49
Ma kuu vi tniuyaꞌuo jin xuꞌon nuu ia Dios ja skaku niꞌnu ña ya
Yaa ni ka tee ndikin tata Coré
Vi konini maa ni ñayiu ndiꞌi ñuu tnoꞌo yaꞌa.
Vi konini guaꞌa ndiꞌi maa ni, ñayiu ñuyiu, tnoꞌo kaꞌan san.
A ka kuu ni ñayiu ndaꞌu axi ñayiu xtila,
a ñayiu kuika axi ñayiu ka kundaꞌu, ndiꞌi ni vi konini.
Chi kaꞌan san jin yuꞌu san tnoꞌo ndichi,
te kaꞌan san tnoꞌo ja jinkuiꞌnu ini san vi ndakani ini san jin anu san.
Te nduku ndee san ja kaꞌan san tnoꞌo jaꞌvi,
te vi nini skaxin san arpa, te kaxtnoꞌo san tnoꞌo skintnaꞌa san.
 
¿Te nau ja koyuꞌu san nuu kenta kiuu kueꞌe
vi nuu ka jionduu ña ñayiu ka kaꞌan uꞌu ña jin san ja vi saꞌa ñai jakueꞌe?
Chi ka kukanu ini ñayiu yun jin jakuika ka nevaꞌi,
vi ka kuu teyii jin kuaꞌa ja ka nevaꞌi.
Su tu na in ñayiu kuu skaku niꞌnui in ñani in tnaꞌi,
te ni ja tniuyaꞌui jin xuꞌin nuu ia Dios ja ndatau ñai.
Chi yaꞌu ndevaꞌa ndee anu in ñayiu,
te ma kundee xuꞌun ja ndatau ña,
nagua ja kotekui nikuii nikani,
te ma kuni saꞌuin ja teꞌi yiki kuñui.
10 Su ja ka jinio ja inuu ka jiꞌi ndiꞌi ni ñayiu.
Chi na ni ka jiꞌi ñayiu ndichi, te suni saa ni ka jiꞌi ñayiu vasa vi ñayiu tu jinkuiꞌnu ini,
te ka xndendoi jakuika ka nevaꞌi ndaꞌa inka ñayiu.
11 Te visi ka nevaꞌi ñundeꞌi nuu ka yoso sivi, su yau ñaña kuu veꞌe nuu siun ni vi koi,
te yun ni kokuu veꞌe nuu vi koi nikuii nikani.
12 Te visi nevaꞌa kuakuaꞌa ñayiu jakuika,
su ma kotekui nikuii nikani, chi inuu ni ka jiꞌi jin nagua ka jiꞌi kiti.
13 Saa ka naa ñayiu ka kukanu ini mai,
te suni saa ka naa ñayiu ka saꞌa teyii mai jin tnoꞌo ka kaꞌin.
 
14 Te ñayiu yun, chi ka kui na kuinio ndikachi,
te ja jaꞌni ña kuu na kuinio in tee jito ña, te jaka ña de ja kuaꞌankuei nuu yau ñaña.
Su nuu kenta tnoꞌo neꞌe, te vi kotatnuni ñayiu ndaa nui,
te nuu vi kui, te vi teꞌi yiki kuñui, te yau ñaña yun kokuu veꞌe nuu vi koi.
15 Su skaku niꞌnu ña maa ia Dios jin san nuu ndaꞌa yau ñaña,
te ndakuaka ña maa ya jin san.
 
16 Te ma saꞌu kuii ini ni nuu ja kuu kuika inka ñayiu,
te kaya javii nevaꞌi veꞌi.
17 Chi nuu kui, te ni in ja ma kondisoi kiꞌin jin,
te ni ma kiꞌin jin javii nevaꞌi nuu yau ñaña.
18 Te visi na kachi jin anui: “Na taꞌu na ndetuo ja ni kuu kuikao”, nini ja tekui,
te na vi saꞌa kaꞌnu ña ñayiu ja ni jinkoo vaꞌi,
19 su kentai ja kiꞌin vi ndanitnaꞌi jin ndi nijaꞌnui,
te ma kuni saꞌun kai ja yeꞌe nui.
20 Te ñayiu ni kuu kuika, chi tu jinkuiꞌnu ini,
te kuu inui jin kiti ja ka jiꞌi ti.