1 Skaku niꞌnu ña ni nuu ndaꞌa ñayiu ka kaꞌan uꞌu ña jin san, vi Dios.

Skaku ña ni nuu ndaꞌa ñayiu ka ndakoo siki san.

2 Skaku niꞌnu ña ni nuu ndaꞌa ñayiu ka saꞌa jakueꞌe,

vi skaku ña ni nuu ndaꞌa ñayiu ka jaꞌni ndiyi.

3 Chi ka neni yuꞌu ña tee inu ndakui jin san ja vi kaꞌni ña de,

te ka ndakoo de siki san, su tu na yika kuechi san, ni tu na jakueꞌe saꞌa san, vi Jitoꞌo san.

4 Te visi tu na in jakueꞌe saꞌa san, su ka nuu ka neꞌe ini de ka ndakoo de siki san.

Ndakoo ni, te neꞌe ni chituu ña ni, te kuni ni ja siaꞌa kaa ja ndoꞌo san.

5 Chi maa ni, vi Jitoꞌo, kuu ni ia Dios ndakui ndevaꞌa.

Maa ni kuu Dios ñayiu Israel.

Ndakoo ni te tetniuu ni tnundoꞌo siki ñayiu ndiꞌi ñuu,

te ma kundaꞌu ini ni ndiꞌi ñayiu ka saꞌa jakueꞌe ja ka ndakoo yuꞌu siki inka ñayiu.

6 Te ka ndajiokuiin ñayiu kueꞌe yun tnoꞌo jakuaa,

te ka kañu xein na kuinio tiꞌina, te ka jiondui nii ñuu.

7 Te vi suaꞌa ka jaa tiꞌiñu yuꞌi, te ka kaꞌin tnoꞌo xeen ndevaꞌa,

te ka kachi: “Tu na in nini tnoꞌo ka kaꞌon”.

8 Su maa ni, vi Jitoꞌo, chi kuaku ndee ni jin,

te saꞌa kuasun ni ñayiu ndiꞌi ñuu yun.

9 Chi maa ni kuu ia ndakui, te kondetu kaꞌnu ña san jin ni,

chi maa ni kuu ia Dios ja in niꞌnu in sagua ni ja jaꞌa san.

10 Te maa ni kuu ia Dios ja kundaꞌu ini ña ni jin san, te koxnoꞌo ni nuu san,

nagua ja saꞌa ni ja kuni san ja vi skunaa ñayiu ka kaꞌan uꞌu ña jin san.

11 Ma kaꞌni ni jin, nagua ja ma vi ndunaa ini ñayiu ñuu san ja ia kaꞌnu kuu ni.

Te jin jakaꞌnu maa ni, te katenuu ni jin.

Te nuneꞌe ni jin ja na vi saꞌa ndaꞌui mai, vi Jitoꞌo san,

chi maa ni jito jini ña jin san.

12 Chi jin ndiꞌi tnoꞌo ka kaꞌin ka saꞌi yika kuechi.

Te na vi tnaꞌa mai tnundoꞌo ja inu teyii vi ja ka xtau tniaꞌi ñayiu vi ja ka kaꞌan tnoꞌi.

13 Te xnaa ni jin ja kiti ini ni.

Xnaa ni jin, te ma vi koo kai,

nagua ja ndiꞌi ñayiu ninii ndee jaꞌa ñuyiu

na vi kuni ja maa ia Dios tatnuni nuu ndikin tata Jacob.

14 Chi ka ndajiokuiin ñayiu kueꞌe tnoꞌo jakuaa,

te ka kañu xein na kuinio tiꞌina, te ka jiondui nii ñuu.

15 Te ka jika nui ka ndukui ja vi kai,

te nuu tu ka niꞌi kuaꞌi, te vi suaꞌa ka kañu xein.

16 Su sein, chi kata san yaa nuu ni, vi Dios,

te ndee tnoꞌo neꞌe kata sii ini san nuu ni ja saꞌa kaꞌnu ña san.

Chi ndaꞌu ndevaꞌa ini ni, te ni tavaꞌa ña ni,

vi ni jito ni jini ña ni kiuu ni tnaꞌa san tnoꞌo suchi ini.

17 Te kata san yaa nuu ni, vi Dios, chi maa ni taa jandakui san, te jito jini ña ni,

chi maa ni kuu ia Dios ja kundaꞌu ini ña ni jin san.