1 Te maa ni ja ka netniuu ni, ¿a ka kaꞌan ndaa ni?

¿A ka saꞌa ndaa ndija ni ja jaꞌa ñayiu ñuyiu?

2 Ñaꞌa, chi saa suaꞌa jakueꞌe ka ndakani ini anu ni ja vi saꞌa ni,

te saa suaꞌa ka june ni ichi ja vi ndevaꞌa ndetnuni ka satnaꞌa ñayiu ñuyiu.

3 Ñayiu kueꞌe, chi vi ndee chii siꞌi ni ka ndoñuꞌi nuu jakueꞌe,

te ñayiu tnoꞌo, chi vi ndee nuu ni ka kakui, ni ka kujioi nuu ia Dios.

4 Te inu xeen ndevaꞌi na kuinio texeen koo,

te ka kui na kuinio in koo xeen ndevaꞌa ja saꞌa soꞌo ti, chi jasi ti soꞌo ti,

5 nagua ja ma konini ti yaa ja tiuu lamu ti nuu ti,

te vini tee ja tiuu ñama ndevaꞌa yaa, tu nini ti.

6 Taꞌu ni noꞌo ñayiu xeen yun, vi Dios.

Taꞌu ni noꞌo yoso ñayiu ka kuu na kuinio ndikaꞌa yun.

7 Te na vi naa de na kuinio ndute ja jati nuu ñuꞌu,

te na vi tnaꞌnu yutnu ndugua de nuu ka nduku de ja vi tiuu de ñayiu.

8 Te na vi naa de na kuinio kiti ñuꞌu nuu yiki ja ndute maa ti nuu teyuꞌu ti,

axi na kuinio in lulu ja ni nui, te tu ni tnuu tu ni yeꞌe nui.

9 Te vini ma vi kuni, te ñama vi kai na kuinio tnu iñu,

te xnaa ña ia Dios jin ja kiti ini ya na kuinio yuku kuii, nuu kuun xeen sau tachi.

10 Te vi kusii ini ñayiu ndaa nuu vi kuni ja ndaxtenaa ña ia Dios jin ñayiu kueꞌe,

te vi kuchi siꞌin jin niñi ñayiu kueꞌe yun.

11 Yun te vi kachi ñayiu: “Jandaa ndija ja ka ndaniꞌi yaꞌu ñayiu ndaa.

Jandaa ndija ja oo in Dios ja saꞌa ndaa ndaa ya jin ñayiu ñuyiu.”