1 Kuneꞌe xini ni joo, vi Jitoꞌo san, te konini ni tnoꞌo kaꞌan san,

chi kusuchi ndevaꞌa ini san vi tu saꞌun nagua nevaꞌa san.

2 Koto kuni ña ni jin san, chi tee ndaa kuu san nuu ni, vi Dios.

Skaku niꞌnu ña ni jin san, chi nuu maa ni jinokuechi san, te kukanu ini ña san jin ni.

3 Kundaꞌu ini ña ni jin san, vi Jitoꞌo san,

chi ndiꞌi ni kiuu jikantaꞌu san nuu ni.

4 Ndataa ni tnoꞌo sii ini nuu anu san ja kuu san tee jinokuechi nuu ni,

chi nuu maa ni ndakuatu san, vi Jitoꞌo san.

5 Chi ia guaꞌa kuu ni, vi Jitoꞌo san, te jakaꞌnu ini ni yika kuechi ñayiu,

te kundaꞌu ndevaꞌa ini ni jin ndiꞌi ñayiu ka ndakakuneꞌe ña jin ni.

6 Konini ni joo tnoꞌo ja ndakuatu san nuu ni, vi Jitoꞌo san,

te tanuu ni tnoꞌo ja jikantaꞌu san nuu ni.

7 Te kiuu ja tnaꞌa san tnoꞌo suchi ini, te kana ndaꞌu san nuu ni,

chi jini san ja konini ni tnoꞌo kaꞌan san.

8 Tu na in chuꞌchi ja kitnaꞌa inuu jin maa ni, vi Jitoꞌo,

te ni tu na in kuu saꞌa tniuu saꞌa maa ni, vi Dios.

9 Te ndiꞌi ñayiu ñuyiu ja ni saꞌa ni, kikuei nuu maa ni, vi Jitoꞌo san,

ja vi chiñuꞌu ñai, te vi saꞌa kaꞌnu ñai jin ni.

10 Chi ia kaꞌnu kuu ni, te saꞌa ni tniuu vii tniuu vaꞌa,

te maintnoꞌo maa ni kuu ia Dios.

11 Kaxtnoꞌo ni ichi ni nuu san, vi Jitoꞌo san, te na kaka san ichi ndaa ni.

Saꞌa ni ja ndee ini ndee anu san na koyuꞌu niꞌnu ña san jin ni.

12 Te na kosaꞌa kaꞌnu ña san jin ni, jin ndiꞌi san jin anu san, vi Jitoꞌo, ja kuu ni ia Dios san,

te nikuii nikani kochiñuꞌu ña san jin ni.

13 Chi kundaꞌu ndevaꞌa ini ña ni jin san,

te ni skaku niꞌnu ña ni ja tu ni kanakau san nuu ñuu jiꞌi.

14 Ni ka ndakoo ñayiu inu xeen siki san, vi Dios,

vi in tnii ñayiu ka jaꞌni ndiyi ka nduku ja vi kaꞌni ña jin san,

te ñayiu yun, chi tu ka nee yiñuꞌu saꞌuin nuu ni.

15 Su maa ni, vi Jitoꞌo, chi kuu ni ia Dios ndaꞌu ini vi kaꞌnu ndevaꞌa ini ni,

te kuekuee kiti ini ni vi kutoo ni ñayiu, te saꞌa ndaa ni.

16 Ndakaꞌan ña ni jin san, te kundaꞌu ini ña ni.

Ndataa ni ja ndakui ni nuu san ja kuu san tee jinokuechi nuu ni,

te skaku niꞌnu ña ni jin san.

17 Xneꞌe ni ja kundaꞌu ini ña ni jin san, nagua ja na vi kuni ñayiu ka skexiko ña jin san,

te na vi kukanoi, chi ni chituu ña maa ni, vi Jitoꞌo, vi ni ndasaꞌa sii ini ña ni.