞌi ja kaku lulu ña,

7 axi na kuinio tachi ja makana nuu ichi nuu kana nikandii

ja skuechi kueli barco naꞌnu ñuu Tarsis.

8 Te vi nagua ni ka onini san ja ni ka ndakani,

saa ni ka jini san jin nduchi nuu san nuu ñuu maa Jitoꞌo, ia ndakui ndevaꞌa,

chi jani yutnu maa ia Dios ñuu Jerusalén ja koo nikuii nikani.

9 Te ka ndakaꞌan san ja ndaꞌu ndevaꞌa ini ni, vi Dios,

nuu ka oo san ini veñuꞌu ni.

10 Te nagua kaꞌnu kuu ni, vi Dios, saa kenta ja ka saꞌa kaꞌnu ña ndiꞌi ñayiu ñuyiu,

te jin jakaꞌnu ni, jaꞌnde ndaa ni kuechi.

11 Te na vi kokusii ini ñayiu ka oo yuku Sión,

na vi kosii ini ñayiu ka oo ñuu ja tnii Judá,

ja siun saꞌa ndaa ni.

12 Vi kiondita maa ni yuku Sión, te vi kionduu ni nii nuu oo,

te vi kaꞌu ni nasaa torre nevaꞌa,

13 te vi kondiaꞌa guaguaꞌa ni muro ja ndesi ñuu yun vi veꞌe tniuu,

nagua ja vi ndakani ni nuu señani ni ja vajikuei nuu kuee ka.

14 Chi ia ni saꞌa ndiꞌi yaꞌa kuu ia Dios mao, ia oo nikuii nikani,

te kondeka konduu ña maa ya guaa ndee na vi kuo.