1 Kundaꞌu ini ña ni jin san, vi Dios. Kundaꞌu ini ña ni, chi kukanu ini ña san jin ni,

te nduku san ja koo vaꞌa san chii ndijin ni, guaa ndee na yaꞌa tnundoꞌo tnaꞌa san.

2 Te kana san nuu Dios, ia oo ndee sukun yun,

nuu ia ja kaꞌan ndaꞌu kaꞌan kee ña jin san.

3 Te ndee andivi chituu ña ya jin san, te skaku niꞌnu ña ya,

chi skunu ya tee ka sondikin ña jin san.

Te tetniuu ya jandaꞌu ini ya vi tnoꞌo ndaa ya.

4 Te oo san neꞌu ñayiu ka kuu na kuinio ndikaꞌa

vi kixin san neꞌu tee xeen ja ka koko de ñayiu.

Te noꞌo de ka kuu na kuinio yutnu ndugua,

te yaa de kuu na kuinio yuchi kani xeen xeen.

5 Kaꞌnu ndevaꞌa kuu maa ni ndee ichi siki andivi, vi Dios.

Te jayeꞌe tajan ni na kenta ninii nuu ñuyiu.

6 Ni ka saꞌa tuaꞌa tee ka kaꞌan uꞌu ña jin san

ja vi skanakau ña de nuu ichi jika san,

te vi ja ni jaꞌnde ja ni kuu ini san ja ma kaku san,

su maa de ni ka nanakau nuu yau ni ka jate de yun.

7 Oo yutnu anu san ja kata san yaa nuu ni, vi Dios,

te kata san jin ndiꞌi san jin anu san yaa nuu ni.

8 Ndoto, vi anu. Ndoto ron ja kuu ron xtnuu kaxin ja oo uxi tuchi, vi arpa,

te neꞌe ndevaꞌa na vi ndakoo.

9 Te saꞌa kaꞌnu ña san jin ni, neꞌu ñayiu ñuu ni, vi Jitoꞌo,

vi kata san yaa nuu ni neꞌu ñayiu ninii ñuyiu.

10 Chi kaꞌnu ndevaꞌa kuu jandaꞌu ini ni, ja vi kenta ndee andivi,

te kenta tnoꞌo ndaa ni ndee nuu viko.

11 Chi kaꞌnu ndevaꞌa kuu maa ni ndee ichi siki andivi, vi Dios,

te jayeꞌe tajan ni kenta ninii ñuyiu.