1 Vi kata sii ini ni nuu ia Dios, ia taa ja ndakuio.

Vi kana sii ini ni ja ka saꞌa kaꞌnu ni ia Dios ñayiu ka kuu ndikin tata Jacob.

2 Vi kata ni yaa vi skaxin ni pandero,

te vi tee ni yutnu kaxin vi yutnu ndaꞌi.

3 Te vi tiuu ni ndikin kiuu ndayoso jaa yoo, vi kiuu ja nduu sagua yoo ja kuu llena,

vi kiuu ka saꞌo viko kaꞌnu.

4 Te yaꞌa kuu in ja kanuu ja vi saꞌa ñayiu Israel,

chi in tnoꞌo ja ni tatnuni ia Dios nuu ndikin tata Jacob kuu.

5 Te yaꞌa kuu ja ni tatnuni ya nuu ndikin tata José,

na ni ndakoo ya siki ñayiu Egipto.

Ni onini san in saꞌan ka kaꞌan ñayiu ja tu jinkuiꞌnu ini san.

6 Te kachi ia Dios: “Ni kindee rin in javee ja ni ka ondiso ron,

te ni ka ndoo uun ndaꞌa ron jin tniuu ndee ja ni ka osaꞌa ron.

7 Te nuu ni ka tnaꞌa ron tnoꞌo suchi ini, ni ka kana ron nuu rin,

te ni skaku niꞌnu ña rin, te ndee nuu viko tnutnuu yun oo rin,

te ni onini rin tnoꞌo ka kaꞌan ron, te ni jito tnuni ña rin nuu ñuꞌu ndute nuu nani Meriba.

8 ’Te maa ron ja ka kuu ron ñayiu ñuu rin, vi konini tnoꞌo ja na kaꞌan rin nuu ron,

vaa nuu suaꞌa te vi konini ron ñayiu Israel tnoꞌo kaꞌan rin.

9 Vaa ma vi konevaꞌa ron chuꞌchi ñayiu inka ñuu veꞌe ron,

ni ma vi junkuiin jiti ron nuu chuꞌchi ja tu ka jini ron.

10 Chi maa rin kuu Jitoꞌo Dios ron ja ni ndeneꞌe ña rin Egipto.

Vi kune yuꞌu ron, te na tnaa rin ja vi kaa ron, jiñaꞌa rin.

11 ’Su tu ni ka kuini ñayiu ñuu rin ja vi konini tnoꞌo ni kaꞌan rin,

te ni tu ni ka kuini ñayiu Israel ja vi kuantnoꞌo ñai.

12 Te yun kuu ja ni xndendoo rin jin, chi inu ndee ndevaꞌa ini anui,

te ni ka saꞌa mai nagua ka kuini.

13 Su nuu suaꞌa te ni ka onini ñayiu ñuu rin tnoꞌo ni kaꞌan rin nui,

te ni ka jika ñayiu Israel nuu ichi rin.

14 Nuu saa, chi vi nunuu suaꞌa ni, te xnaa rin ndiꞌi ñayiu ka kaꞌan uꞌu ña jin nuu siun,

te tetniuu rin tnundoꞌo vi tnaꞌa ñayiu ka ndakoo siki.

15 Te ñayiu ka skexiko ña jin rin ja kuu rin Jitoꞌo, vi kaꞌnu jiti nuu rin ja vi chiñuꞌu ñai nuu siun.

Su tuu, chi nikuii nikani vi kotnaꞌi tnundoꞌo.

16 Te nuu maa ñayiu ñuu rin, chi kokuñaꞌa rin triu guaꞌa ja vi kokai,

te kokuñaꞌa rin nduxi ja kee yika kava ja vi kokoꞌi vi ndee vi ndenuu ini nuu siun”,

kachi ia Dios.